કચ્છમાં મેઘાવી માહોલ ! ભુજ-મુન્દ્રામાં દોઢ, રાપરમાં તોફાની બે ઇંચ !

ગુજરાતમાં મેઘતાંડવ વચ્ચે વરસાદની રાહ જોતા કચ્છમાં કાચા સોના સમાન વરસાદ પડ્યો હતો. ગુજરાતમાં 24 કલાકમાં 255 તાલુકામાં વરસાદ તુટી પડ્યો હતો. આ સાથે કચ્છમાં સાર્વત્રિક તો દક્ષિણ ગુજરાતમાં જળબંબાકારની સ્થિતી સર્જાઇ હતી. રાપરમાં તોફાની બે ઇંચ વરસાદ

ભુજ
છેલ્લા 24 કલાકમાં સમગ્ર રાજ્યમાં સર્વત્ર મેઘમહેર જોવા મળી હતી. અને રાજ્યના કુલ 255 તાલુકાઓમાં નોંધપાત્ર વરસાદ નોંધાતા નદી-નાળા અને જળાશયોમાં નવા નીરની આવક થઈ હતી.સાથે અનેક નીચાણવાળા વિસ્તારો પાણીમાં ગરકાવ થતાં તંત્ર સંપૂર્ણપણે એલર્ટ મોડ પર આવી ગયું હતુ.રાજ્યમાં સૌથી વધુ વરસાદ દક્ષિણ ગુજરાત અને મધ્ય ગુજરાતના જિલ્લાઓમાં નોંધાયો હતો.જેમાં સુરતના અંબિકા વિસ્તારમાં સૌથી વધુ 24 ઇંચ ધોધમાર વરસાદથી જળબંબાકારની સ્થિતિ સર્જાઈ હતી. તો તાપી (ડોલવણ)માં 17 ઇંચ વરસાદ નોંધાયો સાથે ખેડા, નવસારી, વસો અને વાંસદામાં 16.5 ઇંચ જ્યારે નડિયાદમાં 14 ઇંચ વરસાદથી જનજીવન ભારે પ્રભાવિત થયું હતુ આ સાથે અન્ય જિલ્લાઓ ભરૂચ,વલસાડ, ડાંગ, આણંદ અને અમદાવાદમાં 3 થી 13 ઇંચ સુધીનો નોંધપાત્ર વરસાદ પડ્યો હતો.આ સાથે કચ્છમા પણ શુક્રવારની રાતથી લઇ શનિવારે સવારથી જ મેઘાવી માહોલ જોવા મળ્યો હતો વહેલી પરોઢથી જ વાદળછાયા વાતાવરણ વચ્ચે વિવિધ તાલુકાઓમાં વરસાદી મહેર જોવા મળી હતી. ગ્રામ્ય અને તાલુકા વાર વરસાદી વિગતો જોઇએ તો સવારના 6 થી કચ્છના સાત તાલુકાઓમાં વરસાદ નોંધાયો હતો. જેમાં ભુજ અને મુન્દ્રા: દોઢ-દોઢ ઇંચ વરસાદ નોંધાયો હતો જે સમગ્ર કચ્છમાં સૌથી વધુ હતો. તો નખત્રાણામાં બપોર પછી નખત્રાણા શહેર તેમજ બીબર, દેવીસર અને મુખ્ય બજાર વિસ્તારમાં મેઘરાજાએ પધરામણી થઇ હતી. તો મુન્દ્રા છસરા,અંજાર (ચાંદ્રોડા),રાપર (આડેસર, ભીમાસર), ખાવડા (કુરન) તેમજ અબડાસા અને ભુજના ગ્રામ્ય વિસ્તારો (સુખપર, માધાપર, મોટા રેહા, લોરીયા, કોટડા ચકાર) માં પણ વરસાદી ઝાપટાં પડ્યા હતા.અબડાસા અને લખપત તાલુકા મથકો હજુ સુધી વરસાદની રાહ જોઈ રહ્યા હતા ત્યા પણ વરસાદી છાંટાથી લોકોમાં આશા બંધાઇ હતી.હમીરસરમાં પાણીની આવક થતા લોકો મોટી સંખ્યામાં જોવા માટે ઉમટ્યા હતા.

ભુજ બસ સ્ટેશન ફરી બન્યું ‘બેટ’

ભુજ શહેરમાં ધોધમાર વરસાદ પડતાં જ ભુજ બસ સ્ટેશન વિસ્તાર પાણીમાં ગરકાવ થઈ ગયો હતો.રસ્તાઓ પર પાણી ભરાઈ જવાથી અનેક વાહનચાલકો મુશ્કેલીમાં મુકાયા હતા.ગ્રામ્ય અને તાલુકા મથકેથી આવતા મુસાફરોને ભારે હાલાકી ભોગવવી પડી હતી.સ્થાનિકો મુજબ વર્ષો જૂની આ પાણી ભરાવાની સમસ્યાનો નગરપાલિકા દ્વારા કાયમી ઉકેલ ન લાવવામાં આવતાં દર વરસાદે લોકો મુશ્કેલીમાં મુકાય છે.અને થોડા વિરસાદમાજ આ વિસ્તાર બેટમાં ફેરવાઇ જાય છે. ન માત્ર ભુજ બસ સ્ટેશન પરંતુ કરોડોના ખર્ચ પછી થોડા વરસાદમાંજ ભુજના અનેક વિસ્તારોમાં પાણી ભરાતા લોકો મુશ્કેલીમાં મુકાયા હતા.

રાપરનો ફતેહગઢ ડેમ ૧૦૦% છલકાયો
રુદ્રમાતા સહિતના ડેમો હજી તળિયાઝાટક

કચ્છ જિલ્લામાં તાજેતરમાં થયેલા વરસાદને પગલે સિંચાઈ ખાતા હસ્તકના મધ્યમ જળાશયોમાં પાણીની આવક નોંધાઈ છે.કચ્છ સિંચાઇ વર્તુળ, ભુજ જાહેર કરવામાં આવેલા આંકડા મુજબ, જિલ્લાના ૨૦ મધ્યમ સિંચાઇ યોજનાઓમાં સંગ્રહ ક્ષમતા સુધરી છે. જેમાં ફતેહગઢ ડેમ ૧૦૦% ઓવરફ્લો થયો છે. અને ૧૨ ક્યુસેક પાણીની જાવક નોંધાઇ છે. રાપર તાલુકામાં પડેલા ભારે વરસાદને કારણે ફતેહગઢ જળાશય સંપૂર્ણપણે ભરાઈ ગયો હતો.આ સિવાય રાપર તાલુકાના જ ‘સુવઇ’ જળાશયમાં ૩૧.૮૯% પાણી સંગ્રહ છે.આ ઉપરાંત ટપ્પર ડેમ (અંજાર)માં ૫૦.૭૫% ભરાયો જ્યારે કારાઘોઘા (મુંદ્રા): ૭૧.૭૧%, ભૂખી (નખત્રાણા): ૪૮.૫૬% ,બેરાચીયા (અબડાસા): ૪૨.૨૬% ,ગજણસર (લખપત): ૪૨.૧૨% ગોધાતડ (લખપત): ૪૧.૨૯%,જંગડીયા (અબડાસા): ૪૦.૩૭% મીટ્ટી (અબડાસા): ૩૧.૯૭%, સુધી પાણીનો સંગ્રહ છે. આ તરફ રુદ્રમાતા અને કાયલા ડેમની સ્થિતિ ચિંતાજનક છે.ભુજ તાલુકાના મુખ્ય એવા રુદ્રમાતા જળાશયમાં માત્ર ૨.૦૮% જ પાણી ઉપલબ્ધ છે,જ્યારે કાયલા જળાશય તળિયાઝાટક સ્થિતિમાં છે.સાનન્ધો ડેમમાં પણ માત્ર ૧.૮૫% જ સ્ટોરેજ બાકી છે. ત્યારે વધુ વરસાદની લોકોને આશા છે.

લ્યો બોલો કલેકટર કચેરીના પ્રવેશે પાણી ભરાયા

તાજેતરમાં જ કચ્છ કલેકટર કચેરીમાં ભારે વરસાદની આગાહીને પગલે સમગ્ર કચ્છમાં વધુ વરસાદથી કોઇ જગ્યાએ સ્થિતી ખરાબ ન થાય તે માટે સમિક્ષા કરવામાં આવી હતી. પરંતુ કચ્છમાં હજુ ભારે વરસાદ થયો નથી પરંતુ થોડા વરસાદમાંજ અનેક જગ્યાએ પાણી ભરાઇ જવાની સ્થિતી સર્જાઇ હતી. જેને પગલે લોકોએ તંત્રની પ્રિ-મોન્સુન કામગીરી સામે અનેક સવાલો ઉઠાવ્યા હતા. પંરતુ થોડા વરસાદ વચ્ચે એક તસ્વીર સામે આવી હતી. જેમાં જીલ્લાની મુખ્ય વડી સરકારી કચેરી એવી કલેકટર કચેરીમાં બન્ને પ્રવેશ ગેટ પાસે જ પાણીનો જળભરાવ થયેલો જોવા મળ્યો હતો.જો કે આ પ્રથમવાર નથી ચોક્કસ વિસ્તારોમાં જે રીતે દર વર્ષે પાણી ભરાય છે. તેવી રીતે અહી પણ થોડા વરસાદમાં ગેટ પાસે પાણી ભરાઇ જાય છે. ત્યારે લોકો અપેક્ષા રાખી રહ્યા છે. કે જો નિચેનુ તંત્ર કલેકટર કચેરી પાસે ભરાતા પાણીની સમસ્યા દુર ન કરી શકતુ હોય તો અન્ય વિસ્તારોનુ પુછવુ શુ..હવે પછી વરસાદી સમસ્યા અંગે મીટીંગ થાય ત્યારે જીલ્લા કલેકટર તેમની કચેરી બહારની આ સમસ્યાના કાયમી ઉકેલ માટેના પ્રયત્નો કરે તે ઉપેક્ષીત છે….આ તસ્વીર સમસ્યાનો બોલતો પુરાવો છે.

હવામાન વિભાગ ની આગાહી વચ્ચે રાપર તાલુકામાં શનિવારે બપોરે બે વાગ્યા બાદ ધમાકેદાર એન્ટ્રી ગાજવીજ સાથે થઈ હતી જેમાં રાપર,નિલપર, ખીરઈ, બાદરગઢ, ચિત્રોડ, ગાગોદર, મેવાસા, કાનમેર,પલાંસવા, આડેસર, નંદાસર, રામવાવ, ખેગારપર, ગવરીપર, કલ્યાણપર,સહિત ના ગામોમાં બે થી ચાર ઈંચ જેટલો વરસાદ વરસ્યો હતો સત્તાવાર રીતે રાપરમાં બે કલાકમાં બે ઇંચ જેટલો વરસાદ નોંધાયો હતો આમ સમગ્ર કચ્છમા વરસાદી માહોલ સર્જાતા સારા વરસાદની આશા બંધાઇ છે.