ચૂંટણીમાં વેપાર,ભ્રષ્ટાચારને છાવરવાની નીતિ અને બ્લેકમેલ કરનારા તત્વોને પાર્ટીમાં પ્રોત્સાહન અપાતુ હોવાના આક્ષેપ સાથે ચુંટણીમાં જીલ્લા કોગ્રેસ પ્રમુખની કામગીરીથી નારાજ થઇ વ્યથા ઠાલવી
એક તરફ વાંરવાર અંજાર વિધાનસભા બેઠક પરથી હારનો સ્વાદ ચાંખ્યા બાદ પણ પ્રદેશ નેતૃત્વએ ચુંટણી પહેલા કોગ્રેસના વરિષ્ઠ આગેવાન વિ.કે.હુંબલને ફરી પ્રમુખ બનાવ્યા અને તેની આગેવાનીમાં કોગ્રેસ આ વખતે ચુંટણી લડી રહી છે. જો કે ચુંટણી પહેલાજ કોગ્રેસને મોટો ફટકો પડ્યો અને ભાજપે કચ્છના અન્ય વિસ્તારો સાથે કોગ્રેસ પ્રમુખના મત વિસ્તાર અંજારમાં અનેક બેઠકો બિનહરીફ કરી કોગ્રેસના નેતૃત્વ સામે સવાલો ઉભા કર્યા છે. તેવામાં પાર્ટીમાંથી નારાજગીના સુરો પણ ઉઠી રહ્યા છે. નખત્રાણામાં ટીકીટ વહેંચણીના ખેલ તથા મુન્દ્રાના કોગ્રેસ અગ્રણીની નારજગી પછી હવે ભુજની જૈન મહિલા અગ્રણી અને કોગ્રેસની મહિલા કાર્યક્રર માનસી શાહે કોગ્રેસ પ્રમુખની નિતીરીથી નારાજ થઇ કોગ્રેસના તમામ પદ્દેથી રાજીનામુ આપી દીધુ છે.વર્ષ 2015થી કોંગ્રેસ પક્ષમાં એક સક્રિય કાર્યકર તરીકે જોડાયેલી મહિલા અગાઉ કોગ્રેસ જિલ્લા પ્રવક્તા, જિલ્લા મંત્રી તેમજ પ્રદેશ સ્તરે વિવિધ સેલપાંખોમાં જવાબદારીપૂર્વક પદ સંભાળ્યા હતા.જો કે દુખી હ્દયે તેને આજે વિવિધ ગંભીર આક્ષેપો સાથે રાજીનામુ ધરી દીધુ હતુ.
કોગ્રેસ પ્રમુખ અને પક્ષની સ્થિતી અંગે સવાલો
મહિલા અગ્રણીએ રાજીનામુ આપતા જણાવ્યુ છે. કે ચૂંટણીમાં “વેપાર” અને બિનહરીફની રમત:હાલ ચાલી રહી છે.પક્ષના હિતોનો “વેપાર” થઈ ગયો હોય તેવું જણાય છે. અને જાણીજોઈને અમુક જગ્યાએ એવા નબળા ઉમેદવારો ઊભા રાખવામાં આવ્યા કે જેઓ સામેથી બિનહરીફ થવા તૈયાર હતા,અને પરિણામે બેઠકો બિનહરીફ થઇ જેમાં મોટો ખેલ કરવામાં આવ્યો છે.આ સાથે ભ્રષ્ટાચારને છાવરવાની નીતિના આરોપ સાથે સોશિયલ મીડિયામાં વાયરલ થયેલા ઓડિયોમાં ટિકિટો માટે જે “ભાવતાલ” અને વહીવટની વાતો સામે આવી, તેમાં એક જિલ્લા પ્રમુખ તરીકે નૈતિકતાના આધારે આવા તત્વો સામે કડક પગલાં ભરવાને બદલે તેમને છાવરવા માટે અને બચાવ કરવા માટેના પ્રયત્નો થયા સાથે બ્લેકમેલ કરનારા તત્વોને પ્રોત્સાહન આપવાના આરોપ સાથે ચૂંટણી ટાણે પક્ષમાંથી રાજીનામાં આપવાના નાટકો કરી ઉમેદવારોને બ્લેકમેલ કરતા તત્વોને જિલ્લા પ્રમુખે પોતાની નજીક રાખ્યા છે અને તેમને જ ટિકિટો આપીને વફાદાર કાર્યકરો સાથે દ્રોહ કર્યો છે.હકદાર કાર્યકર્તાઓને સાઈડલાઈન કરી એવા લોકોને ટિકિટો અપાઈ છે જેમના સમાજનો ત્યાં એક પણ મત નથી.પક્ષમાં હવે ‘આયા રામ-ગયા રામ’ અને બ્લેકમેલર્સની જ બોલબાલા છે.તેવામાં મહિલાએ આવા કારણો સાથે રાજીનામાં ધર્યા હતા.
કોગ્રેસ પ્રમુખને ઉદ્યોગપતિની શરમ નડી..
એક તરફ કોગ્રેસ પ્રમુખ પર વિવિધ આક્ષેપો થયા તો કોગ્રેસ પ્રમુખે પણ ગઇકાલે તંત્ર પર ગંભીર આરોપ લગાવ્યા અને ઉદ્યોગપતિ તથા પોલીસ પર ગંભીર આરોપ લગાવાયા જો કે પત્રકાર પરિષદ દરમ્યાન જ્યારે આ ઉદ્યોગપતિ કોણ? તે અંગે પુછવામાં આપતા તેને નામ આપ્યા ન હતા અને આગામી સમયમાં તેના નામ ખુલ્લા પાડવામાં આવશે તેવો દાવો કર્યો હતો પરંતુ વાતચીતમાં તેને ઉલ્લેખ કર્યો હતો કે તેમનાજ આહિર સમાજના ઉદ્યોગપતિ આવુ કરી રહ્યા છે. જેથી ખરાબ લાગે જો કે બાદમાં નામ જાહેર કરવાનો દાવો કર્યો હતો. હવે કોગ્રેસના ઉમેદવારને ડરાવવામાં આવતા હોય અને કોગ્રેસ પ્રમુખ લાજ કાઢે તો શુ સમજવુ? તો નખત્રાણાના વાયરલ ઓડીયો મામલે પણ તેઓએ લુલો બચાવ કરી ચુંટણી દરમ્યાન આવા આક્ષેપ થાય તેવો દાવો કર્યો હતો.
કચ્છમાં લખપત સિવાય હાલ કોગ્રેસ માટે જુજ બેઠકો પર જીતની શક્યતા છે. તેવુ રાજકીય નિષ્ણાંતો જણાવી રહ્યા છે. તે વચ્ચે ગંભીર આક્ષેપો ભાજપ પર લગાવી કોગ્રેસ પોતાની પાર્ટીમાં સબસલામતીના દાવા કરી રહ્યુ છે. પરંતુ કોગ્રેસમાં પણ ધીમેધીમે આંતરીક વિખવાદ ખુલ્લીને સામે આવી રહ્યો છે. તેવામાં મહિલા અગ્રણીનુ રાજીનામુ ચર્ચામાં આવ્યુ છે. ત્યારે આગામી સમયમાં શુ નવાજુની ચુંટણી દરમ્યાન થાય છે તેના પર સૌની નજર છે.
