ભાવનગરમાં લઠ્ઠાકાંડ વચ્ચે ગુજરાતમાં અનેક સ્થળે દારૂ પર મોટી કાર્યવાહી કચ્છમાં રતાડિયા ગામની સીમમાંથી લાખોનો દારૂ ઝડપાયો,ગાંધીધામમાં ગળપાદર ખાતેથી વિદેશી દારૂના જથ્થા સાથે એક શખ્સ ઝડપાયો,કોડાય નજીકથી લાખોનો દારૂ ઝડપી પોલીસે અનેક દરોડો પાડ્યા
ભાવનગરમાં લઠ્ઠકાંડના પગલે રાજ્યભરની પોલીસ એલર્ટ થઇ ગઇ છે. અને દારૂના વહેંચાણ પર કાર્યવાહી કરાઇ રહી છે. તે વચ્ચે કચ્છમાં દારૂના સફળ દરોડા પોલીસે પાડ્યા હતા.જેમાં પશ્ચિમ કચ્છ ભુજ લોકલ ક્રાઇમ બ્રાન્ચની ટીમે કોડાય પોલીસ સ્ટેશન હદ વિસ્તારમાં બાતમીના આધારે દરોડો પાડીને ભારતીય બનાવટના વિદેશી દારૂ અને કાર સહિત કુલ ૩,૫૩,૦૪૦/- નો મુદ્દામાલ જપ્ત કર્યો છે.પોલીસે અમૃત શામજી રામાણી (રહે. બીડડા વાડી વિસ્તાર, તા. માંડવી) ની ઘટનાસ્થળેથી પકડ કરી હતી. જ્યારે જ્યારે અન્ય બે આરોપીઓ અર્જુન ભીખા સંઘાર અને બાબુ મંગા સંઘાર (બંને રહે. બીડડા, તા. માંડવી) નાસી છૂટવામાં સફળ રહ્યા હતા.બીજી તરફ હાથ ધરાયેલી કાર્યવાહીમાં પોલીસે વિદેશી દારૂની ૮૫ બોટલો અને ૨૪ બીયરના ટીન સહિત ૨,૩૨,૦૦૦નો મુદ્દામાલ જપ્ત કર્યો હતો.આ કેસમાં આરોપી અર્જુન ભીખા સંઘાર હાજર મળી આવ્યો ન હતો.તો બીજી તરફ પૂર્વ-કચ્છ ગાંધીધામ વિસ્તારમાં પ્રોહિબિશનની અસામાજિક પ્રવૃત્તિઓ નાબૂદ કરવા માટે હાથ ધરાયેલી ખાસ ઝુંબેશ અંતર્ગત ગાંધીધામ એ ડિવિઝન પોલીસ સ્ટેશને બાતમીના આધારે દરોડો પાડી ગળપાદર વિસ્તારમાંથી ભારતીય બનાવટના વિદેશી દારૂના જથ્થા સાથે એક આરોપીને ઝડપી લીધો હતો.સર્વેલન્સ સ્ટાફના કર્મચારીઓ પેટ્રોલીંગમાં હતા તે દરમિયાન મળેલી ખાનગી બાતમીના આધારે ગળપાદર ખાતે સફળ દરોડો પાડવામાં આવ્યો હતો. દરમ્યાન આરોપી સચીન ઉર્ફે સતલો વિનોદ ચૌહાણ (રહે. ગળપાદર, ગાંધીધામ)ના કબ્જામાંથી ૧૮૦ એમ.એલ. ના વિદેશી દારૂના ૨૪૦ ક્વાર્ટર કિંમત ૩૩,૬૦૦ જપ્ત કરવામાં આવ્યો હતો.આ તરફ પ્રાથમીક વિગતો મુજબ મુંદરા તાલુકાના રતાડિયા ગામની સીમમાં કાર્યરત હાઈવે હોટેલ પર પાર્ક કરાયેલી ટ્રકમાંથી ૧૬.૪૧ લાખનો અંગ્રેજી પ્રકારના શરાબનો જથ્થો પોલીસે પકડી પાડ્યો હતો.પ્રાગપર પોલિસ દ્વારા ટ્રક ડ્રાઈવર સમીર નુરમામદ જુણેજા (જામનગર) અને તેની જોડે રહેલા અસલમ ઓસમાણ કુરેશી ભુજવાળાની ધરપકડ કરી દારૂનો મોટો જથ્થો જપ્ત કર્યો હતો. પ્રાથમીક વિગત મુજબ મહેસાણા જિલ્લાના કટોસણ ગામ નજીકથી રામ ઊર્ફે ઈન્દુ મારવાડીના કહેવાથી શરાબ ભરેલી ટ્રક મુંદરા તરફ રવાના થઈ હોવાનું અને ટ્રક ભુજ લઈ જવાની હોવાનું પોલીસની પ્રાથમિક પૂછપરછમાં બહાર આવ્યું હતુ.ભુજના ટ્રક માલિક કાસમ કરીમ સમા (સુરલભીટ્ટ રોડ) સહિત ચારે સામે ગુનો દાખલ કરી લાખો રૂપીયાનો દારૂ જપ્ત કરાયો હતો. આ ઉપરાંત ગઇકાલે દેશી વિદેશી દારૂ પર પણ કચ્છમાં કાર્યવાહી કરી ચેકીંગ હાથ ધરવામાં આવ્યુ હતુ.
