સરકારી જમીન બીકેટી કંપનીને સોંપવા સામે ગ્રામજનોમાં ઉગ્ર આક્રોશ !

ભુજના પધ્ધર ગામની સરકારી જમીન બીકેટી કંપનીને સોંપવા સામે ગ્રામજનોનો આક્રોશ: કલેક્ટર કચેરીએ આવેદનપત્ર પાઠવી વિરોધ નોંધાવ્યો વડીલોપાર્જિત જમીન અને જાહેર રસ્તાઓ પચાવી પાડવાના આરોપ સાથે ૨૭૭થી વધુ ખેડૂતોએ સંયુક્ત સહીઓ સાથે મુખ્યમંત્રી અને કલેક્ટર સમક્ષ કાયદેસરના હક્કની માંગ કરી
ભુજ
ભુજ તાલુકામાં આવેલા પધ્ધર ગામના અંકિત ૨૭૭થી વધુ ગ્રામજનો અને ખેડૂતો દ્વારા પોતાની આજીવિકા તેમજ ગામની ખેતીલાયક જમીનો બચાવવા માટે જિલ્લા કલેક્ટર કચેરી ખાતે એક વિસ્તૃત આવેદનપત્ર પાઠવવામાં આવ્યું હતુ.ગામમાં આવેલી શ્રી સરકાર/સરકારી ખેતીલાયક જમીનો ખાનગી કંપની ‘બાલકૃષ્ણ ઇન્ડસ્ટ્રીઝ’ (BKT)ને ફાળવવા કે સંપાદિત કરવા સામે ખેડૂતોએ ભારે રોષ વ્યક્ત કર્યો છે અને આ પ્રક્રિયા તાત્કાલિક ધોરણે રોકવા માંગ કરી છે.આવેદનપત્રમાં પધ્ધરના ગ્રામજનોએ જણાવ્યું છે કે,તેમનું ગામ મુખ્યત્વે ખેતીપ્રધાન છે અને મોટાભાગના પરિવારો પિયત તથા વરસાદ આધારિત ખેતી કરીને જ પોતાનું અને પરિવારનું ગુજરાન ચલાવે છે.BKT ખાનગી કંપનીની આજુબાજુમાં આવેલી જમીનો સ્થાનિક ખેડૂતો દ્વારા વર્ષો અને વડીલોના સમયથી ખેડવામાં આવી રહી છે.ખેડૂતોએ સ્પષ્ટતા કરી છે કે ભૂતકાળમાં સરકાર દ્વારા જ્યારે જમીન ફાળવણીની પ્રક્રિયાઓ હાથ ધરાઈ હતી,ત્યારે સ્થાનિક ખેડૂત પરિવારો અભણ,સામાન્ય અને આર્થિક રીતે અત્યંત નબળી સ્થિતિ ધરાવતા હતા.પ્રીમિયમની જરૂરી રકમ,સરકારી ફી તથા પ્રક્રિયાત્મક ખર્ચ વહન કરવાની ક્ષમતા ન હોવાને કારણે તેઓ આ જમીનો કાયદેસર રીતે પોતાના નામે મેળવી શક્યા નહોતા.જેના કારણે રેવન્યુ રેકોર્ડ પર આ જમીનો ‘શ્રી સરકાર’ બોલે છે,પરંતુ વાસ્તવિક કબજો અને ખેડાણ ગામના ખેડૂતોનું જ છે.પધ્ધરના ગ્રામજનોએ કલેક્ટર સમક્ષ નમ્ર પરંતુ દ્રઢ માંગ કરી છે કે,તેમની આર્થિક નબળાઈને ધ્યાનમાં રાખીને વડીલોના સમયથી ખેડાણ હેઠળની આ સરકારી જમીનો અંગે સ્થાનિક ખેડૂતોને જ યોગ્ય કાયદેસર હક અને ફાળવણીની પ્રથમ તક આપવામાં આવે.આ આવેદનપત્રની નકલો યોગ્ય કાર્યવાહી અર્થે ગાંધીનગર ખાતે મુખ્યમંત્રી કાર્યાલય,મહેસૂલ મંત્રી,કૃષિ મંત્રી તેમજ સ્થાનિક કક્ષાએ મામલતદાર ભુજ, DILR કચેરી, પધ્ધર ગ્રામ પંચાયત અને ભારતીય કિસાન સંઘ (ભુજ-કચ્છ)ને પણ મોકલી આપવામાં આવી હતી.તો કલેકટર સમક્ષ રજુઆત દરમ્યાન મોટી સંખ્યામાં લોકો જોડાયા હતા.

કંપની પર રસ્તા પચાવી પાડવાના ગંભીર આરોપો

આવેદનપત્રમાં ખેડૂતોએ BKT કંપની સામે ગંભીર આક્ષેપો મૂક્યા છે: જેમાં કંપની દ્વારા સરકારમાં ખોટી-સાચી રજૂઆતો કરી,પોતાને અનુકૂળ પંચનામા કરાવીને સરકારી જમીન પોતાના નામે સંપાદન કરવાની તજવીજ હાથ ધરવામાં આવી રહી છે.સાથે ભૂતકાળમાં પણ આ કંપની દ્વારા ખેડૂતોના ખેતરે જવાના માર્ગો પર દબાણ કરી રસ્તાઓ પચાવી પાડવામાં આવ્યા હતા.જેના કારણે ખેડૂતોને જમીન વેચવા મજબૂર થવું પડ્યું હતું.સાથે પધ્ધરથી વડવાળા તરફ જતા જાહેર રાજમાર્ગ તેમજ ઉપયોગી વિસ્તાર પર દબાણ કરવામાં આવ્યું છે અને વરસાદી પાણીના કુદરતી વોકડા પણ બંધ કરી દેવાયા છે.

નાના ખેડૂતોની રોજગારી છીનવાઈ જવાની ભીતિ

ખેડૂતોએ રજૂઆત કરતા જણાવ્યું કે,આ જમીનો માત્ર સંપત્તિ નથી પરંતુ તેમના પરિવારની રોજીરોટી,પશુપાલન અને આવનારી પેઢીના જીવનનિર્વાહનો મુખ્ય આધાર છે.જો આ સરકારી ખેતીલાયક જમીનો માત્ર નાણાકીય ક્ષમતા ધરાવતી મોટી ઔદ્યોગિક કંપનીઓને સોંપી દેવામાં આવશે,તો ગામના નાના અને ગરીબ ખેડૂતો પોતાના આજીવિકાના સાધનથી વંચિત થઈ જશે અને મોટું આર્થિક નુકસાન વેઠવાનો વારો આવશે.જો કે ખેડુતોના પ્રશ્ને સમગ્ર ગામે એક થઇને તેને સમર્થન આપ્યુ છે.

બીકેટી કંપનીને જમીન ફાળવવા માટેની પેરવી થતા ગ્રામજનોએ ઉગ્ર વિરોધ નોંધાવ્યો છે.અને સ્થાનીક તંત્રથી લઇ ગાંધીનગર સુધી આ મામલે રજુઆત કરી છે.સાથે ચિમકી પણ ઉચ્ચારી છે.કે યોગ્ય કાર્યવાહી નહી થાય તો ગ્રામજનો આ મુદ્દે લડત કરશે.જો કે હવે જોવુ અગત્યનુ રહેશે કે ખેડુતોના વિરોધ છંતા તંત્ર આ મામલે શુ કાર્યવાહી કરે છે?કે પછી ખેડુતોને પોતાના હક્ક માટે લડત કરવી પડશે..