ગરબી અને દાંડીયા આજે દેશભરમાં ગુજરાતની ઓળખ બની ચુક્યા છે. પણ, આજથી ત્રીસ વરસ પહેલા સાત સમંદર પાર ઓમાનની ધરતી ઉપર મસ્ક્તમા મા અંબા ની આરાધના સાથે ગુજરાતની ગરબી પરંપરાને જીવંત રાખવાની સફળતાના હક્કદાર કચ્છી માડુ ધનસુખ હરજી લીંબાણી છે!! ધનસુખભાઈ ની કન્સ્ટ્રકશન કંપની કોસમોસ દ્વારા આયોજીત “કોસમોસ” નવરાત્રિ આજે સમગ્ર મસ્ક્ત-ઓમાન ના ગુજરાતી સમાજની હોટ ફેવરીટ ગરબી છે. ધનસુખભાઈ લીંબાણી ન્યૂઝ4કચ્છ સાથે વાત કરતા કહે છે કે, અમે સંપૂર્ણ શ્રદ્ધા અને આસ્થાભેર મા અંબા ની આરાધના કરીએ છીએ. નવરાત્રિ મા દરરોજ ગરબાની જ્યોત સાથે ‘જય ભવાની’ ‘જય અંબે’ના નાદ સાથે આવતો ગરબો ચાચરના ચોક સમા મંડપમાં પહોંચે ત્યારે સૌ કોઈ મા અંબા ની આરતી દ્વારા ગરબાને વધાવી લે છે. તે સાથે જ જાણીતા કચ્છી સંગીત કલાકાર શૈલેશ જાની અને તેમના સાથીદારો ના સંગીત ના સથવારે ખેલૈયાઓ દ્વારા ગરબા અને દાંડિયાનો પ્રારંભ થાય છે. કચ્છીયતભર્યા આ કોસમોસ નવરાત્રિ મહોત્સવે ભારતીય સંસ્કૃતિની પ્રાચીન પરંપરા ને જાણે વિદેશમાં પણ જાળવી રાખી હોય એવો અદ્દભુત માહોલ અહીં ખડો થાય છે. જોકે, આપણ ને સૌને સૌથી વધુ આશ્ચર્ય થાય એવી જો કોઈ વાત હોય તો તે છે કોસમોસ નવરાત્રિ મહોત્સવની વ્યવસ્થા!! આજે આપણું કચ્છ હોય કે ગુજરાત ની ધરતી હોય, આપણને સૌને અનુભવ છે કે, આપણે ત્યાં આજે ગરબીઓ પ્રોફેશનલ થઈ ગઈ છે. જ્યારે ઓમાન-મસ્ક્ત ખાતે થઈ રહેલા આ આયોજન વિશે ધનસુખભાઈ લીંબાણી ન્યૂઝ4કચ્છ સાથે વાત કરતા કહે છે કે, અમારા કોસમોસ નવરાત્રિ મહોત્સવની વ્યવસ્થા સંપૂર્ણ નિઃશુલ્ક હોય છે. અહીં ઊમટતા ખેલૈયાઓ માટે ચા પાણી નાસ્તાની ખાસ વ્યવસ્થા કરાય છે. વિદેશની આ ધરતી ઉપર કચ્છ અને ગુજરાતના ખેલૈયાઓ કચ્છના જાણીતા સંગીત કલાકાર શૈલેષ જાની ના સંગીત નિર્દેશન મા મનભરીને ગરબે ઘૂમે છે. શૈલેષ જાની ની સાથે તેમના સાથી કલાકારો તેજદાન ગઢવી, રાજા વાસુ, નેહા પટેલ, મીનાબેન જોશી, નિખિલ ગોસ્વામી, રઝાકભાઈ,અક્ષય જાની, લાલજી માલમ, વિપુલ ગોર,મેહુલ જોશી, જીગ્નેશ ચોથાણી, પંકજ ભાંડેલ તથા મહેન્દ્ર ગોરાણી દ્વારા થતી આ જમાવટ ને માણવા અન્ય કંપનીઓના હોદેદારો અને કામદારો પણ મોટી સંખ્યામાં ઉમટે છે.
આ સમગ્ર આયોજનની વ્યવસ્થા કોસમોસના મોભી ધનસુખભાઈ હરજી લીંબાણી,
જીતુભાઇ સુરાણી, ભાર્ગવ સુરાણી, ભોગીલાલ લીંબાણી, વસંતભાઈ લીંબાણી, રમેશભાઈ રામાણી, ડાયાલાલભાઈ સેંઘાણી,પ્રદ્યુમનસિંહ જાડેજા, દિનેશભાઇ રૂપારેલીયા સહિતના અગ્રણીઓ સંભાળી રહ્યા છે. નવરાત્રિ દરમ્યાન ઓમાન-મસ્ક્ત ની ધરતી ઉપર કચ્છી દાતા ધનસુખભાઈ લીંબાણીના આયોજન મા ‘કોસમોસ ની નવરાત્રિ’ મા કચ્છી કલાકારો ના સથવારે કચ્છીયત ની મહેક વરતાય છે.
