કચ્છની દરિયાઈ સીમાએ પેટ્રોલિંગ દરમ્યાન બીએસએફને બિનવારસુ પડેલું પેકેટ મળી આવ્યું હતું. આ પેકેટમાં ડ્રગ્સ હતું. ડ્રગ્સના આ જથ્થાની કિંમત ૫ કરોડ રૂપિયા હોવાનું અનુમાન છે. બીએસએફની 108 બટાલિયનને ગઈકાલે રવિવારે મોડી સાંજે પેટ્રોલિંગ દરમ્યાન આ ડ્રગ્સનું પેકેટ મળી આવ્યું હતું. અગાઉ પણ પોલીસ તથા BSF ને આ વિસ્તારમાંથી ગત જુલાઈ મહિનામાં ડ્રગ્સ ના પેકેટ મળી આવ્યા હતા. અત્યાર સુધીમાં સુરક્ષા એજન્સીઓએ ડ્રગ્સના ૧૫ પેકેટ શોધી કાઢ્યા છે. ડ્રગ્સનું આ પેકેટ ગત મે મહિનામા જખૌ નજીક થી કોસ્ટગાર્ડે પકડેલી અલમદ્દીન બોટમાં ડ્રગ્સ કેરિયરોએ ઝડપાયા પહેલા દરિયામાં ફેંકી દીધેલા ડ્રગ્સના ૧૩૬ પેકેટ પૈકી હોવાનું એજન્સીઓનું માનવું છે.
અલમદીન બોટમાં જખૌ ઓખા વચ્ચે મે મહિનામાં ડીઆરઆઈ કોસ્ટગાર્ડે ૬૦૦ કરોડના ડ્રગ્સ સાથે પાકિસ્તાની બોટ ઝડપી હતી
ભારતમાં મોટા પાયે ડ્રગ્સ ઘુસાડી નવી યુવા પેઢીને નશાના રવાડે ચડાવવાનું એક મોટું ષડ્યંત્ર ચાલી રહ્યું છે. ઉડતા પંજાબ પછી ડ્રગ પેડલરોએ ડ્રગ્સ ઘુસાડવા માટે કચ્છ સૌરાષ્ટ્રના દરિયા કિનારા મારફત ગુજરાતને હવે ઉડતા ગુજરાત બનાવવાનું શરૂ કર્યું છે. પૂર્વ બાતમીને આધારે ગત મે મહિનામાં ૨૧/૫ ના ડીઆરઆઈએ કોસ્ટગાર્ડની મદદથી જખૌ ઓખાના દરિયાઇ વિસ્તારમાંથી ૬૦૦ કરોડના ડ્રગ્સ સાથે અલમદીન બોટ સાથે ૬ પાકિસ્તાનીઓને ઝડપી પાડ્યા હતા. આ ડ્રગ કેરીયરો ગુજરાતના દરિયા મારફત ગુજરાત અને મુંબઈ તરફ ડ્રગ ઘુસાડવાની પેરવીમાં હતા. જોકે, ભારતીય સુરક્ષા એજન્સીઓએ તેમને ઝડપ્યા ત્યારે તેમણે ડ્રગ્સના અનેક પેકેટ દરિયામાં પણ ફેંકી દીધા હતા. આ છ એ છ પાકિસ્તાનીઓ વિરુદ્ધ કચ્છના નારાયણસરોવર પોલીસ સ્ટેશને ફરિયાદ નોંધાઇ છે. ડીઆરઆઈના સીનીયર ઇન્ટેલિજન્સ ઓફિસર શ્રવણરાજે પાકિસ્તાનીઓ સફદરઅલી અલવારીયું શેખ, અલ્લાહદાદ અલ્લાબક્ષ, અબ્દુલ અઝીઝ મોહમદ જુમા, અબ્દુલગફુર ઓસમાણ બલોચ, અઝીમખાન ઓસમાણ બલોચ, મોહમદમલ્લાહ સના મોહમદ સામે વિવિધ કલમો તળે ફરિયાદ નોંધી છે. ગત ૨૧/૫ ના ઝડપાયેલા આ પાકિસ્તાની ડ્રગ કેરીયરો સામે પાસપોર્ટ વિઝા વિના ભારતીય જળસીમામાં ઘૂસણખોરી, સહિત કલમ ૩, ૬ ફોરેન એકટની કલમ ૧૩(બી), ૧૪ (એ), (બી) તળે ગુનો નોંધીને નારાયણસરોવર પોલીસ સ્ટેશનના પીએસઆઇ ઝાલાએ તપાસ હાથ ધરી છે.
