કચ્છમાં ફૂડ એન્ડ ડ્રગ્સ વિભાગની કડક કાર્યવાહી: ૧૮ હોટલ-રેસ્ટોરન્ટમાં સઘન ચેકિંગ, વાસી ગ્રેવી અને ફેટ સ્પ્રેડ સહિતનો મોટો જથ્થો સ્થળ પર જ નાશ કરાયો જોગવાઈઓનું ઉલ્લંઘન કરનાર ૮ પેઢીઓને સુધારણા નોટિસ ફટકારાઈ
ગુજરાત સરકારના ખોરાક અને ઔષધ નિયમન તંત્ર દ્વારા રાજ્યવ્યાપી હાથ ધરાયેલી ખાદ્ય સુરક્ષા ઝુંબેશ અંતર્ગત કચ્છ જિલ્લામાં પણ તંત્ર દ્વારા કડક તપાસ હાથ ધરવામાં આવી છે.કચ્છ જિલ્લાના ફૂડ સેફ્ટી ઓફિસર્સ એસ.બી.પટેલ,એમ.એમ.પટેલ તથા વી.એમ.બારંડાની સંયુક્ત ટીમ દ્વારા જિલ્લાના વિવિધ વિસ્તારોમાં આવેલી હોટલો અને રેસ્ટોરન્ટ્સમાં અચાનક ચેકિંગ હાથ ધરવામાં આવ્યું હતું.તપાસ દરમિયાન અધિકારીઓ દ્વારા હોટલ-રેસ્ટોરન્ટના રસોડા,સ્વચ્છતા, કારીગરોની આરોગ્યવિષયક પરિસ્થિતિ,FSSAI લાયસન્સ અને ડિસ્પ્લે બોર્ડ સહિત ‘ફૂડ સેફ્ટી એન્ડ સ્ટાન્ડર્ડ્સ એકટ’ના Schedule-4 મુજબની તમામ શરતોનું પાલન થાય છે કે નહીં તેની બારીકાઈથી ચકાસણી કરવામાં આવી હતી.તપાસ દરમિયાન જે સ્થળોએ અસ્વચ્છતા,વાસી ખોરાક કે બિનઆરોગ્યપ્રદ વાતાવરણ માલૂમ પડ્યું હતું ત્યાં તાત્કાલિક ધોરણે કડક પગલાં લેવાયા હતા.ચેકિંગ દરમિયાન બટરના નામે વપરાતું અંદાજે ૩૦ કિલો ફેટ સ્પ્રેડ,૮ કિલો વાસી પનીર, સિન્થેટિક ફૂડ કલર વાળી ૪૦ કિલો વાસી ગ્રેવી, ૫૦૦ ગ્રામ કૃત્રિમ કલર, પાઉંભાજી માટે વપરાતા ૬ ડઝન અનબ્રાન્ડેડ પાવ તથા પેકિંગ પર કોઈ જ વિગતો વગરના બ્રેડના પેકેટ્સ સ્થળ પર જ જપ્ત કરી માનવ વપરાશ માટે અયોગ્ય ગણાવી નાશ કરવામાં આવ્યો હતો.તંત્રની ટીમ દ્વારા કુલ ૧૮ જેટલી પેઢીઓની તપાસ કરવામાં આવી હતી.જેમાંથી ખાદ્ય સુરક્ષાના ધોરણોના નિયમોનું યોગ્ય પાલન ન કરનારી ૯ પેઢીઓને કાયદા મુજબ સુધારણા નોટિસ ફટકારવામાં આવી હતી.સાથે તમામ ખાદ્ય વ્યવસાયકારોને કડક સૂચના આપવામાં આવી છે કે તેઓએ ઉત્પાદન કે રસોઈમાં ઉપયોગમાં લેવાતો તમામ કાચો માલ લેબલિંગની સંપૂર્ણ વિગતો વાળો જ વાપરવો તેમજ રસોડામાં સ્વચ્છતા અને કર્મચારીઓની હાઇજીનનું ચુસ્ત પાલન કરવું.આગામી દિવસોમાં પણ સમગ્ર કચ્છ જિલ્લામાં આવી ઝુંબેશ ચાલુ રહેશે તેવું તંત્ર દ્વારા જણાવવામાં આવ્યું છે.
નામ કેમ નથી જાહેર કરાતા.?
તંત્ર દ્વારા લોકોને જાગૃત કરવા સાથે આવી કાર્યવાહી તો કરાય છે. પરતુ જે સ્થળે આવી ગેરરીતોઓ સામે આવી તેના નામ ફુડ-ડ્રગ્સ વિભાગની ટીમ દ્વારા જાહેર કરાતા નથી ત્યારે જાગૃત નાગરીકોએ આવી હોટલોના નામ જાહેર કરવાનો સુર વ્યક્ત કર્યો હતો જેથી લોકો આવા સ્થળે ભોજન માટે જાય તે પહેલા ધ્યાન રાખે સાથે નિયમોનુ પાલન ન કરતી આવી હોટલો પણ આવી પ્રસિધ્ધીથી વધુ તકેદારી રાખતી થાય આ સાથે જાગૃત નાગરીકોએ પનીરથી લઇને ફુડ વિભાગની કામગીરી મોટી હોટલ કે રેસ્ટોરન્ટમાં ન થતી હોવાની વાત કહી તમામ સ્થળે ચેકીંગ થાય તે લોકોના હિતમાં હોવાનુ ઉમેર્યુ હતુ.આ પહેલા પણ પનીર ચેકીંગ સમયે પણ નિયમો ન પાડનાર વેપારીઓના નામ જાહેર કરાયા ન હતા.
ઓછા સ્ટાફ વચ્ચે કચ્છના ચોક્કસ વિસ્તારો પુરતી સિમીત રહેતી કાર્યવાહી કચ્છમાં નિયમીત કરવાની જરૂર છે. કેમકે જે રીતે કચ્છમાં પણ ફુડ ઇન્ડ્રસ્ટ્રીમાં રોજ નવી સાખાઓ શરૂ થઇ રહી છે. તેની સામે જવાબદાર તંત્ર પાસે પુરતો સ્ટાફ નથી તેવામાં લોકોના આરોગ્ય માટે વધુ કડકાઇ સાથે કચ્છમાં સ્ટાફ ફાળવાય તે પણ જરૂરી છે. તો જ તંત્ર ચોક્કસ સ્થળોના બદલે તમામ સ્થળે પહોંચી શકશે..
