છેલ્લા 12 વર્ષથી મુંદરા મધ્યે નાત જાતના ભેદભાવને કોરાણે મૂકીને સમૂહલગ્નનું આયોજન કરાતું રહ્યું છે, આ વર્ષે યોજાયેલા સમૂહલગ્નમાં 63 દુલ્હા-દુલહન સમૂહશાદીથી જોડાયા હતા જયારે 46 દંપતીઓએ અગ્નિની સાક્ષીએ ફેરા ફરીને દામ્પત્ય જીવનના ડગ માંડ્યા હતા. કોમી એકતાની મહેક સમા આ અનોખા આયોજનમાં ભાગ લેનારા 109 નવવિવાહિતોને આયોજક સમિતિ સહિત હિન્દુ-મુસ્લિમ અગ્રણીઓ અને રાજકીય આગેવાનોએ ઉપસ્થિત રહીને આશિર્વાદ સાથે મુબારકી પાઠવી હતી .
અખિલ કચ્છ જિલ્લા જત-મલેક (ગરાસિયા) સમાજ, અખિલ કચ્છ જિલ્લા મુસ્લિમ સમાજ, મુંદરા તાલુકા સર્વજ્ઞાતિ સમૂહલગ્ન સમિતિ આયોજિત આ 12માં સમૂહલગ્ન સમારોહમાં બહોળી સંખ્યામાં ઉમટેલા મહાનુભાવોનું આયોજકોએ અભિવાદન સહ સ્વાગત કર્યું હતું મુંદરામાં આ પરંપરાના પાયાના પથ્થર સમા અગ્રણી હાજી સલીમ અહેમદ જતે આ આયોજનની સફળતાનો શ્રેય સર્વે હિન્દુ-મુસ્લિમ ભાઈઓ,આ આયોજનના કાર્યકરો તથા સૌ ઉપસ્થિત રહેતા મહાનુભાવોને આપ્યો હતો.
આ પ્રંસગે પીર સૈયદ અલ્હાજ હાજીઅલી અહેમદશા કાદરી-મુંદરા, સંતશ્રી કલ્યાણદાસજી મોરબી,સંતશ્રી શાંતિદાસજી મહારાજ-મોટી વિરાણી, સલીમશા બાપુ -વિંઝાણ, સાંસદ વિનોદભાઈ ચાવડા, ધારાસભ્યો વિરેન્દ્રસિંહ જાડેજા,પ્રદ્યુમનસિંહ જાડેજા, સંતોકબેન આરેઠીયા સહિત રાજકીય અગ્રણીઓ કૌશલ્યાબેન માધાપરિયા, છાયાબેન ગઢવી, જ્યંતિલાલ ઠક્કર-ડુમરાવાળા, હાજી મોહંમદસધિક જુણેજા તેમજ કચ્છ લડાયક મંચના રમેશભાઈ જોશી, મુંદરાના અગ્રણીઓ
અશ્વિનભાઈ ઝીંઝુવાડિયા, ધર્મેન્દ્ર જેસર, મુકેશભાઈ ગોર, BSF ના DIG આઈ.કે.મહેતા સહિતના મહાનુભાવોએ ઉપસ્થિત રહી આયોજનની શોભા વધારી હતી
આ પ્રંસગે બન્ને ધર્મના મહાનુભાવોએ આ આયોજનને બિરદાવતા ધર્મના ઉપદેશો સાથે સમગ્ર દેશ આ કોમી એકતાનો સાક્ષી બન્યો હોવાનું જણાવીને આ ભાઈચારા અને એકતાનો સંદેશ આ સરહદી જિલ્લામાંથી સમગ્ર દેશમાં ઝિલાય એવી લાગણી વ્યક્ત કરી હતી.
આ અવસરે દાતાઓએ દાનની સરવાણી વહેવડાવીને આ પ્રસંગને મહેકાવ્યો હતો લગ્ન પ્રસંગથી ગાજી ઉઠેલા આ માહોલથી મુંદરા શહેરમાં પણ ખુશીનો માહોલ જોવા મળ્યો હતો. કોમી એકતાની મિશાલ બનેલા આ સરહદી જિલ્લામાં મહેકતી ભાઈચારાની સુવાસ કાયમ રાખનારા આવા આયોજનોને અન્ય લોકો પણ અનુસરે એજ સંદેશ સાથે સૌ આયોજકો અને નવયુગલોનેઅભિનંદન
