ગઈકાલે કચ્છના આકાશમાં દેખાયેલ પ્રકાશપુંજે લોકોમાં ચર્ચા અને કુતુહુલ સર્જ્યું છે. આ વખતે દક્ષિણ પૂર્વના ખૂણે એટલેકે અગ્નિ ખૂણે ૨૨° ડીગ્રી ઉપર પ્રકાશપુંજ દેખાતા ખગોળ શોખીનો, પ્રજાજનો તથા સુરક્ષા એજન્સી સહીત તમામ લોકોમાં કુતુહલનો માહોલ છવાઈ ગયો હતો.
આ બાબતે અનેક લોકોના ફોન આવ્યા બાદ વધુ વિગતો આપતાં સ્ટારગેઝીંગ ઈન્ડિયાના ડાયરેક્ટર અને કચ્છ એસ્ટ્રોનોમી ક્લબના પ્રમુખ નરેન્દ્ર ગોર સાગરે જણાવ્યું હતું કે આ પ્રકાશપુંજ ખૂબ જ પ્રકાશિત હતો
શરૂઆતમાં તો ઊંચેથી કોઈ લાઈટનો શેરડો નાખતો હોય તેવું જણાયું પરંતુ તેની ઊંચાઈ અને વ્યાપ જોતાં આ શક્યતાનો છેદ તુરંત જ ઊડી ગયો હતો.
આ પ્રકાશપુંજ ભચાઉના આમરડી, ખડિર, ચપરેડી, ભુજ, સહીતના વિસ્તારોમાંથી દેખાતો હોવાના સંદેશાઓ વાયરલ થતા લોકો કુતુહલ, રોમાંચ, અને આશંકાની લાગણી ફેલાઇ હતી,
ભચાઉના અમારડી ગામના તુર્ક તાહેરમામદ ભાઇના જણાવ્યા મુજબ આ પ્રકાશ એક જગ્યાએ રહી ગોળ ગોળ ફરતો હોય તેવું જણાયું હતુ, જ્યારે કેટલાક નિરીક્ષકોના મતે આ પ્રકાશ ઘડિયાલના લોલકની જેમ ફરતો હતો. ભુજ થી મનન ભાઈ ઠક્કરે આ પ્રકાશ સ્થિર જોયો હતો અને આ બધાની દિશા એક જ એટલે કે અગ્નિ ખૂણો હતો. આ પ્રકાશ પુંજ અર્ધાં થી પોણો કલાક દેખાયા બાદ ગુમ થઈ ગયો હતો જે અનેક પ્રશ્નો છોડી ગયો હતો.
યુ એફ ઓ (ઊડતી રકાબી), હોઇ શકે? આ પ્રશ્ન નો ઉત્તર આપવો કઠીન છે તેમ કહેતાં શ્રી ગોર જણાવે છે કે તેના ફોટો વિડીયો વગેરે જોયા પછી કઈંક નિષ્કર્ષ ઉપર પહોંચી શકાય પરંતૂ આવો બનાવ આ અગાઉ ક્યારે પણ બન્યો હોય તેવું જાણ્યું નથી તેથી તે સામાન્ય વસ્તુ તો ન હતી જ એમ કહી શકાય.
