લાંબા સમય બાદ રેવન્યુ વિભાગ અને ખાસ કરીને ભુજમાં સરકારી કચેરીમાં એસીબીની કાર્યવાહીથી ફફડાટ ફેલાયો છે.જીલ્લાના ઉચ્ચ અધિકારીઓના નાક નીચે કર્મચારીએ લાંચ લેવાની કરેલી હિંમત દર્શાવે છે. કે સરકારી વિભાગમાં ભષ્ટ્રાચાર ફુલ્યો ફાલ્યો છે.જે પુરાવો આ કાર્યવાહી છે.
ભુજ મામલતદાર કચેરીમાં ACB એ સપાટો બોલાવ્યો હતો. અને ખેડૂત ખાતેદારના દાખલા માટે રૂ. ૩૫,૦૦૦ ની લાંચ લેતા રેવન્યુ તલાટીને ઝડપી પાડ્યો હતો. ફરીયાદના આધારે ભુજ પ્રાંત અને મામલતદાર કચેરીમાંથી રૂ. ૩૫ હજારની લાંચ લેતા તલાટી વર્ગ-૩ ચંદુભાઈ હરણને રંગેહાથ પકડી લેવાયો હતો.વિગતે વાત કરીએ તો ભુજ શહેર મામલતદાર કચેરી ખાતે ફરજ બજાવતા રેવન્યુ તલાટી વર્ગ-૩ ને એસીબીની ટીમે રૂ. ૩૫,૦૦૦ ની લાંચ લેતા પ્રાંત અને મામલતદાર કચેરી પરિસરમાંથી જ રંગેહાથે ઝડપી પાડ્યો હતો. જેના પગેલે લાંચિયા અધિકારીઓમાં ફફડાટ વ્યાપી ગયો છે.ઘટનાની વિગત મુજબ,આ કામના ફરિયાદી (એક જાગૃત નાગરિક) ની વડીલોપાર્જિત ભુજ ખાતે આવેલી જમીન ગત તા.૨૭/૦૩/૨૦૨૬ ના રોજ રજિસ્ટર દસ્તાવેજથી વેચાણ કરવામાં આવી હતી.આ જમીન વેચાઈ ગયા બાદ ફરિયાદી પાસે અન્ય કોઈ ખેતીની જમીન બાકી રહેતી ન હોવાથી,તેમણે પોતાનો ખેડૂત ખાતેદારનો દરજ્જો ચાલુ રાખવા માટે ‘ખેડૂત ખાતેદારના દાખલા’ ની જરૂર હતી.આ દાખલો કાઢી આપવાના અવેજ પેટે મામલતદાર કચેરી ભુજ (શહેર)ના રેવન્યુ તલાટી વર્ગ-૩ ચંદુ ગેલાભાઇ હરણ (ઉં.વ.૩૪) દ્વારા શરૂઆતમાં રૂ. ૪૦,૦૦૦ ની ગેરકાયદેસર લાંચની માંગણી કરવામાં આવી હતી.ત્યારબાદ રકઝકના અંતે રૂ. ૩૫,૦૦૦ ની રકમ નક્કી થઈ હતી અને તે રકમ આજે આપવાનો વાયદો કરાયો હતો.ફરિયાદી આ ગેરકાયદેસર લાંચની રકમ આપવા માંગતા ન હોવાથી તેમણે તુરંત જ ભુજ એ.સી.બીનો સંપર્ક કરી ફરિયાદ નોંધાવી હતી.ફરિયાદના આધારે એસીબીની ટીમે છટકું ગોઠવ્યું હતું. જે બાદ આજે પ્રાંત અને મામલતદાર કચેરી ભુજ-કચ્છ ખાતે છટકા દરમિયાન આરોપી તલાટી ચંદુ હરણ ફરિયાદી સાથે હેતુલક્ષી વાતચીત કરી રૂ. ૩૫,૦૦૦ ની લાંચની માંગણી કરી,રકમ સ્વીકારતા જ સ્થળ પર હાજર એસીબીની ટીમે તેમને રંગેહાથે પકડી પાડ્યા હતા.એસીબીએ લાંચની સંપૂર્ણ રૂ. ૩૫,૦૦૦ ની રકમ રિકવર કરી આરોપી સામે કાયદેસરની ગુનાહિત કાર્યવાહી હાથ ધરી છે. આ કામગીરીમાં સુપર વિઝન અધિકારી કે.એચ.ગોહિલના માર્ગદર્શનમાં ભૂજ એ.સી.બીના જે.જે.ચૌધરી દ્વારા આ કાર્યવાહી કરવામા આવી હતી.
તાજેતરમાં જ રેવન્યુ વિભાગમાં થયેલી બદલીઓ સમયે પણ સરકારી કચેરીમાં કેટલાક ચીપકી ગયેલા અને ચર્ચમાં રહેતા કર્મચારીઓની બદલીઓને લઇને ભારે ચર્ચા હતી. તેવામાં રેવન્યુ તલાટી લાંચ લેતા ઝડપાતા ભષ્ટ્ર કર્મચારીઓમાં ફફડાટ ફેલાયો છે. આ કાર્યવાહી પછી જીલ્લા કલકેટર પણ આવા મામલામાં યોગ્ય તપાસ કરી આવા ચર્ચામાં રહેતા કર્મચારીઓ સામે લાલ આંખ કરે તે જરૂરી છે…..
