મુંદ્રામાં અદાણી MPL કંપની પરિસરમાં અફવાથી તોડફોડ-પથ્થરમારો !

અકસ્માતમાં શ્રમિક ગંભીર રીતે ઘાયલ થયા બાદ તેના મૃત્યુના સમાચારની અફવાથી રોષે ભરાયેલા 5000 થી વધુ લોકોએ અદાણીની બસોમાં તોડફોડ કરી જો કે પોલીસે ચુસ્ત બંદોબસ્ત ગોઠવી સ્થિતી કાબુમાં લીધી થોડા સમય માટે મોટી સંખ્યામા કામદારો એકઠા થઇ જતા એક ભારેલા અગ્ની જેવી સ્થિતી સર્જાઇ સ્થાનીક પોલીસે મામલો થાડે પાડ્યો

કચ્છમાં ઓદ્યોગીક વિકાસની સાથે-સાથે કંપનીઓમાં અકસ્માત સહિતના બનાવોને કારણે છાસવારે ગંભીર સ્થિતીનુ નિર્માણ થાય છે.તેવામાં મુન્દ્રામાં આવાજ એક બનાવ બાદ ભારે અફરાતફરી સર્જાઇ હતી.મુન્દ્રા પોર્ટમાં આવેલી MPL કંપની પરિસરમાં ચાલુ બસમાં ચડવા જતાં એક શ્રમિક ગઇકાલે ગંભીર રીતે ઘાયલ થયો હતો. અને આજે સવારે તેને લઇનેજ પરિસ્થિતિ તંગ બની હતી.અકસ્માતની જાણ થતાં જ મોટી સંખ્યામાં એકઠા થયેલા શ્રમિકો અને કર્મચારીઓએ કંપની પરિસરમાં ઉગ્ર વિરોધ નોંધાવી પથ્થરમારો કર્યો હતો,જેમાં કેટલાક વાહનોને નુકસાન પહોંચ્યું હતું.ઘટનાની ગંભીરતાને ધ્યાને લઈ સ્થાનિક પોલીસનો કાફલો સ્થળ પર દોડી ગયો હતો અને કંપની પરિસરમાં ચુસ્ત બંદોબસ્ત ગોઠવી પરિસ્થિતિ કાબૂમાં લીધી હતી.MPL કંપનીમાં કોન્ટ્રાક્ટર તરીકે કામગીરી કરતી ‘ફેબટેક’ કંપનીના એક કર્મચારી રમેશ ગઈકાલે સાંજે ચાલુ બસમાં સવાર થવાનો પ્રયાસ કરી રહ્યા હતો.આ દરમિયાન અકસ્માત સર્જાતાં કર્મચારીને ગંભીર ઈજાઓ પહોંચી હતી.બનાવ અંગે તાત્કાલિક જાણ કરી ઈજાગ્રસ્ત શ્રમિકને હોસ્પિટલ ખસેડવામાં આવ્યા હતા.જ્યાં તબીબી તપાસ બાદ તાત્કાલિક સફળ ઓપરેશન કરવામાં આવ્યું હતું.હાલ શ્રમિકની હાલત સ્થિર છે અને તે હોસ્પિટલમાં તબીબી દેખરેખ હેઠળ છે.અકસ્માતની આ ઘટનાની જાણ થતાં જ કંપનીમાં કામ કરતા અન્ય શ્રમિકોમાં ભારે રોષ ફેલાયો હતો.મોટી સંખ્યામાં શ્રમિકો એકઠા થઈ ગયા હતા અને સુરક્ષા તેમજ વ્યવસ્થા સામે વિરોધ દર્શાવ્યો હતો.આ વિરોધ દરમિયાન મામલો વધુ બિચકતાં પથ્થરમારો શરૂ થયો હતો.આ દરમિયાન પરિસરમાં ઊભેલા કેટલાક વાહનોમાં તોડફોડ થતાં વાહનોને નુકસાન પહોંચ્યું હતું,જેના કારણે પરિસરમાં અફરાતફરી સાથે તંગદિલીનો માહોલ સર્જાયો હતો.ઘટના અંગે જાણ થતાં જ પોલીસનો મોટો કાફલો ઘટનાસ્થળે પહોંચી ગયો હતો.અને કોઈ અનિચ્છનીય બનાવ ન બને તે માટે સમગ્ર કંપની પરિસર અને આસપાસના વિસ્તારમાં પોલીસ બંદોબસ્ત ખડકી દેવામાં આવ્યો હતો.અને સ્થિતિ સંપૂર્ણપણે નિયંત્રણ હેઠળ લવાઇ હતી.અને પોલીસ ઘટના પર સતત નજર રાખી રહી છે.

એક અફવા અને મુન્દ્રા પોર્ટમાં સ્થિતી તંગ બની

સમગ્ર મામલામાં એક અફવાથી સમગ્ર સ્થિતીનુ નિર્માણ થયુ હતુ. ઇજાગ્રસ્ત કામદારના મોત અને તેનો મૃત્દેહ આપવાનો ઇન્કાર કરી સમગ્ર મામલો દબાવવા માટે પ્રય્તનો અંગે અફવા ફેલાયા બાદ આ સ્થિતીનુ નિર્માણ થયુ હતુ. અને સવારે 9 વાગ્યાથી કામદારોની ભીડ એકઠી થઇ હતી. જે જોતજોતામાં 5000 ઉપર પહોંચી હતી.જો કે પોલીસે અફવાઓ તરફ ધ્યાન ન આપી કામદરોને પાછા મોકલ્યા હતા.અને ખોટી અફવાઓ ન ફેલાવવા પણ કહ્યુ હતુ. અગ્રણીઓ સાથે પોલીસે વિડીયો કોલ મારફતે કામદાર જીવતો હોવાની પણ ખાતરી કરાવી સમજાવતા થોડા કલાકોમાં સ્થિતી કાબુમાં આવી ગઇ હતી.જો કે તોડફોડ સહિતના મામલે વધુ તપાસ શરૂ કરાઇ છે. જો કે કંપની ટોળાના તોફાની તત્વો સામે કાર્યવાહી માટે હજુ આગળ આવી નથી.તેથી આ મામલે કોઇ ફરીયાદ થઇ નથી બનાવ બાદ પોલીસના ઉચ્ચ અધિકારીઓ પણ સ્થળ પર પહોચ્યા હતા.

મુન્દ્રામાં વિસ્તારમાં તાજેતરમાં ઉદ્યોગો સામેનો રોષ વધી રહ્યો છે. તેવામાં પોલીસ માટે પણ કાયદો વ્યવસ્થાની સ્થિતી એક પડકાર બની છે. જો કે સમગ્ર ધટના અંગે મુન્દ્રાના પોલીસ ઇન્સપેક્ટર શકોરીયાએ અફવાના કારણે સ્થિતી નિર્માણ થઇ હોવાનુ કહી કામદારોને આવી ધટના સમયે અફવા પર ધ્યાન ન આપવા પણ ટકોર કરી સ્થિતી સંપુર્ણ કાબુમાં હોવાનુ ઉમેર્યુ હતુ.