પ્રમુખના પતિની દાદાગીરી સામે પક્ષના જ હોદ્દેદારોએ શરૂ કરેલા પત્ર વોરનો મામલો હવે ગૂંચવાતા પ્રદેશ સુધી પહોચ્યો છે.સુત્રોનુ માનીએ તો ભાજપની આંતરીક તપાસમાં સમગ્ર મામલે અંજાર શહેર ભાજપ પ્રમુખની ભૂમિકા શંકાના દાયરામાં આવી છે.આ સાથે આ વિસ્તારના ધારાસભ્ય અને ગુજરાત સરકારના મંત્રી ત્રિક્રમ છાંગાએ પણ ભાજપ નેતાના જાહેરમાં ક્લાસ લીધા હોવાનો આંતરીક સુત્રોએ દાવો કર્યો છે.
અંજાર નગરપાલિકામાં ભ્રષ્ટાચાર અને પ્રમુખના પતિ દ્વારા કર્મચારીઓની હેરાનગતિ તથા કથિત ભષ્ટ્રાચારનો મામલો હવે પરાકાષ્ઠાએ પહોંચ્યો છે. એક તરફ એક પછી એક લેટરો સામે આવી રહ્યા છે. બીજી તરફ જેના પતિ સામે આક્ષેપો છે. તેવા અંજાર પાલિકાના પ્રમુખે પણ મિડીયા નિવેદનમાં પત્ર લખી રજુઆત કર્તાઓ દ્વારા યેનકેન પ્રકારે વર્તમાન બોડીને હેરાન કરાતી હોવાનો ખુલ્લો આરોપ મિડીયા સમક્ષ કર્યો છે. જેને લઇને મામલો વધુ ગરમાયો છે. આ વચ્ચે શહેરમાં અલગ જ ચર્ચાઓ વચ્ચે આમ આદમી પાર્ટી તથા કોગ્રેસે પણ આ મામલે યોગ્ય તપાસ સાથે ગંભીર આક્ષેપો કર્યા છે.જેને લઇને ભાજપની છબી ખરડાઇ છે. પરંતુ સમગ્ર વિવાદ હવે ભાજપ માટે ગળાના હાડકા સમાન બની ગયો છે. કેમકે કેડર બેજ પાર્ટીમાં કોઇ પણ સ્થાનીક મોટો નેતાઓને સાથે રાખ્યા વગર જીલ્લા ભાજપને લખાયેલો પત્ર ઇરાદા પુર્વક વાયરલ કરી દેવાતા અનેક શંકાઓ ઉપજી છે. જેમ કે શુ ખાલી દબાણ ઉભુ કરવા માટે સમગ્ર પત્રો લખાયા અને વાયરલ કરાયા હતા. શહેર ભાજપ પ્રમુખે લખેલા પત્ર પછી પાછળથી લખાયેલા પત્રો કોઇના દબાણમાં લખાયા હતા. જે મામલે જીલ્લા ભાજપે તો ગંભીર નોંધ લીધી છે. પરંતુ પ્રદેશ ભાજપે પણ આ કિસ્સાની નોંધ લઇ અહેવાલ મંગાવ્યો હોવાનુ ભાજપના આંતરીક સુત્રોએ જણાવ્યુ હતુ. અંગત અને વિશ્વસનીય સૂત્રો પાસેથી મળતી વિગતો મુજબ,આ સમગ્ર વિવાદમાં અંજાર શહેર ભાજપ પ્રમુખની ભૂમિકા શંકાના દાયરામાં આવી છે.અને જીલ્લા ભાજપ પ્રમુખે આ મામલે કડક વલણ અપનાવ્યું હોવાનુ પણ સુત્રોએ ઉમેર્યુ હતુ. સમગ્ર મામલાની જ્યારે ઉંડાણ પુર્વક તપાસ કરાઇ ત્યારે શહેર ભાજપ પ્રમુખના ઈશારે શાસક પક્ષના નેતાઓએ ફરિયાદ કરી હોવાનુ ધ્યાનમાં આવ્યુ છે.સૂત્રોના જણાવ્યા અનુસાર,અંજાર નગરપાલિકાના પ્રમુખના પતિ દ્વારા થતી હેરાનગતિ અને વ્યાપક ભ્રષ્ટાચાર અંગે શહેર ભાજપ પ્રમુખ અને મહામંત્રીઓ જીલ્લા કક્ષાએ લેખિત રજૂઆત કરે તે પહેલાં એક મોટું રાજકીય નાટક ભજવાયું હતું.
શુ લેટર કોઇના દબાણમાં લખાયા ?
અંજાર શહેર ભાજપ પ્રમુખના સીધા ઈશારે અને તેમના કહેવાથી નગરપાલિકાના શાસક પક્ષના નેતા,કારોબારી ચેરમેન અને ઉપપ્રમુખે પ્રમુખના પતિ વિરુદ્ધ લેખિતમાં રજૂઆત કરી હોવાનુ પ્રાથમિક નિવેદનમાં તેઓએ જણાવ્યુ હોવાનુ પાર્ટીના સુત્રોએ ઉમેર્યુ છે.જે મામલે ત્રણેય હોદ્દેદારોને કડક ઠપકો પણ મળ્યો હોવાનુ સુત્રોએ ઉમેર્યુ હતુ.ગંભીર ફરિયાદ મળતા જ જીલ્લા ભાજપ એક્શનમાં આવ્યુ હતુ. અને વાસ્તવિકતા જાણવા માટે પાલિકાના હોદ્દેદારોને રૂબરૂ બોલાવ્યા હતા. જેમાં ત્રણેય હોદ્દેદારોએ કબૂલાત કરી હતી કે તેમણે આ ફરિયાદ સ્વેચ્છાએ નહીં,પરંતુ અંજાર શહેર ભાજપ પ્રમુખના દબાણ અને કહેવાથી કરી હતી.સુત્રોએ તો ત્યા સુધી દાવો કર્યો છે. કે ત્રણેય હોદ્દેદારો પાસેથી આ સમગ્ર મામલાની સાચી હકીકત લેખિતમાં લેવાઇ છે. અને જેના આધારે પ્રદેશમાં સમગ્ર મામલાનો રીપોર્ટ રજુ કરાશે અને પક્ષની છબી ખરડાવવા બદલ તેમજ આંતરિક રાજકારણ રમવા બદલ કડક ઠપકા સાથે ભવિષ્યમાં કોઇ કાર્યવાહી પણ થઇ શકે છે.
માસ્તર સાહેબ એ પણ લીધા ક્લાસ !
સુત્રોનુ માનીએ તો સમગ્ર મામલો તો હવે જગજાહેર થઇ ગયો છે. અને પત્ર લખી દબાણ ઉભુ કરવાનો મામલો હવે જાહેર થઇ સ્થાનીક નેતાઓના હાથમાં ન રહેતા પ્રદેશ અને મોટો નેતાઓ પણ સમગ્ર મામલે તપાસ સાથે જવાબદારોને પાર્ટી ગાઇડલાઇન મુજબ ઠપકો આપી રહ્યા છે તે વચ્ચે અંજારના બગથડા યાત્રાધામ ખાતે આયોજીત સ્વચ્છતા અભિયાનમાં આ વિસ્તારના ધારાસભ્ય અને રાજ્ય સરકારના મંત્રી ત્રિક્રમ છાંગાએ પણ શહેર ભાજપ પ્રમુખ હિતેન વ્યાસના ક્લાસ લીધા હોવાનુ સુત્રોએ ઉમેર્યુ છે.અને પક્ષના આ વિસ્તારના કોઇ પણ સિનીયર આગેવાનને વિશ્વાસમાં લીધા વિના કરાયેલા પત્ર વ્યવહાર અને તેને વાયરલ કરવા મામલે રીતસરનો ત્રિક્રમ છાંગાએ જાહેરમાં ઉધડો લીધો હોવાનુ પણ ભાજપના સુત્રોએ જણાવ્યુ હતુ.જો કે જીલ્લા ભાજપ પ્રમુખે આ સમગ્ર વિવાદ અંગે કોઇ જાહેર પ્રતિક્રિયા હજુ સુધી આપી નથી.
પાલિકામાં ભ્રષ્ટાચાર છે કે પછી આ માત્ર એકબીજાને પછાડવાના અને ભાગબટાઇ અને રાજકીય નાટક છે,તે હવે તપાસનો વિષય બન્યો છે.પરંતુ પક્ષના જ જવાબદાર પદાધિકારીઓ દ્વારા એકબીજા વિરુદ્ધ ષડયંત્રો રચીને જીલ્લા કક્ષાએ ફરિયાદો કરવાના આ કિસ્સાથી અંજાર ભાજપનું આંતરિક પ્રદૂષણ જાહેરમાં આવી ગયું છે.સત્તાની લડાઈમાં પક્ષની આબરૂના ધજાગરા થતા હવે મોટા નેતાઓ આ મામલામાં ઉંડાણ પુર્વકની તપાસમાં લાગી ગયા છે. તેવામાં મામલો પ્રદેશ કક્ષા સુધી પહોંચતા જીલ્લાએ પણ કડક વલણ અપનાવ્યુ છે ત્યારે હવે અંજાર ભાજપના પ્રમુખ સહિત નેતાઓએ કરેલા પત્ર કારસ્તાનમાં કેવા પગલાં લેવાય છે તેના પર સૌની નજર મંડાયેલી છે..
