કચ્છમાં દારૂ ધુસાડવા મરણીયા બુટલેગરોનો વધુ કરોડોનો દારૂ ઝડપાયો !

સ્થાનીક પોલીસની નિષ્ક્રિયતા વચ્ચે એસએમસીએ હવે પુર્વ કચ્છમાં મોટો દરોડો પાડી ભચાઉના વોંધ નજીકથી એક કરોડના દારૂ સહિતનો મુદ્દામાલ જપ્ત કર્યો નામચીન બુટલેગર અશોકસિંહ ઉર્ફે મામા બાલુભા જાડેજા સહિતના બુટલેગરોના નામ ખુલ્યા આરોપીઓ ભાગી જવામાં સફળ એસએમસીની કાર્યવાહી વચ્ચે પુર્વ કચ્છ પોલીસ બેડામાં મોટા ફેરફાર કરવામાં આવ્યા

કચ્છમાં દારૂ ધુસાડવા માટે બુટલેગરો મરણીયા બન્યા હોય તેમ હજુ પશ્ચિમ કચ્છમાં બે દિવસ પહેલા ચાર કરોડ રૂપીયાનો વિક્રમી જથ્થો ઝડપાયા બાદ હવે ભચાઉ નજીકથી ફરી એસએમસીએ આવી કરોડો રૂપીયાનો દારૂનો જથ્થો ઝડપી પાડ્યો છે. બનાવની વિગતે વાત કરીએ તો પશ્ચિમ કચ્છમાં તાજેતરમાં પોલીસવડાની મુલાકાત પહેલા ભુજ નજીકના વડવાડા નજીકથી એસએમસીએ સ્થાનીક પોલીસને અંધારામાં રાખી વિક્રમી ચાર કરોડ રૂપીયાના દારૂ જે હરિયાણાથી ઝડપાયો હતો તેને ઝડપી પાડ્યો હતો. જે જથ્થો કુખ્યાત બુટલેગર નવધણ રાજગોર અને અનોપસિંહ તથા તેના સાગરીતો દ્વારા મંગાવવામાં આવ્યો હતો તેને ઝડપી પાડ્યો હતો. જે મામલે હજુ કાર્યવાહી શાંત થઇ નથી ત્યા ફરી પુર્વ કચ્છમાંથી એસએમસીએ મોટી કાર્યવાહી કરી કરોડો રૂપીયાનો દારૂ ઝડપી પાડ્યો છે. અગાઉ ભુજ નજક એસએમસીએ પાડેલો આ દરોડો સમગ્ર કચ્છમાં ટોક ઓફ ધી ટાઉન બન્યો હતો.આ સફળ કાર્યવાહી દરમ્યાન જસરામ જાગા ભરવાડ,રાપર,તથા વિશાલ બિરેન કર્માકર એસએમસીના હાથે ઝડપાઇ ગયા હતા જ્યારે કચ્છના લીસ્ટેડ દારૂના ધંધાર્થીનુ આ મામલે નામ ખુલ્યુ હતુ. જેમાં નવઘણ રાજગોર મરાજ ગણેશનગર,ભુજ તથા અનોપસિંહ અભેસિંહ રાઠોડ કેરા,તથા દેવો ખોડિદાસ કાપડી (ગાંધીધામ)નુ નામ મુખ્ય આરોપીમાં ખુલ્યુ છે. જ્યારે સ્પલાયર તરીકે મેવાત, હરિયાણાના રાહુલ ઉર્ફે મહાકાલ જબ્બરખાન પઠાણનુ નામ તપાસમાં ખુલ્યુ હતુ.આ સિવાય અન્ય સાગરીતો તથા વાહનોના આધારે 23 લોકોના નામ ખોલવામાં આવ્યા છે.જેમાં શિવરાજ વિરમ ગઢવી (અંજાર), રાહુલ મારાજ (ભુજ), ગોપાલ કેશાજી રાજગોર (પાન્ધો, અબડાસા), જેકી બાવાજી (ભુજ), કરણ ભૈયો (ગાંધીધામ), ગોપાલસિંહ બનેસિંહ વાઘેલા (પાન્ધો, અબડાસા), હાર્દિક મારાજ (ભુજ), કલ્પેશ મારાજ (ભુજ)ના નામ જાહેર કરાયા છે.જો કે હજુ પણ આરોપી પોલીસના હાથે લાગ્યો નથી. તેવામાં સોમવારે જાહેર થયેલી વધુ એક કાર્યવાહીમાં એસએમસીએ બાતમી આધારે ભચાઉ તાલુકાના વોંધ ગામે તળાવ પાસે આવેલા ખુલ્લા મેદાનમાં કટીંગ પહેલાજ કામગીરી કરી હતી. જેમાં 7080 નંગ દારૂની બોટલ જેની કિંમત 1 કરોડથી વધુ થાય છે તે સહિત 1,30 કરોડનો મુદ્દામાલ જપ્ત કર્યો હતો. તપાસ દરમ્યાન સોયાબીનના પ્લાસ્ટીકના થેલા પણ મળી આવ્યા હતા જેથી તેની આડામાં જથ્થો મંગાવવામાં આવ્યો હોય તેવી શક્યતા છે. જે મુદ્દામાલ કબ્જે કરી સ્થાનીક ભચાઉ પોલીસને મામલ સુપ્રત કરવામાં આવ્યો છે. એસએમસીના ઇન્સપેક્ટર એમ.એસ. ત્રિવેદીની ટીમ દ્વારા આ કાર્યવાહી કરવામાં આવી હતી.જે સાથે આ મામલે વધુ તપાસ હાથ ધરી અને ફરાર આરોપીઓને ઝડપવા માટે પોલીસ દ્વારા ચક્રો ગતિમાન કરવામાં આવ્યા છે.ગુજરાત દારૂ પ્રતિબંધ અધિનિયમની કલમો તળે કચ્છના કુખ્યાત દારૂ ધંધાર્થી તથા અજાણ્યા સપ્લાયર સામે ગુન્હો નોંધવામાં આવ્યો છે. જો કે અહી સવાલ એ થાય છે. કે આટલી કડક કાર્યવાહી છંતા સ્થાનીક પોલીસ અને છેક એસએમસીના દરોડો પછી પણ બુટલેગરો કરોડો રૂપીયાનો દારૂ કચ્છમાં ઠાલલવા માટે મરણીયા થયા છે. નહી તો સામાન્ય રીતે આવી કાર્યવાહી પછી આવી દારૂની હેરફેર પર રોક લાગી જતી હોય છે. પંરતુ હજુ તો ભુજ નજીક ગુજરાતના વિક્રમી દારૂના જથ્થો પકડવાના મામલામાં તપાસની સાહી સુકાઇ નથી ત્યા ફરી પુર્વ કચ્છમાં આવેલો કરોડોનો દારૂ ઝડપાઇ ગયો છે. જો કે આ કોઇ નવી વાત નથી થોડા સમયમાંજ કચ્છમાં એસએમસી તથા સ્થાનીક પોલીસે કરોડો રૂપીયાનો દારૂ ઝડપી પાડ્યો છે.

કુખ્યાત વોન્ટેડ આરોપીઓ સામે તપાસ 

એસએમસીએ પાડેલા આ દરોડોમાં પ્રાથમીક તપાસમાં સામે આવ્યુ છે. કે આ જથ્થો મંગાવવામાં અશોકસિંહ ઉર્ફે મામા બાલુભા જાડેજા રહે. ભચાઉ,અર્જુનસિંહ અશોકસિંહ જાડેજા,ભગિરથસિંહ દુર્ગાસિંહ જાડેજા,શિવમસિંહ જાડેજા માલ રીસીવ કરવાના હતા. આ સાથે કન્ટેનર ટ્રક માલિક,કન્ટેનર ટ્રક ડ્રાઇવર તથા દારૂ મોકલનાર અજ્ઞાત વ્યક્તિ સામે સમગ્ર મામલે ગુન્હો નોંધવામાં આવ્યો હતો હાલ તમામ લોકો ફરાર છે. જો કે અશોકસિંહ ઉર્ફે મામા બાલુભા જાડેજા અગાઉ પણ અનેક મામલામાં દારૂ મંગવવાના કિસ્સામાં પોલીસના હાથે ઝડપાયો પણ છે. અને તેનુ નામ મોટા દારૂની હેરફેરમાં સામે આવ્યુ છે.

કુખ્યાત બુટલેગરો પોલીસ પકડથી દુર !

એક તરફ એસએમસી ઉપરા ઉપરી કચ્છમાં દરોડો પાડી સ્થાનીક પોલીસની આબારૂના ધજાગરા ઉડાડી નાક કાપી રહી છે. તે વચ્ચે ભુજ નજીક થયેલી કામગીરીના આરોપી હજુ પણ પોલીસ પકડથી દુર છે. મહત્વની બ્રાન્ચ,સ્થાનીક પોલીસ કે રેન્જ કચેરીની રડારમાં આવા બુટલેગર કાર્યવાહીના આટલા દિવસો બાદ પણ હાથમાં ન આવતા કચ્છ પોલીસની કામગીરી સામે અનેક સવાલો ઉઠી રહ્યા છે. તો ભચાઉના કુખ્યાત બુટલેગરો પણ હજુ પોલીસની રડારમાં આવ્યા નથી. તેવામાં સરહદી જીલ્લામાં પોલીસની આવી ઢીલી નીતી અને કામગીરી અનેક સવાલો ઉઠાવી રહ્યુ છે.

દરોડા વચ્ચે પુર્વ કચ્છ પોલીસ બેડામાં મોટા ફેરફાર

તાજેતરમાં ભુજમાંથી વિક્રમી દારૂ પકડાયા બાદ રેન્જ આઇજી દ્વારા જવાબદાર સ્થાનીક પોલીસ તથા બ્રાન્ચમાં મોટા ફેરફાર કરતી કાર્યવાહી કરી હતી. જો કે પુર્વ કચ્છમાં એસએમસીના દરોડો વચ્ચે મોટા ફરેફાર કરવામાં આવ્યા હતા. જેમાં ભચાઉના PI એ.એ. જાડેજા,PSI ડી.જે. ઝાલાની લીવ રીઝર્વમાં બદલી કરવામાં આવી હતી. તો SOGના PI ડી.ડી. ઝાલા અને જિલ્લા ટ્રાફિક PSI ભચાઉમાં મૂકાયાં હતા. તો લાંબા સમયથી એલસીબીમાં ફરજ બજાવતા એન.એન.ચુડાસમાની કંડલા મરીનમાં બદલી,તેમના સ્થાને આડેસરના PI જે.એમ.વાળાની નિમણૂક કરાઇ હતી. તો ખડીરના PI એમ.એન. દવેની ગાગોદરમાં અને ગાગોદરના PI વી.એ. શેંગલ આડેસરમાં બદલી કરાઇ હતી. તો સામખિયાળી PI વી.કે. ગઢવીની IUCAWમાં અને લાકડીયા PI જે.એમ. જાડેજાની આર્થિક ગુના નિવારણ સેલમાં બદલી કરવાના હુકમ કરાયા હતા. આ સાથે એ ડિવિઝન PI વી.પી. આહીરની લાકડીયામાં,રાપરના એસ.વી. ચૌધરીની ખડીરમાં જ્યારે કંડલા મરીનના PI એ.એમ.વાળાની LIBમાં અને LIBના જે.એમ.ઝાલાની સામખિયાળી બદાલાયા હતા. સાથે અંજાર પોલીસ મથકના બી.જી. ડાંગરની SOGમાં, કંડલા એરપોર્ટના PI એ.જે. પરમારની AHTUમાં બદલી AHTUના એસ.ડી. સિસોદીયાની કંડલા એરપોર્ટ PI તરીકે ટ્રાન્સફર કરાઇ હતી. તો ગાંધીધામ સીટી ટ્રાફિક PSI ડી.જે. પ્રજાપતિની જિલ્લા ટ્રાફિકમાં અને મહિલા પો.સ્ટે.ના PSI એમ.જે. આહીરની ગાંધીધામ એ ડિવિઝનમાં ટ્રાન્સફર કરાઇ હતી. આમ પુર્વ કચ્છમાં એક સાથે મોટાભાગના અને મહત્વના તમામ પોલીસ મથકના અધિકારીઓની આંતરીક બદલીઓના હુકમ કરતા મોટો ફરેફરા કરાયો હતો. તો આ સાથે 70 જેટલા પોલીસ કર્મચારીઓની પણ આંતરીક બદલીના હુકમ કરાયા હતા.

સ્થાનીક પોલીસ સાથે રેન્જ પણ અંધારામાં ?

કચ્છમાં પાછલા કેટલાક દારૂના મોટા દરોડોમાં મોડી કાર્યવાહી અને સ્થાનીક પોલીસ સામે કોઇ નક્કર કામગીરી ન થઇ હોવાને લઇને સવાલો ઉઠી રહ્યા છે.તો કેટલાક જાગૃત નાગરીકો આવા કિસ્સામાં કેટલાક પોલીસ કર્મચારી અને અધિકારીની તપાસ માટેની પણ માંગ કરી રહ્યા છે. તે વચ્ચે સ્થાનીક પોલીસ સામે સવાલો તો ઉઠી જ રહ્યા છે.પરંતુ રેન્જ કચેરી સામે પણ સવાલો ઉઠે તે સ્વાભાવીક છે. કેમકે પધ્ધર પોલીસની હદ્દમાં પોલીસવડાની મુલાકાત પહેલા દારૂ પકડાયો તે મામલે રેન્જ આઇજીએ જવાબદાર અધિકારીઓને સંસપેન્ડ તો કર્યા પરંતુ કચ્છમાં થોડા સમયથી જે રીતે વિક્રમી દારૂ પકડાઇ રહ્યો છે.તે કિસ્સામાં એ પણ સવાલો ઉઠી રહ્યા છે.કે શુ રેન્જ કચેરીના હાબોશ અધિકારીઓ પણ આટલી મોટી દારૂની હેરફેરથી અજાણ હતા.? જે રીતે મહત્વની બ્રાન્ચ આવી કામગીરી પકડવામાં નિષ્ફળ રહી તે રીતે રેન્જ કચેરી પણ આવા મામલા કેમ પકડવામાં નિષ્ફળ રહી તે પણ સવાલો ઉભા કરે છે તેવામાં રેન્જ આઇજી આ તમામ મામલામાં ઉંડાણ પુર્વકની તપાસ કરે તે જરૂરી અને યોગ્ય છે. જો કે આવી કાર્યવાહી થશે કે નહી તે મોટો પ્રશ્ન છે.

તાજેતરમાં કચ્છ આવેલા રાજ્યના પોલીસવડાએ સમગ્ર ગુજરાતમાં દારૂને મોટી બદ્દી ગણાવી હતી સાથે પડકારનો સ્વીકાર પણ કર્યો હતો. પરંતુ બુટલેગરોની હિંમત,સામાજીક દુષણ સાથે સ્થાનીક પોલીસની નિષ્ક્રિયતા પણ આ દુષણ માટે એટલીજ જવાબદાર છે તેવામાં સામાન્ય વર્ગના કર્મચારી જ નહી પરંતુ ઉચ્ચકક્ષા સુધી આવા મામલાની સરકારે તપાસ કરાવવી જોઇએ તો જ સરહદી વિસ્તાર માટે ગંભીર આ દારૂની રેલમછેલ પર રોક આવશે