ભુજ રેલવે સ્ટેશનમાં નજીવી બોલાચાલીમાં યુવકની કરપીણ હત્યા !

૨૮ વર્ષીય પરપ્રાન્તીય યુવક મુકેશ સાહનીનું મોત,આરોપી રેલવે પોલીસ ગિરફતમાં જો કે રેલવે સ્ટેશનની અંદર જ હત્યાના બનાવે ભારે ચકચાર સાથે સુરક્ષા સામે મોટા સવાલો ઉભા કર્યા હતા.
ભુજ:
જ્યા હજારો લોકોની રોજની અવરજવર રહે છે. તેવા ભુજ રેલવે સ્ટેશન પર ગુરુવારે સાંજે બે પ્રવાસીઓ વચ્ચે થયેલી ક્ષણિક બોલાચાલીએ લોહિયાળ સ્વરૂપ ધારણ કરતાં સમગ્ર વિસ્તારમાં અરેરાટી વ્યાપી ગઈ હતી. તો સુરક્ષા સામે સવાલો ઉભા કરતા કિસ્સામાં રેલવે પોલીસ દોડતી થઇ હતી.સામાન્ય તકરારમાં ઉશ્કેરાયેલા એક યુવકે લોખંડની પાઈપ વડે હુમલો કરી ૨૮ વર્ષીય મુકેશ સાહની નામના યુવકની હત્યા કરી દીધી હતી.ઘટના બાદ રેલવે પોલીસે ત્વરિત કાર્યવાહી કરી હુમલાખોરને સ્થળ પરથી જ દબોચી લીધો હોવાનુ અધિકારીએ ઉમેર્યુ હતુ.ગુરુવારે સાંજે આશરે ૪:૩૦ વાગ્યાના અરસામાં ભુજ રેલવે સ્ટેશન પરિસરમાં બે પ્રવાસીઓ વચ્ચે કોઈ બાબતે સામાન્ય બોલાચાલી થઈ હતી.જોતજોતામાં મામલો ઉગ્ર બન્યો હતો અને એક યુવકે નજીકમાં પડેલી લોખંડની ભારે પાઈપ ઉપાડી સામેના યુવકના માથાના ભાગે સટાસટ ફટકારી દીધી હતી.અચાનક થયેલા આ જીવલેણ હુમલાને પગલે રેલવે સ્ટેશન પર હાજર મુસાફરોમાં નાસભાગ અને ભયનો માહોલ સર્જાયો હતો.હુમલામાં ગંભીર રીતે લોહીલુહાણ થયેલા યુવકની ઓળખ મુકેશ સાહની (ઉંમર વર્ષ ૨૮, મૂળ નિવાસી: સીતામઢી, બિહાર) તરીકે થઈ છે.ઘટનાની જાણ થતાં જ રેલવે પોલીસનો કાફલો સ્થળ પર દોડી ગયો હતો.ગંભીર ઈજાગ્રસ્ત મુકેશને ત્વરિત સારવાર અર્થે હોસ્પિટલ ખસેડવામાં આવ્યો હતો,પરંતુ માથામાં થયેલી ઊંડી અને ગંભીર ઈજાઓના કારણે તે સ્થળ પર જ મૃત્યુ પામ્યો હતો.સામાજીક સંસ્થાઓની મદદથી તેના મૃત્દેહને હોસ્પિટલ પહોંચાડાયો હતો.પોલીસની પ્રાથમિક તપાસમાં બહાર આવ્યું છે કે મૃતક અને આરોપી બંને પરપ્રાંતીય છે અને એકબીજાથી તદ્દન અજાણ્યા હતા.કોઈ પણ અગાઉના વેરઝેર વગર માત્ર ક્ષણિક આવેગમાં આ ઘટના બની કે પાછળ અન્ય કોઈ કારણ છે,તે અંગે તપાસ હાથ ધરવામાં આવી છે.ગાંધીધામ રેલવે પોલીસ સ્ટેશનના પી.આઈ. પી.આર.સોલંકીના માર્ગદર્શન હેઠળ પોલીસે આરોપીની સઘન પૂછપરછ હાથ ધરી છે તેમજ ગુનામાં વપરાયેલી લોખંડની પાઈપ જપ્ત કરી આગળની કાનૂની કાર્યવાહી શરૂ કરી છે. જો કે પ્રવાસીઓની સતત હાજરી અને રેલવે પોલીસની અભેદ સુરક્ષા વચ્ચે બનેલા બનાવમાં કલાકો બાદ પણ હત્યાનુ કારણ રેલવે પોલીસની તપાસમાં સ્પષ્ટ થઇ શક્યુ નથી.જો કે થોડા સમય માટે રેલવે સ્ટેશનમાં હત્યાના ચકચારી બનાવથી ભારે દોડધામ મચી ગઇ હતી.જો કે તપાસ બાદ હત્યાનુ ચોક્કસ કારણ સ્પષ્ટ થશે.