પ્રમુખના પતિની દખલગીરીની ફરીયાદથી શરૂ થયેલા વિવાદમાં અંતે કચ્છ આવેલા સંગઠન પ્રભારીએ બન્ને પક્ષોને સત્તાની લડાઈમાં પાર્ટીની ખરાબ થઇ રહેલી છબી અંગે ઠપકા સાથે કડક નિર્દેશો આપી પદમુક્ત કરવાની ગર્ભીત ચિમકી પણ ઉચ્ચારી હતી સાથે પ્રમુખ પતિને હવે એન્ટ્રી નહી..તેવી પણ ટકોર કરી
અંજાર નગરપાલિકામાં જ્યારથી ભારતીય જનતા પાર્ટી શાસિત નવી પ્રજાકીય બોડી અસ્તિત્વમાં આવી છે,ત્યારથી વિકાસકામોના બદલે આંતરિક જૂથવાદ અને વિવાદોનો મધપૂડો જાણે છંછેડાઇ ગયો છે. આ વિવાદમાં તાજેતરમાં ફૂટેલા ‘લેટર બોમ્બ’ ભાજપની આબરૂના રીતસરના ધજાગરા ઉડાડ્યા હતા.જો કે હવે સમગ્ર મામલે ભાજપનું પ્રદેશ અને જિલ્લા સંગઠન લાલચોળ બન્યું છે. પક્ષની આબરૂના ધજાગરા ઉડતા રોકવા માટે પ્રદેશ અને જિલ્લાના ટોચના આગેવાનોએ પાલિકાના એ લેટરકાંડમાં સામેલ હોદ્દેદારોને રૂબરૂ બોલાવીને આકરા શબ્દોમાં ખખડાવ્યા હોવાની વિગતો રાજકીય સુત્રોએ આપી છે.જેમાં નેતાગિરીએ સ્પષ્ટ શબ્દોમાં કડક ચેતવણી આપતા પક્ષની છબી ખરડાય તેવી એક પણ ફરિયાદ હવે બહાર આવશે,તો ગમે તેવા ચમરબંધીને પણ તાત્કાલિક ધોરણે હોદ્દા પરથી દૂર(પદમુક્ત) કરી દેવામાં આવશે તેવી સ્પષ્ટ વાત કરી હોવાનુ જાણકારોએ જણાવ્યુ છે.સાથે આગેવાનોએ તમામ હોદ્દેદારોને પોતાની અંગત લડાઈઓ બાજુ પર મૂકી માત્ર પ્રજાલક્ષી કામો પર ધ્યાન કેન્દ્રિત કરવા તાકીદ કરી છે. આ સાથે રાજ્યમંત્રી બાદ પ્રભારીએ પણ શહેર પ્રમુખને પણ આકરા શબ્દો કહ્યા છે.
શુ હતો સમગ્ર વિવાદ ?
અંજાર પાલિકામાં સંગઠન અને સત્તા વચ્ચે ચાલતા વિવાદમાં અંજાર શહેર પ્રમુખ તથા તેના ઇશારે અન્ય પાલિકાના હોદ્દેદારોએ લેટર લખી અંજાર પાલિકા પ્રમુખના પતિ ઉધરાણા અને ભષ્ટ્રાચાર કરતા હોવાની ફરીયાદ લેખીત કરી તે લેટર વાયરલ કર્યા હતા જેને લઇને આખો વિવાદ સામે આવ્યો હતો. જો કે પ્રમુખે પણ સંગઠનના એ હોદ્દેદારો દ્વારા યેનકેન પ્રકારે ઇરાદા પુર્વક હેરાન કરાતા હોવાનો ખુલ્લાસો કર્યો હતો.જો કે સમગ્ર મામલે જીલ્લા ભાજપ અને ત્યાર બાદ પ્રદેશ ભાજપમાં પહોંચતા અગ્રણીઓએ તમામના નિવેદનો સાથે વિગતો મેળવી જરૂરી સુચનો સાથે ઠપકા આપ્યા હતા.જેમાં અંજાર શહેર ભાજપ પ્રમુખને ઠપક્કો અપાયો હતો. તો તેના ઇશારે અન્ય હોદ્દેદારોએ લેટર લખ્યો હોવાની વિગતો સ્પષ્ટ થતા પ્રદેશ નેતાઓએ પણ દરમ્યાનગીરી કરી હતી.અને સમગ્ર મામલો ઉકેલાય તે માટેના પ્રયત્નો હાથ ધર્યા હતા જેમા જીલ્લાના અગ્રણી નેતાઓએ પક્ષની છબી ખરડનાર અગ્રણીઓનો જાહેરમાં પણ ઉધડો લીધો હતો.સમગ્ર કચ્છમાં આ બનાવના ઘેરા પ્રત્યાઘાત પડ્યા હતા. જો કે પડદા પાછળ ખેલ કરનાર આગેવાનો ની ભમીકા અંગે હજુ તપાસ શરૂ છે..આ સમગ્ર પ્રકરણમાં પ્રમુખ ને સ્વતંત્ર વહીવટ ન કરવા દેવા દબાણ ઊભું કરવાનું હોવાની ચર્ચા અંજાર ભાજપમાં છે….
પ્રભારી ફલજી ચૌધરીની કડક ચેતવણી
શહેર પ્રમુખની કથિત દોરી સંચારના કારણે સર્જાયેલા સમગ્ર વિવાદમાં લેટર લખનાર તમામ જવાબદારોને પાર્ટીએ આવી ગેરશિસ્ત ન કરવા માટે ટકોર કરી સ્પષ્ટ શબ્દોમાં ચેતવણી આપી હતી. સુત્રોનુ માનીએ તો ભુજમાં યોજાયેલી મોવડીમંડળની બેઠકમાં પ્રદેશના નેતાઓ સમક્ષ લેટર લખનાર નેતાઓએ પાલિકાના વહીવટમાં પ્રમુખના પતિ દ્વારા બિનજરૂરી દખલગીરી કરવામાં આવતી હોવાની ફરીયાદ કરી હતી જે બાદ પ્રમુખ પતિને પાલિકામાં બિનજરૂરી ન આવવા માટેની ટકોર કરાઇ હતી.સાથે લેટર લખી અને તે બાદ વાયરલ કરવા મામલે પાર્ટીની છબી ખરડનાર હોદ્દેદારોને પદમુક્ત કરવાની ગર્ભીત ચિમકી આપી હતી.અને વહીવટમાં વધુ દખલ ન કરી પાર્ટી ગાઈડ લાઇન મુજબ કામગીરીના નિર્દેશ આપ્યા અને તમામ પક્ષોની વાત સાંભળી જરૂરી કડક સૂચનો આપ્યા..હોવાનું રાજકીય સૂત્રએ ઉમેર્યું હતું.
એકતરફ સંગઠનના ઈશારે પાલિકા પ્રમુખને ઘેરવાની રાજરમત તો બીજી તરફ પક્ષના વરિષ્ઠ નેતાઓએ શિસ્તભંગ બદલ પદ છીનવી લેવાની કડક ચીમકી આપતા હાલ તો વિવાદ શાંત પડી ગયો છે.તેવુ રાજકીય રીતે ચર્ચાઇ રહ્યુ છે.પરંતુ સંગઠન અને સત્તાની આ લડાઈમાં હવે આગામી દિવસોમાં શુ થાય છે તેના પર સૌની નજર રહેશે જો કે સ્થાનીક નેતાઓથી લઇ પ્રદેશ દ્વારા થતી દરેક હિલચાલ હાલ શહેરમાં ટોક ઓફ ધ ટાઉન બની રહી છે.જો કે હાલ પ્રમુખ પતિ ને પાલિકામાંથી દૂર રાખવાના મનસૂબા યેનકેન પ્રકારે સફળ રહ્યા હોય તેવી ચર્ચા અંજારમાં ચોરે ને ચોકે…છે
