રાપરની ઘાણીથર સીમમાં ફાઈરિંગ કરનાર ચાર શખ્સો દબોચાયા !

ઘાણીથરમાં શિકારી ટોળકીને પડકારતા યુવાન ઉપર ફાયરીંગના ચકચારી બનાવમાં ગાગોદર અને આડેસર પોલીસે ૪ આરોપીઓની બંદૂક તથા છરી સાથે કરી અટકાયત આરોપીને સાથે રાખી ગામમાં ફેરવાયા જો કે આ વિસ્તારમાં વધતી શિકારી પ્રવૃતિ ચિંતાજનક હોવાનો સુર, વનવિભાગની નિષ્ક્રિયતા સામે પણ સવાલો

રાપરના ઘાણીથરમાં શિકારી ટોળકીને પડકારતા યુવાન ઉપર શખ્સોએઁ ફાયરિંગ કર્યું હોવાનો બનાવ બનતા ચકચાર પ્રસરી હતી.તા.30ના રાત્રીના 11 વાગ્યાના અરસામાં ફરીયાદી પ્રભુ રાજા રાજપુતે આરોપીઓ અલ્તાફ દિન મામદ હીંગોળજા,મુબારક મામદ હીંગોળજા, હીનફ લીત નારેજા,નજરમામદ ઈસ્માઈલ હીંગોળજાને શિકારી પ્રવૃતિ કરતા હોવાની શંકાએ પડકાર્યો હતો.ગામની સીમ તરફ રાત્રીના ગોળીબારનો અવાજ આવતા બેટરી સાથે ગામના જાગૃત યુવાનો નીકળ્યા હતાં.શિકારી ટોળકીની આશંકા જ હતી.છરી બંદૂક સાથેના હથીયાર ધરાવતા આરોપીઓને રોકીને પૂછતા તેઓએ શિકાર કરવા આવ્યા છીએ વચ્ચે આવશો તો બધાને બંદૂકના ભડાકે ઉડાડી દેશું તેવી ધમકી આપી હતી.આ દરમ્યાન ફરિયાદી અને ગ્રામજનોએ બંદૂક પકડવા ગયા હતા. આ દરમ્યાન આરોપીએ બંદૂક ફરિયાદીની છાતી ઉપર રાખી દીધી હતી. અને ફાયરીંગ કર્યું આ બનાવના પગલે ભારે ચકચાર પ્રસરી હતી.જે મામલે પોલીસે વધુ તપાસ હાથ ધરતા ચકચારી ફાઈરિંગના બનાવમાં ગાગોદર અને આડેસર પોલીસની ટીમે સંયુક્ત કાર્યવાહી કરીને ગણતરીના કલાકોમાં જ ૪ આરોપીઓને ઝડપી પાડયા છે.ગાગોદર પી.આઈ.જી.એ.સોલંકી તથા આડેસર પી.આઈ. જે.બી.આચાર્ય અને તેમની ટીમે તપાસ તેજ કરી હતી.અને ચોક્કસ માહિતીના આધારે ફાઈરિંગના આ ગુનામાં સંકળાયેલા ચારેય આરોપીઓને અલ્તાફ દિનમામદ હિંગોળજા (ઉં.વ. ૨૧, રહે. આડેસર, તા. રાપર),મુબારક મામદ હિંગોળજા (ઉં.વ. ૨૭, રહે. ટગા, મૂળ રહે. વિજાપર, તા. રાપર),હનિફ લતીફ નારેજા (ઉં.વ. ૩૨, રહે. સણવા, તા. રાપર)નજરમામદ ઈસ્માઈલ હિંગોળજા (ઉં.વ. ૪૫, રહે. ટગા, તા. રાપર) ને દબોચી લીધા હતા.પોલીસે આરોપીઓ પાસેથી ફાઈરિંગમાં વપરાયેલ ૧ બંદૂક અને ૩ નંગ છરી જપ્ત કરી કાયદેસરની ધોરણસરની કાર્યવાહી હાથ ધરી છે. આરોપીને સાથે રાખી પોલીસે ગામમાં રીકન્સ્ટ્રક્શન અને સરધસ કાઢ્યુ હતુ.જે દરમ્યાન આરોપીઓ લંગડાતી ચાલે નજર પડ્યા હતા તો ગ્રામજનો પણ મોટી સંખ્યામાં ઉમટી પડ્યા હતા.

વધતી શિકારી પ્રવૃતિ સામે કામગીરી માટે રજુઆત

કચ્છના નાના રણના આજુબાજુના વિસ્તારમાંથી પલાસવા અને ઘાણીથરના આજુબાજુના વિસ્તારમાં શિકારી પ્રવૃતિ વધી હોવાનો જાગૃતોએ સુર વ્યક્ત કર્યો છે.જંગલી ગધેડા,નીલ ગાય જરખ, નાના સસલા સહિતનાનો શિકાર આ વિસ્તારમાં કરવામાં આવતો હોવાની ફરીયાદો ઉઠી છે.થોડા સમય પહેલા ફતેહગઢ વિસ્તારમાં શિકારીઓ શિકાર કરવામાં આવ્યા અને માલધારી ઉપર ફાયરિંગ કરવામાં આવ્યું હતું આ વિસ્તારમાં થતી બેફામ શિકારી પ્રવૃતિ સામે કડક કામગીરી કરવામાં આવે એવી પર્યાવરણ મંત્રી પ્રવીણ માળી અને અર્જુન મોઢવાડિયાને કચ્છના જાગૃત નાગરીક ભરત સંધવીએ રજુઆત કરી હતી.સાથે આવી પ્રવૃતિ સામે અસરકારક કામગીરી કરવામાં નિષ્ફળ ગયેલા વનવિભાગના કર્મચારી અને અધિકારીઓ સામે પણ પગલા લેવામાં આવે તેવી માંગ કરી હતી.કચ્છના અભ્યારણ વિસ્તારમાં શિકારી પ્રવૃતિ,મીઠાના ગેરકાયદેસર અગરો સાથે કાયદો વ્યવસ્થાની સ્થિતી સામે સવાલો ઉભા કરતા બનાવો ભુતકાળમાં પણ બન્યા છે તેવામાં વનવિભાગના અધિકારીઓની નિષ્ક્રિય કામગીરી સામે ગ્રામજનો અને જાગૃત નાગરીકો સવાલો ઉઠાવી રહ્યા છે.

કચ્છમાં પોલીસ અને વનવિભાગની કામગીરી વચ્ચે શિકારી પ્રવૃતિના કિસ્સા સતત સામે આવી રહ્યા છે. તેમાય રાપર વિસ્તારમાં આવી પ્રવૃતિને પડકારનાર નિર્દોષ લોકો પર ફાયરીંગ કરી કાયદાનો જાણે ડર જ ન હોય તેવી રીતે વર્તવાના બે કિસ્સા સામે આવ્યા છે ત્યારે આવી પ્રવૃતિ પર રોક લાગે તે માટે સતત પેટ્રોલીગ સાથે કાર્યવાહી થાય તે જરૂરી છે. જો કે તાજેતરના કિસ્સામાં પોલીસે આરોપીને પકડ ગામમાં તેનુ સરધસ કાઢી કાયદાનુ ભાન કરાવ્યુ છે.