​લખપતના છેરમાં શ્રી સિમેન્ટ સામેની ૩૫ દિવસની હડતાળનો અંત..!

શ્રી સિમેન્ટ કંપની અને ગ્રામજનો વચ્ચે સંતોષકારક સમાધાન,ગૌમાતા માટે પ્રતિ માસ ૧ ટ્રક (૧૫ ટન) ઘાસચારો આપવા કંપનીની લેખિત ખાતરી,શાળામાં RO પ્લાન્ટ અને ગામની સફાઈ માટે પણ TRF વિભાગ કાર્યવાહી કરશે જો કે મુન્દ્રામાં અદાણી સામે કર્મચારીનો વિરોધ યથાવત
​લખપત
કચ્છ જિલ્લાના લખપત તાલુકાના મોટી છેર ગામમાં છેલ્લા ૩૫ દિવસથી ચાલી રહેલી હડતાળ અને રજૂઆતોનો અંતે સુખદ અને સંતોષકારક ઉકેલ આવ્યો છે. છેર મોટી યુવા વિકાસ સમિતિ અને ગ્રામજનો દ્વારા શ્રી સિમેન્ટ કંપની સમક્ષ ગૌમાતાના ઘાસચારા તથા ગામના વિકાસના પ્રશ્નો અંગે સતત માંગણી કરવામાં આવી રહી હતી,જેનો કંપની મેનેજમેન્ટ અને ગામના અગ્રણીઓની ઉપસ્થિતિમાં સફળતાપૂર્વક નિકાલ કરવામાં આવ્યો હતો.શ્રી સિમેન્ટ કંપની દ્વારા ગામના પશુધનના કલ્યાણ અર્થે મોટી છેર ગામમાં ગૌશાળા નિર્માણ તથા પશુઓ માટે ઘાસચારા અંગે લેખિત સહયોગ પત્ર પાઠવવામાં આવ્યો છે.કંપનીની નીતિ અને વાર્ષિક યોજના અનુસાર,ગૌશાળા નિર્માણ માટે ગ્રામ પંચાયત દ્વારા યોગ્ય જમીન ફાળવવામાં આવ્યા બાદ,અછત કે અપૂરતા વરસાદના સમયમાં પશુપાલકો માટે દર મહિને ૧ ટ્રક (અંદાજિત ૧૫ ટન) ઘાસચારાની વ્યવસ્થા કરી આપવામાં આવશે. સાથે આ બેઠકમાં ગૌચારા ઉપરાંત ગ્રામજનોની અન્ય પ્રાથમિક સુવિધાઓ અંગે પણ સકારાત્મક નિર્ણય લેવાયો છે.ગામની સફાઈના પ્રશ્નનું કાયમી નિરાકરણ લાવવા અને સ્થાનિક શાળામાં વિદ્યાર્થીઓ માટે શુદ્ધ પીવાના પાણી માટે RO પ્લાન્ટ ઉપલબ્ધ કરાવવા શ્રી સિમેન્ટ કંપનીના TRF વિભાગ દ્વારા જરૂરી કાર્યવાહી કરવામાં આવશે.​આ સમાધાન બેઠકમાં શ્રી સિમેન્ટ કંપનીના મેનેજમેન્ટ વતી અનિલ મોરી,વિનોદ શર્મા, HR લીડ ગોવિંદ મહારાજ તથા CSR લીડ ધર્મેન્દ્ર પરમાર હાજર રહ્યા હતા.જ્યારે છેર મોટી યુવા વિકાસ સમિતિ અને ગ્રામજનો તરફથી રાઠોડ હટુભા કરશનજી, જશુભા સોઢા,તખુભા સોઢા,સોભરાજજી સોઢા,કૃપાલસિંહ સોઢા,દિલીપસિંહ રાઠોડ,પૃથ્વીરાજજી સોઢા,ભૂપતસિંહ સોઢા સહિતના અગ્રણીઓ અને ગ્રામજનો મોટી સંખ્યામાં ઉપસ્થિત રહ્યા હતા.છેર મોટી યુવા વિકાસ સમિતિના હોદ્દેદારોએ જણાવ્યું હતું કે, છેલ્લા ૩૫ દિવસથી ચાલી રહેલી લડતમાં દરેક ગ્રામજન અને યુવાનોએ એકતા બતાવી હતી.યુવા શક્તિ અને સંગઠનની તાકાતના પરિણામે આજે ગૌમાતાના હિતમાં કાયમી ધોરણે નિરાકરણ આવ્યું છે. કંપનીના હકારાત્મક વલણ બદલ સમગ્ર ગ્રામજનો અને સમિતિ દ્વારા શ્રી સિમેન્ટ કંપનીના મેનેજમેન્ટનો આભાર વ્યક્ત કરવામાં આવ્યો હતો.

અદાણી પાવર (મુન્દ્રા) સામે ધરણા ૯મા દિવસે યથાવત

આ તરફ અદાણી પાવર (મુન્દ્રા) કર્મચારી સંઘના બેનર હેઠળ કર્મચારીઓ દ્વારા પોતાના મૂળભૂત અધિકારો અને અન્યાયી બદલી તથા આઉટસોર્સિંગના મુદ્દાઓ સામે શરૂ કરાયેલા શાંતિપૂર્ણ ધરણા ૯મા દિવસે પણ ચાલુ રહ્યા..મેનેજમેન્ટ દ્વારા કર્મચારી પ્રતિનિધિઓ સાથે ચર્ચા યોજવામાં આવી હતી,પરંતુ કંપની મેનેજમેન્ટ કર્મચારીઓના મૂળભૂત અને વ્યાજબી પ્રશ્નો અંગે કોઈપણ પ્રકારનો સકારાત્મક જવાબ આપવા તૈયાર નથી.અને કર્મચારીઓની માંગણીઓને ફગાવી દેવામાં આવી રહી છે.કંપનીના આ અસંવેદનશીલ અને નકારાત્મક વલણના કારણે કર્મચારીઓમાં ભારે રોષ વ્યાપેલો છે.કર્મચારી સંઘે સ્પષ્ટ શબ્દોમાં જણાવ્યું છે કે,અમે કંપની માટે અમારું લોહી-પસીનો એક કર્યો છે.જ્યાં સુધી કંપની કર્મચારીઓના હિતમાં સકારાત્મક નિર્ણય નહીં લે,ત્યાં સુધી આ ન્યાયિક લડત ગાંધીચિંધ્યા માર્ગે ચાલુ રહેશે.

કચ્છમાં સ્થાનીક કંપનીઓ સામેનો લોકોનો રોષ કોઇ નવી વાત નથી. તાજેતરમાંજ કન્ટેનર યાર્ડના મુદ્દે પણ અદાણી સામે વિરોધમાં લોકો ઉતર્યા હતા. અને લડત બાદ તેનો સુખદ અંત આવ્યો હતો તો છેરમાં સિમેન્ટ કંપની સામેની લડાઇમાં પણ સ્થાનીકોની જીત થઇ છે.ત્યારે હવે મુન્દ્રા અદાણીનો પ્રશ્નના ઉકેલની પણ આશા છે.લોકો ઇચ્છી રહ્યા છે. કે સ્થાનીક લોકોના પ્રશ્નો સાંભળી કચ્છમાંથી કમાતી કંપનીઓ સ્થાનીક હિતોને પ્રાધાન્ય આપે….