હવે…કચ્છ યુનિવર્સિટીમાં તળાવ ખોદકામ,ખનીજ ચોરી મામલે તપાસની માંગ !

યુનિવર્સિટીના કુલપતિ,કુલસચિવ સહિત જવાબદારો સામે ગુનો નોંધવા રાજ્યપાલને કરાઈ રજૂઆત,અગાઉ ભરતી પ્રક્રિયા,ગેરરીતી,ભષ્ટ્રાચાર સહિતના ગંભીર આક્ષેપો વચ્ચે નવી ફરીયાદ ખાણખનીજ,યુનિવર્સીટી અને સિંચાઇ વિભાગ સામે તપાસની માંગ સાથે રાજ્યપાલને લેખીત રજુઆત
—-
ભુજ તા.૯
અગાઉ નિમણુંક,અને ગેરરીતી જેવી અનેક બાબતોમાં અવાર નવાર વિવાદમાં આવતી કચ્છ યુનિવર્સિટી સામે ફરી એક નવો અલગ પ્રકારનો જ વિવાદ જાગ્યો છે..સુજલામ સુફલામ જળ અભિયાન-૨૦૨૬ અંતર્ગત ભુજના મુંદરા રોડ સ્થિત કચ્છ યુનિવર્સિટીના શૈક્ષણિક સંકુલમાં તળાવ ખોદકામના કામમાં ગેરરીતિ,ખનીજ ચોરી અને ૩૦ લાખથી વધુની નાણાંકીય ઉચાપત થઈ હોવાના આક્ષેપ સાથે સામાજિક અગ્રણી ડો.રમેશ.એલ.ગરવાએ રાજ્યપાલ સહિત શિક્ષણ વિભાગના ઉચ્ચ અધિકારીઓને વિગતવાર લેખિત રજૂઆત કરી છે.તેણે યુનિવર્સિટીના કુલપતિ ડો.મોહન પટેલ, કુલસચિવ ડો.અનિલ ગોર સહિત જવાબદારો સામે ગુનો નોંધવા અને સમગ્ર મામલાની તપાસ કરવાની માંગ કરતી રજૂઆતમાં જણાવ્યું છે કે,જળસિંચન વિભાગ દ્વારા કચ્છ જલધારા સેવા સંઘને યુનિવર્સિટી સંકુલમાં તળાવ ઊંડું કરવાનું કામ સોંપવામાં આવ્યું હતું, શૈક્ષણિક હેતુ માટે ફાળવાયેલી જમીન પર જરૂરી મંજૂરી વિના ખોદકામ કરાયું હોવાનો આક્ષેપ કરતાં રમેશ ગરવાએ જણાવ્યું છે કે,કુલપતિની ભલામણથી તેમના સમાજના લાગતા વળગતા લોકોની સંસ્થાને આ કામ અપાયું હતું.તળાવ ખોદકામ માટે સંસ્થાને સત્તાવાર વર્ક ઓર્ડર અપાયો હોવા છતાં ડીઝલ,જેસીબી અને અન્ય વાહનોનાં ભાડાં તથા મજૂરોના પગાર પેટે યુનિવર્સિટીના સ્વભંડોળમાંથી અંદાજે ૩૦ થી ૩૫ લાખ રૂપિયા ચૂકવાયા છે.જે નિયમ મુજબ આ ખર્ચ વર્ક ઓર્ડર મેળવનાર સંસ્થાએ ભોગવવાનો હોય છે,છતાં યુનિવર્સિટીના નાણાંમાંથી ચુકવણી કરાઈ હોવાનું જણાવી તેને સ્પષ્ટ નાણાંકીય ગેરરીતિ ગણાવી આ બાબતે તપાસની અને જવાબદારો સામે ગુનો નોંધવા માંગણી કરાઈ છે.જળસિંચન વિભાગના વર્ક ઓર્ડરમાં અંદાજે ૧૦ હજાર ઘનમીટર ખોદકામ કરવાનું દર્શાવવામાં આવેલ,જ્યારે સ્થળ પર આશરે ૭૦ હજાર ઘનમીટર માટીનું ખોદકામ કરવામાં આવ્યું હોવાનું અને આ માટીનું બારોબાર વેચાણ ખાણ-ખનીજ વિભાગની મંજૂરી અને રોયલ્ટી વિના કરી સરકારી તિજોરીને નુકસાન પહોંચાડવામાં આવ્યું હોવાનો ડૉ.ગરવાએ તેમની રજૂઆતમાં આક્ષેપ કર્યો છે.યુનિવર્સિટીને શૈક્ષણિક હેતુ માટે ફાળવાયેલી અંદાજે પાંચથી આઠ એકર જમીન પર મંજૂરી વિના ગેરકાયદે ખોદકામ કરવાથી ભવિષ્યમાં શૈક્ષણિક પ્રવૃત્તિઓ માટે તેનો ઉપયોગ અવરોધાઈ શકે છે.તેમજ જમીનની માલિકી અને ફાળવણીના હેતુની ચકાસણી કર્યા વિના વર્ક ઓર્ડર આપનારા જળસિંચન વિભાગના અધિકારીઓ સામે અંગુલી નિર્દેશ કરી તેની ભૂમિકાની તપાસ કરવા તેમજ વર્ક ઓર્ડરની શરતો મુજબ કામ રદ કરી જવાબદારો સામે દંડનાત્મક કાર્યવાહી કરવાની રજૂઆત ઉપરાંત વધુમાં,યુનિવર્સિટી સંકુલના ઉપરવાસમાં આવેલા લક્કીવાળા વિસ્તારનું વરસાદી પાણી ભુજના ઐતિહાસિક હમીરસર તળાવમાં જતું હોવાનો ઉલ્લેખ કરી,આ કરાયેલા ખોદકામથી જળપ્રવાહમાં અવરોધ ઊભો થવાની આશંકા વ્યક્ત કરી આ મુદ્દે ભુજ નગરપાલિકાના પ્રમુખ સહિતના જવાબદારોએ તળાવનું કામ અટકાવ્યું હોવાનો પણ આ પત્રમાં ઉલ્લેખ કરાયો છે.

આવા ગંભીર મામલાની તપાસ જરૂરી…

યુનિવર્સિટીના સ્વભંડોળ ઉપરાંત સુરતના દાતા પાસેથી મળેલા આર્થિક સહયોગ સહિત સમગ્ર નાણાંકીય વ્યવહારની તટસ્થ તપાસ કરવાની માંગણી કરતા ડો.ગરવાએ કુલપતિ,કુલસચિવ અને અન્ય જવાબદારો સામે ગુનો નોંધવા,ખનીજ ચોરીની તપાસ કરી રોયલ્ટી તથા દંડ વસૂલવા અને કાયદેસરની કાર્યવાહી કરવા રાજ્યપાલ તથા શિક્ષણ વિભાગના ઉચ્ચ અધિકારીઓ તેમજ સંબંધિતો સમક્ષ કરાયેલી લેખિત રજૂઆત અંગે તંત્ર હવે પગલાં ભરે છે કે પછી ફરિયાદ સામે કોઈ સ્પષ્ટતા કરે છે કે પછી આ મામલો એક યા બીજા કારણે અંતે ન્યાયલય સમક્ષ પહોંચે છે તે જોવું રહ્યું.જો કે એક વાત નક્કી છે. કે નવા કુલપતિની નિમણુંક બાદથી વિવાદો અનેક ઉભા થયા છે. સાથે વિદ્યાર્થીઓના આક્રોષ પણ યુનિવર્સીટી સુધી પહોચી રહ્યા છે. તેવામાં રાજ્ય સરકાર આ મામલે ઉચ્ચકક્ષાએથી ફરીયાદની તપાસ કરે તે જરૂરી છે.

વિવાદ અને યુનિવર્સીટી શૈશણિક બાબતો સાથે હવે જાણે એકબીજાના પ્રર્યાય બન્યા હોય તેમ છાસવારે તેની સામે ગંભીર આક્ષેપો સાથે ફરીયાદો થઇ રહી છે. તો શિક્ષણનુ ધામ રાજકારણમાં ફેરવાયુ હોય તેવા વિવાદો પણ બની રહ્યા છે. તાજેતરમાં બે નેતાઓની ગેરહાજરીનો મુદ્દો પર ચર્ચામાં આવ્યો હતો. તેવામાં હવે ભુજના જાગૃત નાગરીકે ગંભીર આક્ષેપ સાથેની ફરીયાદ કરી છે.