કચ્છમાં બેફામ ખનીજચોરીની ફરીયાદો ઉઠી રહી છે. ખાણ ખનીજ,પોલીસ તથા ખાસ રચાયેલી ટાસ્કફોર્સ કચ્છના વિવિધ વિસ્તારોમાં ખનીજ ચોરી પકડી રહી છે પરંતુ તેમ છંતા આવી પ્રવૃતિઓ અટકી રહી નથી. ખનીજ ચોરી પાછળ સંડોવાયેલા મોટામાથાઓ સુધી તંત્ર પહોંચતુ નથી તેવામાં ટાસ્કફોર્સે સુમરાસર સીરામાંથી ખનીજ ચોરી પકડી છે.
કચ્છમાં તંત્રની કામગીરી છંતા ખનીજ ચોરો બેફામ બની પોતાની પ્રવૃતિઓ કરી રહ્યા છે. તેની પાછળ તંત્રની દેખાવ પુરતી કામગીરી જવાબદાર હોવાનુ જાણકારો કહી રહ્યા છે. કેમકે તંત્રના કડક કામગીરીના દાવા વચ્ચે વિવિધ સ્થળે ખનીજ ચોરી તો થઇજ રહી છે. ગઇકાલે એલસીબીએ બે સ્થળે કરોડો રૂપીયાના સાધનો સાથે ખનીજ ચોરી ઝડપી હતી તેવામાં હવે તાજેતરમાંજ અચાનક સક્રિય થયેલી કલેકટરના હસ્તકની ટાસ્કફોર્સે બે સ્થળે સપાટો બોલાવ્યો છે.ટાસ્કફોર્સ દ્વારા ગેરકાયદે ખનિજ પ્રવૃતી અંગે મળતી અવાર નવાર ફરિયાદોને ગંભીરતાથી લઈ કાર્યવાહી થઇ રહી છે ત્યારે શુક્રવારે ફરિયાદીની બાતમીના આધારે ખાનગી વાહનથી ભુજ તાલુકાના સુમરાસર સીમ વિસ્તાર ખાતે આકસ્મિક તપાસ હાથ ધરવામાં આવી હતી જે તપાસ દરમ્યાન લોડર રજીસ્ટ્રેશન નં GJ-12-CM-8113 અને ડમ્પર રજીસ્ટ્રેશન નં. GJ-12-BX-4051, એમ કુલ-૨ વાહનો દ્વારા સાદી રેતી ખનિજનું ગેરકાયદે ખનન કરતા અટક કરી પાંત્રીસ લાખની કિંમતનો મુદ્દામાલ કબ્જે કરવામાં આવ્યો હતો.સાથે વાહનોને સિઝ કરી સરકારી ગોદામ,ભુજ ખાતે કસ્ટડીમાં સોંપવામાં આવ્યા હતા. આ અંગે જવાબદાર વિભાગ દ્રારા આગળની કાર્યવાહી હાથ ધરવામાં આવી છે. બીજી તરફ વી-કોંક્રિટ શિરાચા ખાતે તપાસ હાથ ધરવામાં આવી હતી જે તપાસ દરમ્યાન ડમ્પર રજીસ્ટ્રેશન નં. GJ-16-2-3190 દ્વારા સાદી માટી ખનિજનું રોયલ્ટી પાસ વગર વહન કરતા અટક કરી રૂપીયા સત્તર લાખની કિંમતનો મુદ્દામાલ કબ્જે કરવામાં આવ્યો હતો. જો કે વી-કોંક્રિટ જેવી મોટી કમ્પની ચાલતા વાહનોમાં પકડાયેલી ખનીજ ચોરીના મામલામાં આગળ શુ કાર્યવાહી થાય છે તેના પર સૌની મીટ મંડાયેલી છે. આ ડમ્પરને સિઝ કરી વી-કોકિટ પ્લાંટ, શિરાચા ખાતે કસ્ટડીમાં સોંપવામાં આવ્યો છે.જેની કાર્યવાહી પણ હાથ ધરવામાં આવી છે.
ખનીજ ચોરી તો પકડાય છે પણ મોટા માથા નહી…?
કચ્છમાં સ્થાપીત થયેલા ઉદ્યોગોને કારણે તાજેતરમાં રેતી,કાકરી સહિત તમામ ખનીજની ભારે માંગ છે. જેનો લાભ લઇ ખનીજ ચોરો બેફામ રીતે કચ્છમાં ઠેરઠેર ખનીજ ચોરી કરી રહ્યા છે તેવામાં તંત્ર તેના મુળ સુધી ન પહોંચતા ડ્રાઇવર-ક્લીનર સુધી આ તપાસ સમિતી રહે છે પરંતુ મોટા માથાઓ સુધી આજ સુધી તપાસ પહોંચી હોય તેવુ તપાસમાં સામે આવ્યુ નથી ત્યારે કચ્છમાં ક્યા મોટા માથાઓ સુનિયોજીત ખનીજ ચોરીને અંજામ આપી રહ્યા છે. તેની તપાસ કરી કાર્યવાહી કરવામાં આવે તો આવી પ્રવૃતિ પર રોક લાગી શકે તેમ છે.જો કે હાલ તો તંત્ર કચ્છમાં ઠેરઠેર ખનીજ ચોરી પકડવાના દાવા કરી વાહવાહ મેળવાઇ રહી છે.પરંતુ જાણકારો કહી રહ્યા છે. કે કચ્છમાં ચોક્કસ સ્થળે ખનીજ ચોરી હજુ પણ ધમધમી રહી જ છે.ત્યારે કચ્છમાંથી લુંટાઇ રહેલા કિંમતી ખનીજના મામલામાં જો ગાંધીનગર કક્ષાએથી તપાસ કરવામાં આવે તો મસમોટુ કૌભાડ સામે આવી શકે તેમ છે.
ખુદ ખાણ ખનીજ અધિકારીઓ સામે ગંભીર આરોપ !
આમતો કચ્છમાં ખાણખનીજ વિભાગની કામગીરી સામે સવાલો ઉઠ્યા હોય તેવુ પહેલી વાર નથી અગાઉ પણ અનેક જાગૃત નાગરીકો તથા વિપક્ષ કોગ્રેસ દ્વારા ખાણખનીજના ભષ્ટ અધિકારીઓ સામે ગંભીર આરોપ મુકાયા છે. તેવામાં તાજેતરની થઇ રહેલી કામગીરી પછી ખાણખનીજ વિભાગના અધિકારીઓ સામે ગંભીર આરોપો થઇ રહ્યા છે. જીલ્લા કોગ્રેસના અગ્રણી રમેશ ગરવાએ તાજેતરમાં કચ્છ ખાણખનીજ વિભાગમાં ફરજ બજાવતા અધિકારી મેહુલ શાહ સામે ગંભીર આરોપ જાહેર માધ્યમમાં કર્યા હતા.અને ખાણખનીજ અધિકારીની ખનીજ ચોરી સાથે સાંઠગાંઠના આક્ષેપ કર્યા હતા તેવામાં ચોક્કસ પ્રશ્ન થાય છે.કે એક તરફ કચ્છમા ખનીજ ચોરી પકડાઇ રહી છે પરંતુ આવા આક્ષેપો સામે ખાસ ટાસ્કફોર્સની રચના કરનાર કલેકટર કેમ તપાસ કરતા નથી? તેવા સવાલો ઉઠાવાઇ રહ્યા છે. જો કે આ નવી વાત નથી અગાઉ પણ ખાણખનીજ વિભાગના અધિકારીઓ સામે ગંભીર આરોપો થયા છે પરંતુ તેની યોગ્ય તપાસ થઇ નથી.તાજેતરમાં પણ ખાણખનીજ અધિકારી સામે જાગૃત નાગરીકો સવાલ ઉઠાવી રહ્યા છે.
કચ્છમાં ખનીજચોરી પર કાર્યવાહીના તંત્રના દાવા વચ્ચે એક વાત નક્કી છે કે કચ્છમાં ખનીજ ચોરી અટકી રહી નથી અને ખનીજ ચોર તત્વો બેફામ રીતે સરકારી તીજોરીને નુકશાન પહોંચાડી રહ્યા છે. તેવામાં ખનીજ ચોરી પર સમગ્ર કચ્છમાં વ્યાપક કામગીરી કરવામાં આવે તો જ તે અટકે તેમ છે. ત્યારે માત્ર દેખાવ પુરતી નહી પરંતુ ખનીજ ચોરીના મોટા માફીયાઓથી લઇ તેમાં સંડોવાયેલા તમામ સુધી પણ તંત્ર પહોંચે તેવી માંગ જાગૃતો કરી રહ્યા છે.
