દિવાળી પછી ની રજાઓ પૂર્ણ થઈ છે અને આજે લાભપાંચમના શુભ દિવસથી ભુજની બજારોમાં નવા વર્ષના વ્યાપારનો પ્રારંભ થયો છે. ભુજ જથ્થાબંધ બજાર મધ્યે શહેરના પ્રથમ નાગરિક લતાબેન સોલંકી અને ધારાસભ્ય ડો. નીમાબેન આચાર્યની ઉપસ્થિત વચ્ચે પરંપરાગત કાંટાપૂજન સાથે વિક્રમ સવંત ૨૦૭૫ ના નવા વર્ષના સોદાઓ નો પ્રારંભ કરાયો હતો. મુહુર્ત નો પ્રથમ સોદો શાહ કિશોરચંદ્ર શિવલાલ શાહ કંપની નો મગ ના ભાવ ૭૧૦૦ ₹ સાથે ધારાસભ્ય ડો. નીમાબેન આચાર્યએ કરાવ્યો હતો. ભુજ ગ્રેઇન એન્ડ સિડ્સ મર્ચન્ટ એસોસિએશન ના પ્રમુખ મેહુલ રમેશભાઈ ઠક્કરે ન્યૂઝ4કચ્છ સાથે વાત કરતા જણાવ્યું હતું કે, મુહૂર્તમાં અનાજ, કઠોળ, ચા, ખાંડ, ઘી, ગોળ અને પશુઆહાર સહિતની ચીજ વસ્તુઓના અંદાજિત ૯ કરોડ ₹ ના વ્યાપાર થયા હતા. કાંટાપૂજન અને મુહૂર્ત ના આ કાર્યક્રમમાં વરિષ્ઠ વ્યાપારી આગેવાનો શંભુભાઈ પોપટ, કાંતિભાઈ ગણાત્રા, પ્રબોધભાઈ કોઠારી, મનીષભાઈ ઠક્કરે મહેમાનોને આવકાર આપ્યો હતો. ભુજ કોમર્શીયલ બેંક ના ચેરમેન હિતેશ ઠક્કર, કેડીસીસી બેંકના એમ.ડી. ઇન્દ્રજીતસિંહ જાડેજા, પૂર્વ નગરસેવક હિતેશભાઈ માહેશ્વરી, પ્રવીણભાઈ ઠક્કર, દામોદરભાઈ કરવા, પ્રભુભાઈ શાહ ઉપસ્થિત રહ્યા હતા. મુખ્ય આયોજન અને વ્યવસ્થા ભુજ ગ્રેઇન એન્ડ સિડ્સ મર્ચન્ટ એસોસિએશન તેમ જ ભુજ જથ્થાબંધ બજાર નવનિર્માણ ટ્રસ્ટના પ્રમુખ મેહુલ ઠક્કર અને અન્ય હોદ્દેદારોએ સંભાળી હતી.
