હોટલ-ધાબામાં ચેકીંગ દરમ્યાન કોમ્બિંગ સમયે નીલકંઠ ગેસ્ટ હાઉસમાંથી પંજાબ અને રાજસ્થાનના ૨ શખ્સો ગિરફ્તાર કચ્છમાં સ્થાનીક સંપર્કો અંગે વધુ તપાસ કરાશે
ભુજ
પશ્ચિમ કચ્છ-ભુજ પોલીસ દ્વારા ગુનાખોરી અને માદક પદાર્થોની હેરાફેરી રોકવા માટે હાથ ધરાયેલા વિશેષ હોટલ-ધાબા કોમ્બિંગ ડ્રાઇવ દરમિયાન એસ.ઓ.જી.,એલ.સી.બી. અને ભુજ શહેર એ/બી ડિવિઝન પોલીસને મોટી સફળતા સાંપડી છે.ભુજના જનતાઘર પાસે આવેલી નીલકંઠ ગેસ્ટ હાઉસમાંથી પોલીસે ૧૯,૩૦,૦૦૦ ની કિંમતના ૯૬.૫ ગ્રામ હેરોઇન સાથે બે શંકાસ્પદ મુસાફરોને ઝડપી લીધા હતા.સરહદી રેન્જ આઇ.જી.ચિરાગ કોરડીયા અને પશ્ચિમ કચ્છ એસ.પી. વિકાસ સુંડાની સુચનાથી હાથ ધરાયેલા ચેકિંગ દરમિયાન નીલકંઠ ગેસ્ટ હાઉસના રૂમમાંથી બે શંકાસ્પદ ઇસમો મળી આવ્યા હતા.પ્રાથમિક પૂછપરછમાં સામે આવ્યું છે કે બંને આરોપીઓ ભૂતકાળમાં પંજાબ રાજ્યમાં એન.ડી.પી.એસના ગુનામાં જેલમાં હતા,જ્યાં તેઓ એકબીજાના સંપર્કમાં આવ્યા હતા.તેઓ પંજાબથી ટ્રેન મારફતે માદક પદાર્થનો આ જથ્થો ગુજરાતમાં છૂટકમાં વેચવાના ઇરાદાથી લાવ્યા હોવાની કબૂલાત પોલીસ તપાસ દરમ્યાન આપી હતી.પોલીસે હોટલમાં બાતમી આધારે તપાસ કરી ત્યારે રામજસ ઉર્ફે રમેશ પ્રતાપરામ ગોદારા (બિશ્નોઈ) (ઉં.વ. ૨૫, રહે. રામનગર, રામેરી, તા. બાપ, જી. જોધપુર, રાજસ્થાન) હરપ્રીતસિંઘ બલવિન્દરસિંઘ (ઉં.વ. ૪૨, રહે. મ.નં. ૨૧૧, ગામ ગુરુહરસહાઇ, જી. ફિરોઝપુર, પંજાબ) મળી આવ્યા હતા જેની પાસેથી ૯૬.૫ ગ્રામ હેરોઇન ૧૯,૩૦,૦૦૦ની કિંમતો જપ્ત કરવામાં આવ્યો હતો.પોલીસે બંને આરોપીઓ વિરુદ્ધ ભુજ શહેર એ-ડિવિઝન પોલીસ સ્ટેશનમાં એન.ડી.પી.એસ. એક્ટ હેઠળ ગુનો નોંધી આગળની કાયદેસરની કાર્યવાહી હાથ ધરી છે.છેલ્લા ૩ મહિનામાં પશ્ચિમ કચ્છ પોલીસે ૩૦ કરોડથી વધુનો ડ્રગ્સ ઝડપ્યો સાથે છેલ્લા ત્રણ મહિનામાં એન.ડી.પી.એસ.એક્ટ હેઠળ કડક કામગીરી કરવામાં આવી છે: જેમાં કુલ ૨૪ કેસોમાં ૨૫ આરોપીઓ ઝડપાયા છે. જ્યારે ૫૪.૭૭૪ કિલોગ્રામ માદક પદાર્થ જપ્ત કરાયો છે.જેમાં હેરોઇન, ચરસ, ગાંજો અને પોષડોડાનો સમાવેશ થાય છે.કચ્છમાં કોની મદદથી તેઓ આ માદક પ્રદાર્થ ધુસાડવાના ઇરાદા ધરાવતા હતા તે અંગે વધુ તપાસ પોલીસ દ્વારા શરૂ કરવામાં આવી છે.
