ખાણખનીજ વિભાગે દરોડો પાડી ૧.૦૭ કરોડનો મુદ્દામાલ જપ્ત કર્યો વરલીના ગ્રામજનોની ફરિયાદ બાદ ફ્લાઈંગ સ્ક્વોડ અને પ્રાંત અધિકારીની સંયુક્ત કાર્યવાહીમાં ૬ વાહનો સીઝ કરાયા જો કે કચ્છમાં વ્યાપક અને સુનિયોજિત ખનિજ ચોરી સામે તંત્રની કાર્યવાહી નહીં સમાન હોવાનો જાગૃતોનો સૂર
ભુજ:
કચ્છ જિલ્લામાં ગેરકાયદે ખનન પ્રવૃત્તિઓ સામે તંત્ર દ્વારા લાલ આંખ કરવામાં આવી છે. કલેક્ટર,કચ્છના માર્ગદર્શન હેઠળ ફ્લાઈંગ સ્ક્વોડ-કચ્છ અને પ્રાંત અધિકારી ભુજની સંયુક્ત તપાસ ટીમે ભુજ તાલુકાના સાકરાઈ ટીમ્બો સીમ વિસ્તારમાં અચાનક દરોડો પાડી ગેરકાયદે ખનન કૌભાંડનો પર્દાફાશ કર્યો હતો. આ સમગ્ર કાર્યવાહીમાં રૂ. ૧.૦૭ કરોડનો મુદ્દામાલ જપ્ત કરવામાં આવ્યો છે.વરલી ગામના જનો દ્વારા ગેરકાયદે ખનન અંગે કલેક્ટર કચેરી ખાતે રજૂઆત અને ફરિયાદ કરવામાં આવી હતી. આ ફરિયાદને ગંભીરતાથી લઈને ફ્લાઈંગ સ્ક્વોડ-કચ્છ તથા ભુજ પ્રાંત અધિકારીની ટીમ દ્વારા પધ્ધર પોલીસ સ્ટેશનના સ્ટાફને સાથે રાખીને સાકરાઈ ટીમ્બો ખાતે સીમ વિસ્તારમાં આકસ્મિક દરોડો પાડવામાં આવ્યો હતો.જેમાં સાદી માટીનું ગેરકાયદે ખનન ઝડપાયું હતુ.તપાસ દરમિયાન ઘટનાસ્થળે સાદી માટી ખનિજનું કોઈ પણ પરવાનગી વગર ગેરકાયદેસર રીતે ખોદકામ અને વહન થઈ રહ્યું હોવાનું સામે આવ્યું હતું. સંયુક્ત ટીમે સ્થળ પરથી એક્સેવેટર મશીન ,લોડર,ટ્રેક્ટર એમ કુલ મળીને ૦૬ વાહનો ઝડપી પાડ્યા હતા. પંચોની રૂબરૂ માપણી કરી સરકારી ટીમે જપ્ત કરાયેલા તમામ ૦૬ વાહનોને સીઝ કરી કાયદેસરની આગળની કાર્યવાહી અર્થે પધ્ધર પોલીસ સ્ટેશનના સુપ્રત કર્યા હતા. આ ઉપરાંત પંચોની રૂબરૂમાં ખનન વાળા સમગ્ર વિસ્તારની ચોક્કસ માપણી પણ હાથ ધરવામાં આવી હતી તંત્ર દ્વારા રૂ. ૧.૦૭ કરોડની કિંમતનો મુદ્દામાલ જપ્ત કરી ખાણ અને ખનિજ નિયમો અનુસાર દંડકીય તથા કાયદેસરની કડક કાર્યવાહી કરવાની તજવીજ હાથ ધરવામાં આવી છે. તંત્રની આ સરપ્રાઈઝ ચેકિંગથી ખનિજ માફિયાઓમાં ભારે ફફડાટ વ્યાપી ગયો છે. જો કે ગ્રામજનો એ ખનીજ ચોરી સામે પડકાર ન ફેકી અને તંત્ર ની મદદ થી આ પ્રવુતિ ન અટકાવી હોત તો મોટી ખનિજ ચોરી ને અંજામ અપાઈ ગયો હોત ત્યારે ગ્રામજનોના વિરોધ અને હોબાળા સાથે તંત્ર પણ આવી પ્રવૃતિ અટકાવવા માટે નેટવર્ક ઊભું કરે તે જરૂરી છે….
મોટા માથાઓ પર ક્યારે થશે કાર્યવાહી ?
ગ્રામજનો અને જાગૃત લોકો તથા બાતમી આધારે ખાણ ખનિજ વિભાગ સહિતના તંત્ર દ્વારા કલેક્ટરની સૂચના મુજબ કાર્યવાહી કચ્છના વિવિધ વિસ્તારમાં કરે છે પરંતુ લખપત વિસ્તારમાં વ્યાપક ખનિજ ચોરી જળ સંચયના નામે થઈ હોવાની વ્યાપક ફરિયાદ છતાં ન કરાતી હોવાનું અને જવાબદારી ની ફેંકાફેંકી કરાતી હોવાનો કેટલાક જાગૃત નાગરિકો દાવો કરી રહ્યા છે. સાથે જો યોગ્ય તપાસ કરવામાં આવે તો મોટું ખનિજ ચોરી કોભાંડ બારે આવે તેમ છે તેવો સૂર વ્યક્ત કરી રહ્યા છે. લખપત વિસ્તારમાં સુનિયોજિત રીતે ખનીજ ચોરી નુ મોટું કારસ્તાન થયું છે.તેવામાં જોવું રહ્યું કે તંત્ર અહીં તપાસ માટે કલેક્ટરના માર્ગદર્શન હેઠળ ક્યારે પહોંચે છે. જો કે કાર્યવાહી નહી થાય તો પણ ભવિષ્યમાં જાગૃત નાગરિકોના મતે આવા મામલા ચોક્કસથી પ્રકાશમાં આવશે…
કચ્છમાં તંત્ર અને ખાસ કરીને ખાણ ખનીજ વિભાગ કાર્યવાહી કરે છે પરંતુ ચોક્કસ વિસ્તારમાં ફરિયાદો છતાં તંત્ર સફળ કામગીરી કરવામાં નિષ્ફળ જઈ રહ્યું છે. ત્યારે માત્ર નીચેના લોકો ને પકડી સંતોષ માનવાના બદલે ઊંડી તપાસ કરી મોટા માથા સુધી કાર્યવાહી થાય તે કચ્છના હિતમાં છે….બાકી વાહવાહી મેળવવા માટે આટલી કામગીરી પૂરતી છે….
