હજારોની લોકોની હાજરીમાં બનેલ અને ધરાર પોલીસ ચોપડે ન ચડેલ બનાવ પર ધિમેધિમે પડદો પડી રહ્યો છે. બે દિવસ પહેલા નવરાત્રીમાં બબાલ સર્જનાર વિલાના ગાયક કલાકાર શૈલેષ બારોટે વોકળામાં જાહેરમાં માફી માંગતા હવે વિવાદ અંત ભણી જઇ રહ્યો છે.આ તરફ વિલાના આયોજકોએ પણ કલાકારોની ટીમમાંથી તેને કાઢી મુક્યો હતો.જેથી હવે પોલીસ કાર્યવાહી ભાગ્યેજ સંભવ છે.જો કે જાહેરમાં બનેલા ગંભીર બનાવે સમગ્ર કચ્છમાં ભારે ચકચાર સર્જી હતી.
વિલાના ગાયક કલાકાર શૈલેષ બારોટે વોકળા ફળીયામાં જઇ કરેલા ધતીંગ અને ત્યાર બાદના વિવાદો અને ચર્ચા વચ્ચે હવે આ મામલો કાયદાકીય પ્રક્રિયાથી દુર રહી આંતરીક પતી રહ્યો હોય તેવુ લાગી રહ્યુ છે. બે દિવસ પહેલા વોકળા ફળીયામાં અન્ય લોકો સાથે પહોંચેલા કલાકારે ગીત ગાવાની ઇચ્છા વ્યક્ત કરી હતી. પરંતુ તેની ડગમગ સ્થિતી અને ગરબીના નિયમો આગળ ધરી આયોજકોએ તેને ગીત ગાતા અટકાવ્યો હતો.બસ પછી તો શુ મદમસ્ત બનેલા કલાકારે આખી ગરબી માથે લીધી હતી.આયોજકો પર અપશબ્દોનો મારો અને બેફામ વાણીવિલાસ વચ્ચે આયોજકોએ તેને રૂમમાં બેસાડ્યો હતો. જો કે મામલો વાયુવેગે સમગ્ર શહેરમાં ફેલાઇ ગયો હતો. વાત વિલાના આયોજકો સુધી પણ પહોંચી હતી.જે બાદ હવે સમગ્ર મામલે કાર્યવાહી શરૂ થઇ છે.અને વિવાદથી અંતર રાખી મામલો અંદરખાને પુર્ણ થઇ રહ્યો છે.એક તરફ લોકોના પ્રેમ અને પ્રતિષ્ઠાથી છાકટા બનેલા કલાકાર શૈલેષ બારોટને ભાન થતા વોકળાના જાહેર મંચથી પોતાની હરકતો અને નવરાત્રીમાં કરેલા કૃત્ય અંગે માફી માંગી હતી. જો કે પ્રતિષ્ઠા બચાવવા માટે વિડીયોગ્રાફી અને માઇકના ઇનપુટ બંધ કરી દેવાયા હતા.પરંતુ હજારો લોકોની હાજરીમાં તેને પોતાની ભુલ સ્વીકારી લોકો તથા આયોજકોની માફી માંગી હતી.તો બીજી તરફ વોકળાના વિવાદથી વિલાની બદનામી વધુ ન થાય અને વિવાદથી અંતર બનાવવા માટે વિલાના આયોજકોએ પણ તેને નવરાત્રીના કલાકારોની યાદીમાંથી બહાર કાઢ્યો હતો.જો કે સમગ્ર મામલે વિલાના આયોજકો પાસેથી સમગ્ર વિવાદમાં કલાકારને કેમ દુર કરવામાં આવ્યો? શુ વિલા નવરાત્રીમાં તેની આવી કોઇ પ્રવૃતિ સામે આવી હતી. તે સહિતની માહિતી મેળવવા માટે ભદ્રેશ મહેતાનો સંપર્ક કરાયો હતો. પરંતુ તેને ફોન ન ઉઠાવતા વિગતો મળી શકી ન હતી.જો કે નવરાત્રી વચ્ચે લોકોને ધુમરે ચડાવનાર આ કિસ્સો શહેરમાં ટોક ઓફ ધ ટાઉન બન્યો હતો કેમકે એક તરફ નવરાત્રીની રગંત બગળી,બીજી તરફ વિલા જેવી ગરબીના આયોજકો સામે સવાલો ઉભા થયા અને પોલીસે કાઇ ન કરેલી કામગીરી પણ ચર્ચાના કેન્દ્રમાં રહી…
સામાન્ય રીતે મોટા લોકોને સંડોવતા આવા મામલામાં છેલ્લે નજીવી કાર્યવાહી,માફી સહિતના મામલે વિવાદ શાંત થઇ જતો હોય છે.અને ભાગ્યેજ કાયદા મુજબ કાર્યવાહી થતી હોય છે.તેવુ આમાં પણ થઇ રહ્યુ હોવાનુ ચિત્ર ઉપસી રહ્યુ છે. જો કે હજારો લોકોની હાજરીમાં બનેલા બનાવ પછી પણ પોલીસ કાર્યવાહી ન થતા હજુ આ કિસ્સો સામાન્ય લોકોના મનમાં અનેક પ્રશ્નો ઉઠાવી રહ્યુ છે.જો કે કલાકારની માફી અને ગરબીથી દુર કરાયેલા કલાકાર સામે હવે ભાગ્યેજ પોલીસ કાર્યવાહી સંભવ છે. જો કે ‘અંત ભલા તો સબ ભલા’
