માંડવીના ચકચારી અને સમાજ માટે સર્મનાક કિસ્સામાં ભુજની નામદાર સ્પેશિયલ અદાલતે આ ઐતિહાસિક હુકમ સંભળાવી આજીવન સખત કેદની સજા સાથે પિતાને દંડ ફટકાર્યો
સગીર પુત્રીને મરવા મજબૂર કરનાર નિર્દય પિતાને ભુજ કોર્ટે આજીવન કેદ ફટકારી છે. ઘટનાની વિગતો મુજબ,માંડવીના દીવાદાંડી પાસે રહેતો અને ઓમાન ખાતે કામધંધો કરતો આરોપી કમલેશ પરષોત્તમ કષ્ટવાલા (ઉંમર વર્ષ ૪૭), અવાર-નવાર માંડવી પોતાના ઘરે આવતો-જતો હતો.આ દરમિયાન તેણે પોતાની જ ૧૭ વર્ષની સગીર દીકરી સાથે વિડીયોકોલ તેમજ રૂબરૂમાં અશ્લીલ અને બીભત્સ વાતો કરી હતી.તેણે દીકરીને માનસિક ત્રાસ આપીને તેની પાસે અયોગ્ય માગણીઓ મૂકી હતી.પિતાના આ કૃત્ય અને દુષ્પ્રેરણથી તંગ આવીને દીકરીએ ગળે ફાંસો ખાઈ આત્મહત્યા કરી લીધી હતી.આ મામલે ૨૦ સપ્ટેમ્બર ૨૦૨૧ ના રોજ માંડવી પોલીસ સ્ટેશનમાં IPC ૩૦૬ મુજબ ગુનો નોંધાયો હતો.તપાસ અધિકારી પોલીસ ઇન્સ્પેક્ટર આર.સી.ગોહિલ દ્વારા પૂરતા પુરાવા સાથે કોર્ટમાં ચાર્જશીટ રજૂ કરવામાં આવી હતી.ટ્રાયલ દરમિયાન પીડિતા સગીર હોવાનું સામે આવતા કોર્ટે કલમમાં સુધારો કરી IPC ૩૦૫ (સગીરને આત્મહત્યા માટે ઉશ્કેરવું) હેઠળ કેસ ચલાવ્યો હતો.પ્રોસિક્યુશન તરફે મુખ્ય જિલ્લા સરકારી વકીલ એચ.બી.જાડેજા એ ૧૭ દસ્તાવેજી પુરાવા અને ૧૦ સાક્ષીઓની તપાસ કરીને ધારદાર દલીલો રજૂ કરી હતી, જેના આધારે કોર્ટે આરોપીને તકસીરવાન ઠેરવી સજા ફટકારી હતી જેમાં IPC કલમ ૩૦૫ હેઠળ: આજીવન સખત કેદની સજા અને રૂ. ૧,૦૦,૦૦૦/- નો દંડ,પોક્સ-એક્ટ (POCSO) કલમ ૧૨ હેઠળ: ૩ વર્ષની સખત કેદ અને રૂ. ૫,૦૦,૦૦૦/- નો દંડ સાથે પીડિતાની માતાને રૂ. ૫,૦૦,૦૦૦/-(પાંચ લાખ નો વળતર ચૂકવવા DLSA (ડી.એલ.એસ.એ.) ને ભલામણ કરાઈ હતી. સમાજ માટે કલંકરૂપ આ કિસ્સામાં અદાલતે આપેલો આ કડક હુકમ દાખલારૂપ સાબિત થશે. સગીર દીકરીને આત્મહત્યા માટે મજબૂર કરનાર પાપી પિતાને આજીવન કેદ અને ₹૧ લાખનો દંડ પણ ભુજ સ્પેશિયલ કોર્ટે ફટકાર્યો હતો.આ અંગે ૨૦/૦૯/૨૦૨૧ ના રોજ ફરિયાદ નોંધાઈ હતી.
