નવરાત્રિના નામે નગદ નાણાંની લાલચ પણ…આયોજકો માતાજીને જ ભૂલી ગયા!

ભુજમાં નવરાત્રિના પ્રચાર બેનરોમાં માતાજીની જ બાદબાકીથી ભક્તોમાં કચવાટ કલાકારોના મોટા ફોટા વચ્ચે માતાજીની તસવીર કે મહિમાનો ઉલ્લેખ ન હોવા અંગે જાગૃત નાગરિકોએ સવાલો ઉઠાવ્યા

ભુજ: દર વર્ષે વિવિધ મુદ્દાઓને લઈને ચર્ચામાં રહેતી ભુજની કોમર્શિયલ નવરાત્રીઓ આ વર્ષે પણ ચર્ચામાં આવી છે. ભુજમાં લાગેલા બે કોમર્શિયલ નવરાત્રિના પ્રચાર બેનરોમાં માતાજીની તસવીર કે તેમના મહિમાનો ઉલ્લેખ જોવા ન મળતાં જાગૃત નાગરિકોમાં ચર્ચા શરૂ થઈ છે. અગાઉ પણ આવા નવરાત્રિના આયોજકો સામે જાગૃત નાગરિકોએ અનેક સવાલ ઉઠાવ્યા છે તેવામાં આ વખતે પ્રચાર બેનરમાં માતાજીને સ્થાન ન મળતા સવાલો ઉઠ્યા છે.

કલાકારોને પ્રાધાન્ય પણ માં આધ્યશક્તિ નહીં 

ભુજના જ્યુબિલી ગ્રાઉન્ડ નજીક લાગેલા શિવાલિકા અને વિલા નામની નવરાત્રીઓના પ્રચાર બેનરોમાં સ્થાનિક તેમજ બહારથી આવતા કલાકારોના મોટા ફોટા જોવા મળી રહ્યા છે. જોકે, નવરાત્રિ જેની આરાધનાનું પર્વ છે તે માતાજીની તસવીર બેનરમાં જોવા ન મળતાં કેટલાક નાગરિકોએ આ અંગે સવાલો ઉઠાવ્યા છે.

કોમર્શિયલ નવરાત્રિના આયોજનોમાં વધારો

કચ્છમાં છેલ્લા કેટલાક વર્ષોમાં પરંપરાગત શેરી ગરબા ઉપરાંત કોમર્શિયલ નવરાત્રિના આયોજનોમાં પણ વધારો થયો છે. ઊંચી ટિકિટ હોવા છતાં વિવિધ કારણોસર લોકો આવા આયોજનોમાં ભાગ લેતા હોય છે. બીજી તરફ કેટલાક સમાજો અને સંગઠનો દ્વારા પરંપરાગત રીતે પોતાના સમાજ પૂરતી નવરાત્રિના આયોજનની શરૂઆત પણ કરવામાં આવી છે.

અગાઉ પણ વિવિધ મુદ્દે વિરોધ પણ…

કોમર્શિયલ નવરાત્રિના આયોજનને લઈને અગાઉ પણ વિવિધ મુદ્દે વિરોધ અને ચર્ચા થઈ છે. ક્યાંક કલાકારોની પસંદગી, ક્યાંક ટિકિટના દરો તો ક્યાંક આયોજનની પદ્ધતિને લઈને સવાલો ઉઠ્યા છે. તાજેતરમાં પ્રમુખ સ્વામી નગરમાં યોજાયેલી નવરાત્રિમાં કલાકારની પસંદગીને લઈને પણ હિન્દુ આગેવાનો દ્વારા વિરોધ કરવામાં આવ્યો હતો.પરંતુ વિવાદો વચ્ચે મક્કમ રીતે કોમર્શિયલ નવરાત્રિના આયોજકો તેને સફળ રીતે આયોજિત કરે છે…

સોશિયલ મીડિયા કે બેનરમાં તસવીર નહીં

દરમિયાન,શિવાલિકા ગ્રુપ દ્વારા પોતાના સોશિયલ મીડિયા પેજ પર માતાજીના મહિમાને દર્શાવતા વીડિયો પણ મૂકવામાં આવ્યા હોવાનું જાણવા મળે છે. જોકે,જાહેર સ્થળોએ લગાવવામાં આવેલા પ્રચાર બેનરોમાં માતાજીની તસવીર કે મહિમાનો ઉલ્લેખ જોવા ન મળતાં આ મુદ્દો ચર્ચામાં આવ્યો છે. તો વિલા ગ્રુપ દ્વારા તો જાણે નવરાત્રી એવું લખ્યું છે પરંતુ માતાજીને લગતું કોઈ લખાણ બેનરમાં કે તેના સોશિયલ મીડિયા ગ્રુપમાં જોવા મળી નથી રહ્યું…

‘નવરાત્રિમાં માતાજીને પણ સ્થાન મળવું જોઈએ’

જાગૃત નાગરિકોનું કહેવું છે કે નવરાત્રિ ભક્તિ અને આરાધનાનું પર્વ હોવાથી તેના પ્રચારમાં પણ માતાજીને યોગ્ય સ્થાન મળવું જોઈએ. કલાકારોને પ્રાધાન્ય આપતા પ્રચાર બેનરોમાં માતાજીની ગેરહાજરી અંગે આયોજકોએ પણ ધ્યાન આપવું જોઈએ તેવી માંગ ઉઠી છે.

કચ્છમાં દર વર્ષે કોમર્શિયલ નવરાત્રિના આયોજનને લઈને વિવિધ પ્રકારની ચર્ચાઓ અને વિરોધ થતા રહે છે. હવે આ વખતે પ્રચાર બેનરોમાં માતાજીની તસવીર ન હોવાનો મુદ્દો ચર્ચામાં આવ્યો છે. ત્યારે આગામી દિવસોમાં આયોજકો આ અંગે શું વલણ અપનાવે છે તે જોવાનું રહેશે.જો કે આ સિવાય પ્રિ નવરાત્રિના આયોજનમાં મંજૂરીને લઈને પણ અનેક સવાલો ઊભા થયા છે જેનો વિગતવાર અહેવાલ હવે પછીના અંકમાં પ્રકાશિત કરશું….