કચ્છ કોંગ્રેસમાં મોટું ગાબડું પાડીને ભાજપે રાજકીય હલચલ સર્જી છે મુન્દ્રા કોંગ્રેસનો પંજો ભાજપના વાવાઝોડામાં રોળાયો છે સાથે સાથે માંડવીના સક્રિય કોંગ્રેસી નેતાને પણ ખેંચીને ભાજપે મુન્દ્રા પછી હવે માડવીનો વારો હોવાનો સંકેત પણ આપી દીધો છે. મુન્દ્રામાં આજે શિક્ષણમંત્રી ભુપેન્દ્રસિંહ ચુડાસમાના હસ્તે કૉંગ્રેસના કિશોર સિંહ પરમાર અને લખુરામ ગોરડિયા સાથે તાલુકા પંચાયતના ચાર સભ્યો, બે લઘુમતી આગેવાનો અને ૧૦૦૦ કોંગ્રેસી કાર્યકરોએ ભાજપનો કેસરિયો ખેસ પહેર્યો હતો જોકે, મુન્દ્રા કોંગ્રેસના નેતાઓના ભાજપ પ્રવેશની સાથે માંડવી કોંગ્રેસના સક્રિય નેતા એવા ચતુરસિંહ જાડેજાએ પણ કેસરિયો પહેરતાં મુન્દ્રા પછી હવે માંડવી કોંગ્રેસનો વારો, એવી રાજકીય ચર્ચા અને અન્ય નામોની હવા પણ શરૂ થઈ ગઈ છે કાર્યક્રમમાં ઉપસ્થિત રાજ્યમંત્રી વાસણભાઈ આહીરે બંને કોંગી નેતાઓ અને તેમના સમર્થકોને ભાજપમાં આવકાર્યા હતા મુન્દ્રા તાલુકા ભાજપ પ્રમુખ વાલજીભાઈ ટાપરિયા અને ભચાઉના નગરપતિ કુલદીપસિંહ જાડેજાએ કૉંગ્રેસના કાર્યકરો મોટી સંખ્યામાં ભાજપમાં જોડાતા હરખની લાગણી વ્યક્ત કરી હતી.
મુન્દ્રા પાટીદાર સમાજ વાડીમાં યોજાયેલા આ કાર્યક્ર્મમાં કેશુભાઈ પટેલે કોંગ્રેસનો ગઢ ધરાશાયી થઈ રહ્યો હોવાનું જણાવ્યું હતું
ભુપેન્દ્રસિંહ ચુડાસમાએ ભાજપે ઘણા બધા વિકાસના કામો કર્યા હોવાનું જણાવી અગાઉ કૉંગ્રેસ સરકાર હતી ત્યારે ગરીબ કલ્યાણ મેળો, મા યોજના સહિતની અનેક કલ્યાણકારી યોજનાઓ કૉંગ્રેસ સરકારમાં ન હોવાનું જણાવ્યું હતુ. વર્ષો સુધી કૉંગ્રેસ સતામાં હતી પણ વિકાસમાં રસ ન હતો એવું કહેતા શ્રી ચુડાસમાએ જણાવ્યું હતું કે, રાષ્ટ્રીય હિત સાથે રાજકીય ઇચ્છા શક્તિની વાત ભાજપ જ કરી શકે છે. ભાજપ સરકાર આવ્યા બાદ રસ્તા, શિક્ષણ, વીજળી સહિતના અનેક વિકાસકાર્યો ખૂબ જ થયા હોવાનું અને કૉંગ્રેસ સમાજને તોડવાનું જ્યારે ભાજપ સમાજ ને જોડવાનું કામ કરે છે, એવું જણાવ્યું હતું. વડાપ્રધાન નરેન્દ્રભાઈ મોદી આતંકવાદ ને ડામવા પ્રયાસો કરી રહ્યા છે એ જોઈને રાષ્ટ્રવાદ જાગતા આજે કૉંગ્રેસના અનેક મિત્રો ભાજપ માં જોડાઈ રહ્યા છે વર્ષો સુધી કોંગ્રેસમાં રહેનાર કોંગ્રેસના નેતા કિશોરસિંહ પરમારે કોંગ્રેસને દિશા વિહીન પક્ષ ગણાવીને વડાપ્રધાન નરેન્દ્રભાઈની પ્રસંશા કરીને કેસરિયા કર્યા હતા કાર્યક્રમમાં જિલ્લા અને તાલુકા સંગઠનના ભાજપના આગેવાનો અને કાર્યકરો મોટી સંખ્યામાં ઉપસ્થિત રહ્યા હતા.
