મધ્યપ્રદેશની કુખ્યાત ‘ચડ્ડીધારી’ ગેંગ કચ્છ પોલીસના હાથે ઝડપાઇ !

૧૦ હજારના ઈનામી સરગના સહિત ૫ ઝડપાયા,ગુજરાત, મધ્યપ્રદેશ,રાજસ્થાન અને કર્ણાટકમાં આચરેલી ૧૫ થી વધુ ઘરફોડ ચોરીઓનો ભેદ ઉકેલાયો ૬ લાખ રોકડા અને અર્ટીગા કાર સહિતનો મુદ્દામાલ જપ્ત
ભુજ:
પશ્ચિમ કચ્છ-ભુજ લોકલ ક્રાઇમ બ્રાન્ચ (LCB) એ આંતર-રાજ્ય સ્તરે તરખાટ મચાવતી અને મધ્યપ્રદેશના ધાર જિલ્લાની કુખ્યાત ‘ચડ્ડીધારી ગેંગ’ નો પર્દાફાશ કરીને એક મોટો સફળતા હાંસલ કરી છે.આ કાર્યવાહી દરમ્યાન પોલીસે રૂ.૧૦,૦૦૦ ના ઈનામી સરગના સહિત ગેંગના પાંચ રીઢા ગુનેગારોને અર્ટીગા કારમાં ચોરી કરવા જતાં તુતરા ફાટક પાસેથી રંગેહાથ ઝડપી લીધા હતા.આ કામગીરીથી કચ્છ તેમજ અન્ય રાજ્યોના કુલ ૧૫ થી વધુ ઘરફોડ ચોરીના વણઉકેલાયેલા ગુનાઓનો ભેદ ઉકેલાયો છે.પોલીસે કાર્યવાહી દરમ્યાન માનસિંહ ઉર્ફે માનીયો બાયસિંહ મોહનિયા (ઉં.વ. ૩૮, રહે. ધાર, મધ્યપ્રદેશ) ૧૦,૦૦૦ નો ઈનામી ગુનેગાર, દિનેશ ભેરુલાલ ચૌહાણ (ચમાર) (ઉં.વ. ૫૦, રહે. ધાર, મધ્યપ્રદેશ)સ્વરૂપસિંહ ભંગુસિંહ અલાબા(ઉં.વ. ૨૫,રહે. ધાર,મધ્યપ્રદેશ),શકરુબનસિંહ આમલીયારા (ઉં.વ. ૨૬, રહે. ધાર,મધ્યપ્રદેશ)મોહબત ઈડુ મંડલોઈ (ઉં.વ. ૨૪, રહે. ધાર, મધ્યપ્રદેશ) ઝડપી પાડ્યા હતા.આરોપીની કચ્છ જિલ્લાના વાયોર,કોઠારા,નલીયા, પદ્ધર,માધાપર અને માંડવી પોલીસ સ્ટેશન વિસ્તારના ઘરફોડ ચોરીના બનાવો સાથે ગુજરાતના અન્ય જિલ્લા વડોદરા-નડિયાદ રોડ, ભાવનગર,અમરેલી (ચિતલ) અને અમદાવાદ સાયન્સ સિટી ખાતેની ચોરીઓ સાથે અન્ય રાજ્યોના કર્ણાટક (હબલી), મધ્યપ્રદેશ (છિંદવાડા) અને રાજસ્થાન (કોટા રૂરલ-સીએફસીએલ ટાઉનશીપ) માંથી સોના-ચાંદીના દાગીના અને રોકડની ચોરીમાં આરોપીઓની સંડોવણી ખુલ્લી છે. આરોપીઓ ચોરીનો મુદ્દામાલ એમ.પી.ના સોની વેપારીઓ (સંજય આમલીયારા અને ગૌરાંગ જૈન) ને વેચતા હોવાનું સામે આવ્યું છે,જે દિશામાં પણ પોલીસે તપાસ હાથ ધરી છે.
ચોરી કરવાની પદ્ધતિ પણ ડિઝીટલ અને અનોખી

પોલીસ પૂછપરછમાં આરોપીઓએ તેમની ચોંકાવનારી ચોરી કરવાની પદ્ધતિનો ખુલાસો કર્યો હતો. ગેંગ મધ્યપ્રદેશથી અલગ-અલગ વાહનોમાં નીકળી હાઈવે પર આવેલી પોશ સોસાયટીઓ કે ફેક્ટરી ક્વાર્ટર ગૂગલ મેપ (Google Maps) પર સર્ચ કરીને ટાર્ગેટ કરતી.દિવસ દરમિયાન લોકેશનની રેકી કર્યા બાદ રાત્રે ઝાડીઓમાં ૪-૫ કલાક સંતાઈ રહેતા.ચોરી કરવા જતી વખતે આરોપીઓ ઓળખ છુપાવવા મોઢે રૂમાલ,શરીરે ફક્ત ચડ્ડી પહેરતા અને આખા શરીરે તેલ લગાવતા,જેથી કોઈ પકડવા જાય તો લપસીને ભાગી શકાય.જો કોઈ જાગી જાય કે સામનો કરે તો તેમની પાસે રહેલા લોખંડના ગણેશિયાથી જીવલેણ હુમલો કરતા પણ અચકાતા નહોતા.

અને ચોરી કરે તે પહેલા આ રીતે ઝડપાઈ ગેંગ…!

સરહદી રેન્જ આઈજી ચિરાગ કોરડીયા અને પશ્ચિમ કચ્છ એસપી વિકાસ સુંડાની સૂચનાથી LCB ઇન્સ્પેક્ટર એ.એમ.મકવાણા અને તેમની ટીમે છેલ્લા અઠવાડિયા દરમિયાન ૨૦૦ થી વધુ CCTV ફૂટેજ તપાસ્યા હતા.તે દરમિયાન એ.એસ.આઈ.પ્રધ્યુમનસિંહ ગોહિલ,વિરેન્દ્રસિંહ જાડેજા અને સુનીલ પરમારને બાતમી મળી હતી કે એમ.પી.ની ચડ્ડીધારી ગેંગનો મુખ્ય સૂત્રધાર માનીયો તેના સાગરીતો સાથે અર્ટીગા કારમાં માંડવીથી નલીયા તરફ ચોરી કરવા આવી રહ્યો છે.બાતમીના આધારે LCB સ્ટાફે તુતરા ફાટક પાસે એલર્ટ કરી કારને રોકાવીને તપાસ કરતા,કારના ગુપ્ત ખાનામાંથી ૬,૦૦,૦૦૦ રોકડા તેમજ ચોરી કરવા માટે વપરાતા ગણેશિયા,કટર,ડીસમિસ જેવા હથિયારો મળી આવ્યા હતા.

કચ્છમાં વધુ ચોરીને અંજામ આપે તે પહેલા ગેંગ ઝડપાઇ ગઇ છે. સામાન્ય રીતે શિયાળામા આવી ટોળકીઓ ચોરી માટે વિસ્તારો પસંદ કરતી હોય છે. પરંતુ તે પહેલા પશ્ચિમ કચ્છ પોલીસે એક મોટી સફળતા મેળવી આંતરરાજ્ય ગેંગને ઝડપી કચ્છમાં ચોરી માટે ક્યા વિસ્તારો તેના ટાર્ગેટમાં હતા તેની વિશેષ પુછપરછ શરૂ કરી છે.