ફ્રી ફાયર ગેમમાં હિન્દુ નામ ‘જીગર’ ધારણ કરી સગીરાને પ્રેમજાળમાં ફસાવી બળાત્કાર ગુજારનાર અને ધર્માંતરણનું દબાણ કરનાર આરોપીને ભુજ કોર્ટે અંતિમ શ્વાસ સુધીની કેદ ફટકારી સગીરાના કઢંગા ફોટા વાયરલ કરી સગાઈ તોડાવનાર જિયાદ શેખને ૨ લાખનો દંડ અને આજીવન કેદની સજા કોર્ટે નોંધ્યું:આવા બનાવો સમગ્ર સમાજ, દેશ અને દરેક ધર્મ માટે જોખમરૂપ..
ભુજ, શનિવાર:
મોબાઈલ ગેમિંગ એપના માધ્યમથી ઓળખ છુપાવી,હિન્દુ સગીરાને પ્રેમજાળમાં ફસાવી, બળાત્કાર ગુજારી મુસ્લિમ ધર્મ અંગીકાર કરવા દબાણ કરવાના (લવ જેહાદ) ચકચારી કેસમાં ભુજ (કચ્છ)ના સ્પેશિયલ જજ જે.એ.ઠક્કર સાહેબની અદાલતે ઐતિહાસિક ચુકાદો આપ્યો છે.કોર્ટે મુખ્ય આરોપી જિયાદ ઉર્ફે જીગર ઉર્ફે સમીર લતીફ શેખને દોષિત ઠેરવીને અંતિમ શ્વાસ સુધીની સખત આજીવન કેદ’અને કુલ ૨,૦૦,૦૦૦/- ના દંડની આકરી સજા ફટકારી હતી.બનાવની વિગત મુજબ,મહારાષ્ટ્રના પુના જિલ્લાના ઇન્દાપુર તાલુકાના કાલઠન ગામના આરોપી જિયાદ શેખે હિન્દુ સગીરાઓને ફસાવવાના ઈરાદે ત્રણેક વર્ષ પહેલાં પોતાના મોબાઈલમાં ‘Free Fire Max’ નામની ગેમમાં પોતાનો અસલી ધર્મ છુપાવી ‘જીગર’ નામનું ફેક આઈડી બનાવ્યું હતું.ગેમ રમતી વખતે તેણે અનુસૂચિત જાતિની સગીર વયની ફરિયાદી બહેન સાથે મિત્રતા કેળવી હતી.સગીરા હોવાની જાણ હોવા છતાં તેને વિશ્વાસમાં લઈ,લગ્નની લાલચ આપી તેની સાથે બળજબરીપૂર્વક શારીરિક સંબંધ બાંધ્યો હતો.આટલેથી ન અટકાતાં આરોપીએ સગીરાની જાણ બહાર તેના કઢંગી હાલતના ફોટા પાડી લીધા હતા.આ ફોટા વાયરલ કરવાની ધમકી આપી ફરીથી મરજી વિરુદ્ધ સંબંધ બાંધ્યો હતો અને મુસ્લિમ ધર્મ અંગીકાર કરી નિકાહ કરવાનું દબાણ કર્યું હતું.સગીરાએ ધર્માંતરણનીના પાડતાં આરોપીએ તેને બદનામ કરવાના ઇરાદે તે ફોટા સોશિયલ મીડિયા પર અપલોડ કરી દીધા હતા,જેના કારણે સગીરાની સગાઈ પણ તૂટી ગઈ હતી.આ ગુનામાં તેને ગોધરા (તા. માંડવી)ના સહ-આરોપીઓ કાસમ ઓસમાણ હિંગોરજા અને અલ્તાફ જુમા લાખાએ રહેવા-જમવાની વ્યવસ્થા કરી આપી,ઇન્સ્ટાગ્રામ પર ફેક આઈડી બનાવવામાં અને ભોગ બનનારના પરિવારની રેકી કરવામાં મદદ કરી હતી.આ મામલે બોર્ડર રેન્જ ભુજ સાયબર પોલીસ સ્ટેશનમાં આઈપીસી,પોક્સો એક્ટ (કલમ ૪, ૬,૧૦), એટ્રોસિટી એક્ટ, ગુજરાત ધર્મ સ્વાતંત્ર્ય સુધારા અધિનિયમ ૨૦૨૧ (કલમ-૪) તથા આઈટી એક્ટ હેઠળ ગુનો નોંધાયો હતો.એસ.સી.એસ.ટી સેલના નાયબ પોલીસ અધીક્ષક એમ.જે.ક્રિશ્ચિયન દ્વારા તપાસ પૂર્ણ કરી કોર્ટમાં મજબૂત ચાર્જશીટ રજૂ કરવામાં આવી હતી.જે બાદ મુખ્ય જિલ્લા સરકારી વકીલ એચ.બી.જાડેજાએ પ્રોસીક્યુશન તરફે ધારદાર દલીલો કરી ૪૫ દસ્તાવેજી પુરાવા અને ૧૬ સાક્ષીઓ તપાસ્યા હતા.જે બાદ કોર્ટે ગુનાની ગંભીરતાને આધારે આરોપી જિયાદ લતીફ શેખને પોક્સો એક્ટની કલમ-૬ મુજબ અંતિમ શ્વાસ સુધીની સખત આજીવન કેદ અને ૧,૦૦,૦૦૦/-નો દંડ,ગુજરાત ધર્મ સ્વાતંત્ર્ય સુધારા અધિનિયમ કલમ-૪ મુજબ ૩ વર્ષની સખત કેદ અને ૫૦,૦૦૦/- નો દંડ તથા આઈ.ટી. એક્ટ કલમ ૬૬, ૬૭ મુજબ ૩ વર્ષની સખત કેદ અને ૫૦,૦૦૦/- નો દંડ ફટકાર્યો હતો.
દેશ અને સમાજ માટે આવા ગુના જોખમરૂપ: કોર્ટ
ચુકાદો આપતી વખતે નામદાર કોર્ટે ગંભીર નોંધ લેતા જણાવ્યું હતું કે,”ભારત દેશમાં ઘણા બધા ધર્મના લોકો વસવાટ કરે છે અને જો આવા પ્રકારના બનાવ બનતા રહે અને તેમાં સતત વધારો થતો રહે તો તે સંપૂર્ણ સમાજ,દેશ તેમજ દરેક ધર્મ માટે જોખમ સ્વરૂપ છે.અદાલતે ભોગ બનનાર સગીરાને ૪,૦૦,૦૦૦/- નું વળતર ચૂકવવા DLSA ને ભલામણ કરી છે.આ ઉપરાંત સી.ડબ્લ્યુ.સી. (CWC) તથા ડી.સી.પી.યુ. (DCPU) ને આદેશ કર્યો છે કે તેઓ પીડિતાનો સંપર્ક કરી તેનું જીવન અને શિક્ષણ ફરીથી સારી રીતે પુનઃસ્થાપિત થાય તે માટે યોગ્ય માર્ગદર્શન અને કાળજી લે…
સમગ્ર કચ્છમાં ચકચાર જગાવનાર આ કિસ્સામાં સ્થાનીક પોલીસ,રેન્જ કચેરી તથા સમગ્ર પશ્ચિમ કચ્છ પોલીસ ટીમે કડક અને નિષ્પક્ષ કાર્યવાહી સાથે કરેલા ચોંકવનારા ખુલાસાએ ભારે ચકચાર સર્જી હતી ત્યારે હવે કોર્ટે પણ મજબુત પુરાવાના આધારે આરોપીને કડક સજા સાથે સમાજ માટે આ કિસ્સાને ચિંતાજનક ટીપ્પણીઓ સાથે ચુકાદો આપ્યો છે.
