અંતે લાંબી લડત બાદ મુન્દ્રામાં અદાણી સામેનો વિરોધ શાંત પડ્યો !

એમટી કન્ટેનર યાર્ડ સંચાલકોની માંગ સંતોષાતા હડતાળ પૂર્ણ, અદાણી હાઉસ ખાતે સુખદ ઉકેલ ધારાસભ્ય,સ્થાનીક અગ્રણીઓ તથા અદાણીના જવાબદારો વચ્ચે બે દિવસની બેઠક સફળ રહી મુન્દ્રામાં દિવાળી જેવો માહોલ

મુન્દ્રા

મુન્દ્રા પોર્ટ ખાતે એમટી કન્ટેનર યાર્ડ બંધ કરવાના અદાણી ગ્રુપના નિર્ણય સામે છેલ્લા ૨૯ દિવસથી ચાલી રહેલું ઉગ્ર આંદોલન આખરે શુક્રવારે સુખદ અંત પામ્યું છે.અદાણી હાઉસ ખાતે આંદોલન સમિતિ અને અદાણી પ્રશાસન વચ્ચે યોજાયેલી મહત્વપૂર્ણ બેઠકમાં સમજુતી થતાં આંદોલન સમિતિ દ્વારા લડત પૂર્ણ કરવાની સત્તાવાર જાહેરાત કરવામાં આવી હતી.અદાણી કંપની દ્વારા પોતાની ટ્રેડ એડવાઈઝરી પાછી ખેંચી લેવામાં આવતા સ્થાનિક વેપારીઓ, ટ્રાન્સપોર્ટર્સ અને મજૂરોમાં ખુશીની લહેર ફરી વળી હતી અને મુન્દ્રામા ઠેરઠેર ઉજવણીના દ્રશ્યો સર્જાયા હતા. અદાણી પોર્ટ દ્વારા ૧ સપ્ટેમ્બરથી બહારના કન્ટેનર યાર્ડના કોડ બંધ (ફ્રીઝ) કરવાનો નિર્ણય લેવામાં આવ્યો હતો.જેને પગલે ૨૮મી ઓગષ્ટથી જ એમટી કન્ટેનર યાર્ડ એસોસિએશન દ્વારા ધરણા કાર્યક્રમ શરૂ કરવામાં આવ્યા હતા.સ્થાનિકો અને એસોસિએશનનો આક્ષેપ હતો કે એમ્પ્ટી પાર્ક બંધ કરવાના આ નિર્ણયથી આશરે ૫,૦૦૦ જેટલા પરિવારોની રોજી-રોટી છીનવાઈ જવાની નોબત આવી હતી.છેલ્લા ૨૬થી વધુ દિવસોની સતત લડત છતાં ઉકેલ ન આવતા આંદોલન વધુ આક્રમક બન્યું હતું.આ મુદ્દે તાજેતરમાં ૨૧મી સપ્ટેમ્બરથી નવ જેટલા સભ્યોએ આમરણ ભૂખ હડતાળ આદરી હતી.આ ઉપરાંત,લડતને વ્યાપક બનાવવા માટે ભુજપુર અને ઝરપરા સહિત મુન્દ્રા આસપાસના વિવિધ ગ્રામ્ય વિસ્તારોમાં જનસભાઓ યોજી લોકસમર્થન મેળવવા માટે જનજાગૃતિ અભિયાન પણ શરૂ કરવામાં આવ્યું હતું. આ લડતની વિશેષતા એ રહી હતી કે પક્ષ-વિપક્ષના રાજકારણને બાજુએ મૂકી કોંગ્રેસ અને ભાજપના સ્થાનિક અગ્રણીઓ પણ એકમંચ પર આવીને સ્થાનિકોના હક અને આજીવિકા માટે મેદાનમાં ઉતર્યા હતા.સમગ્ર મામલે મુખ્યમંત્રી સુધી પણ રજૂઆતો કરવામાં આવી હતી.આંદોલન સમિતિના પ્રતિનિધિઓએ આ સફળતાને મજૂરો, ટ્રાન્સપોર્ટર્સ અને નાના ઉદ્યોગોની સંયુક્ત જીત ગણાવી હતી.તેણે જણાવ્યું હતું કે,આ ૨૯ દિવસની સતત લડાઈ,એકતા અને અડગ નિશ્ચય પરિણામ છે.આ જીત એ સાબિતી છે કે જ્યારે સંગઠિત થઈને પોતાના હક માટે લડવામાં આવે ત્યારે મોટામાં મોટી સત્તાએ પણ નમતું જોખવું પડે છે. શુક્રવારે યોજાયેલી બેઠકમાં સકારાત્મક ચર્ચા બાદ અદાણી પ્રશાસને પોતાની વિવાદિત એડવાઈઝરી પર પુનઃવિચાર કરી નિર્ણય પાછો ખેંચતા આ વિસ્તારના હજારો કામદારો અને નાના વેપારીઓના ધંધા-રોજગાર પુનઃ પાટા પર ફરશે.

જીગર છેડાએ ભજવી મહત્વની ભૂમિકા

લાંબા સમયથી ચાલતા આ વિવાદમાં ધરણા,રેલી સુત્રોચ્ચાર સહિત રસ્તારોકો આંદોલન સહિતના કાર્યક્રમો આપ્યા હતા દરમ્યાન મામલો મુખ્યમંત્રી સહિત ગાંધીનગર સુધી પહોંચ્યો હતો. જો કે તેનો ઉકેલ ન આવતા ભૂખ હડતાળ શરૂ થઈ હતી દરમ્યાન ૨ દિવસ સુધી અદાણી અને એસોસિએશન વચ્ચે બેઠકોનો દોર શરૂ થયો હતો જેમાં મહત્વની ભૂમિકા પૂર્વ જીગર તારાચંદ છેડાએ ભજવી હતી. અને જે બાદ અદાણી ગ્રુપ સકારાત્મક રહ્યું હતું. નિર્ણય જાહેર થયા બાદ મુન્દ્રામાં ઉજવણી જેવો માહોલ સર્જાયો હતો દરમ્યાન આગેવાનો એ જાહેર મંચ પરથી સ્વ તારાચંદ છેડા ને યાદ કર્યા હતા. અને ગૌચર જમીનમાં જે રીતે તેમણે અગાઉની લડાઈમાં લોકો માટે કામ કર્યા હતા તે રીતે હજારો લોકોની રોજગારીનો પ્રશ્ન ઉકેલવામાં જીગર છેડાએ મહત્વની ભૂમિકા ભજવી હતી. જેનો જાહેર મંચ પરથી લોકોએ આભાર માન્યો હતો. આ સાથે ધારાસભ્ય સહિત સ્થાનિક આગવાનો પણ રજૂવાત અને સમાધાનમાં સક્રિય રહ્યા હતા.

અદાણી જેવા મોટા સમૂહ સામે શરૂ થયેલા વિવાદમાં અદાણી મક્કમ રીતે તેના નિર્ણય તરફ આગળ વધી રહ્યું હતું પરંતુ સામાજિક રાજકીય આગવાનોની મધ્યથી કામે લાગી હતી અને ભવિષ્યમાં મોટા વિરોધની સંભાવના ને ધ્યાને રાખી અંતમાં મામલાનો સુખદ અંત આવ્યો છે. જે સ્થાનિક લોકોની મોટી જીત છે…કેમકે કચ્છ અને દેશમાં આવા અનેક વિરોધો છતાં અદાણીએ તેના નિશ્ચિત પ્રોજેક્ટ પૂર્ણ કર્યા છે તે જગજાહેર છે…..