થોડા દિવસ પહેલા જ શરૂ થયેલી ફેક્ટરીમાં બોર્ડર રેન્જની ટીમ ત્રાટકતા રોયલ ચેલેન્જ બ્રાન્ડની ખાલી બોટલ, કેમિકલનો મોટો જથ્થો ઝડપાયો બે આરોપીની ધરપકડ કરી વધુ તપાસનો આંરભ માલ બની બજારમાં જાય અને દુર્ધટના સર્જાઇ તે પહેલાજ કાર્યવાહી, એફએસએલ તપાસ બાદ કેમિકલની વિગત સ્પષ્ટ થશે
ગુજરાતમાં તાજેતરમાં ભાવનગરમાં સર્જાયેલા ઇંગ્લીશ ડુપ્લીકેટ દારૂથી લઠ્ઠાકાંડની ધટના હજુ તાજી છે. અને ગુજરાતમાં ઠેરઠેર પોલીસ કડક કાર્યવાહી કરી છે. તે વચ્ચે આદિપુરમાં નકલી દારૂ બનાવતી ફેક્ટરી બોર્ડર રેન્જ આઇજી ચિરાગ કોરડિયાની ટીમ દ્વારા ઝડપી પાડવામાં આવી કાર્યવાહી હાથ ધરવામાં આવી છે. પોલીસે આદિપુરમાં રિધ્ધી-સિધ્ધી કોમ્પલેક્ષ,દુકાન નંબર ૪૬, ૪-એ વિસ્તારમાં દરોડો પાડ્યો હતો જેમાં કેમિકલમાં પાણી ભેળવીને ઈંગ્લિશ દારૂ તૈયાર કરાતો હોવાનો પ્રાથમિક ખુલાસો થયો છે.રેન્જની ટીમે સ્થળ પરથી અંદાજે 600 લીટર કેમિકલ ભરેલા વિવિધ કેરબા કબજે કર્યા હતા. સાથે દુકાનમાંથી રોયલ ચેલેન્જ બ્રાન્ડની 180 MLની ખાલી બાટલીઓ પણ કબ્જે કરી હતી.દારૂની બોટલ તૈયાર કરવા માટેનું સીલિંગ મટિરિયલ સહિતનો મુદ્દામાલ પણ તપાસ દરમ્યાન જપ્ત કરાયો હતો. જેની તપાસ શરૂ કરાઇ હતી.જો કે હજુ ચાર દિવસ પહેલાજ કામગીરી શરૂ કરાઇ હતી પરંતુ બાતમી આધારે બોર્ડરની ટીમે દરોડો પાડ્યો હતો. જોકે કેવા પ્રકારના કેમીકલનો ઉપયોગ થતો હતો તે જાણવા માટે સ્થળ પર FSLની ટીમને બોલાવવામાં આવી હતી. અને નકલી દારૂ બનાવવા માટે કયું કેમિકલ વપરાયું હતું તે FSLની તપાસ બાદ સ્પષ્ટ થશે જો કે પ્રાથમીક રીતે સ્થાનીક પોલીસમાં આ અંગે ફરીયાદ નોંધવાની તજવીજ હાથ ધરી પોલીસે સમગ્ર મામલે વધુ તપાસ હાથ ધરી છે. કચ્છમાં અગાઉ પણ અંજાર વિસ્તારમાંથી ડુપ્લીકેટ દારૂ બનાવવાનુ કારસ્તાન ઝડપાયુ હતુ જો કે હાલ જ્યારે ગુજરાતમાં લઠ્ઠાકાંડ પછી પોલીસ કડક કાર્યવાહી કરી રહી છે તે વચ્ચે કચ્છમાં ઝડપાયેલુ આ કારસ્તાન વધુ ગંભીર છે. જો કે આ અંગે પોલીસની સત્તાવાર ફરીયાદ બાદ વધુ વિગતો સ્પષ્ટ થશે પોલીસે સમગ્ર મામલે હિતેશકુમાર ખીમજી બાંભણીયા (ઉ.વ. ૩૩, રહે.પી.એમ. રોડ,શાંતાક્રુઝ,મુંબઈ) રાધાકિશન ડાલચંદ જાટ (ઉ.વ. ૪૪, રહે. બરચાવલી, તા. છાતા, જી. મથુરા, ઉત્તર પ્રદેશ)ની ધરપકડ કરી હતી. હિતેશ પટેલે અન્ય આરોપી સાથે મળીને ધંધો શરૂ કર્યો હોવાનું સામે આવ્યું છે. પોલીસની પ્રાથમીક તપાસમાં વિદેશી દારૂ બનાવવાનું કેમીકલ ૧૦૫૦ લીટર કિંમત ૫,૨૫,૦૦૦,રોયલ ચેલેન્જ કંપનીના ખાલી ક્વાર્ટર ૯૪૦૦ નંગ,ભરેલા ક્વાર્ટર ૬૦૦ નંગ,બોટલ સીલ કરવાનું મશીન ૧,થર્મોમીટર ૧ નંગ અને કલર ૧ કિગ્રા સહિત ૭,૩૮,૦૦૦નો મુદ્દામાલ જપ્ત કર્યો છે.આ સફળ રેઇડ પોલીસ મહાનિરીક્ષક ચિરાગ કોરડિયાના માર્ગદર્શન હેઠળ પોલીસ ઇન્સ્પેક્ટર એલ.પી.બોડાણા,પો.સબ.ઇન્સ. એમ.એચ. જાડેજા,એ.પી. વાઘેલા, અને ડી.સી. ઠાકોર તથા તેમની ટીમ દ્વારા કરવામાં આવી હતી.આરોપીઓ વિરુદ્ધ આદીપુર પોલીસ સ્ટેશન ખાતે પ્રોહિબિશન ધારા હેઠળ ગુનો નોંધી કાયદેસરની કાર્યવાહી હાથ ધરવામાં આવી છે. અને વધુ તપાસ એલસીબીને સોંપવામાં આવી છે.
થોડા સમય પહેલા અંજારમાં પકડાઇ હતી..
કચ્છના અંજાર તાલુકાના સતાપર ગામે ચાલતી ડુપ્લીકેટ વિદેશી દારૂની ફેક્ટરી પર પૂર્વ કચ્છ લોકલ ક્રાઈમ બ્રાંચએ આકસ્મિક દરોડો પાડીને એક મોટા ગેરકાયદેસર કારોબારનો પર્દાફાશ કર્યો હતો.પોલીસે સ્થળ પરથી દારૂ બનાવવાની સામગ્રી અને તૈયાર બોટલો સહિત કુલ રૂ. 8.79 લાખથી વધુનો મુદ્દામાલ કબજે કર્યો હતો.આરોપીઓ દ્વારા સસ્તા કેમિકલ અને ફ્લેવરનો ઉપયોગ કરીને જાણીતી બ્રાન્ડના ડુપ્લીકેટ દારૂ બનાવવામાં આવતો હતો.પોલીસે સ્થળ પરથી દારૂ ભરવાના મશીનો,સીલિંગ મશીન,કેમિકલ અને ડુપ્લીકેટ લેબલવાળી હજારો બોટલો જપ્ત કરી હતી.આ કેસમાં મુખ્ય બે આરોપીઓ સુનિલ શામજી માતા અને રમજાન જુણેજાની ધરપકડ કરવામાં આવી હતી. જ્યારે કિશોર વ્યાસ અને રાજેશ પ્રજાપતિનુ નામ ખુલ્યુ હતુ. તેવામાં હવે આદિપુરમાં પણ આવુ નેટર્વક ઝડપાયુ છે.
લઠ્ઠાકાંડ વચ્ચે પોલીસે કરેલી કાર્યવાહી સુચક છે. જો કે સમગ્ર મામલે લવાતા કેમીકલ સહિતના મામલે પોલીસ સાથે પુરવઠા વિભાગ પણ ઉંડાણ પુર્વક તપાસ કરે તે જરૂરી છે. નહી તો કચ્છમાં પણ કોઇ મોટો કાંડ સર્જાઇ શકે.જો કે હાલ તો પોલીસની સમયસુચકતાથી દારૂ બની બજારમાં ઉતરે તે પહેલાજ તેને પકડી પડાયો છે. જો કે દારૂના દુષણ સાથે હવે ડુપ્લીકેટ દારૂની પ્રવિૃતિ અટકાવવી પોલીસ માટે એક પડકાર રહેશે…
