ભુજ કોર્ટમાં બનેલા ગંભીર બનાવ બાદ પ્રિન્સિપાલ ડિસ્ટ્રીક્ટ જજ ડી.પી. મહિડાની અધ્યક્ષતામાં મળેલી બેઠકમાં ઝડપી ચાર્જસીટ સાથે ટ્રાયલ ઝડપી કરવા તાકિદ સાથે પોલીસ અધિકારી એમ. જે. ક્રિશ્ચિયનની કામગીરીની પ્રસંશા કરાઇ
ભુજની સેશન્સ કોર્ટ પરિસરમાં એક યુવક પર તીક્ષ્ણ હથિયારથી જીવલેણ હુમલો કરવાના બનાવના સમગ્ર કચ્છમાં ગંભીર પડધા પડ્યા છે.આરોપીએ જૂની અદાવતમાં યુવકના પેટના ભાગે છરીનો ઊંડો ઝીંકી દીધો હતો.જો કે પોલીસની સમય સુચકતાથી લોકોએ કરેલા હુમલામાં ગંભીર બનાવ બનતા અટક્યો હતો. જો કે ગઈકાલે ભુજ સેશન્સ કોર્ટ ખાતે બનેલ બનાવની ગંભીર નોંધ લઈને તે અનુસંધાને ભુજ ખાતેના પ્રિન્સિપાલ ડિસ્ટ્રીક્ટ જજ ડી.પી.મહિડા દ્વારા તેઓની ચેમ્બરમાં એક ખાસ મિટીંગ બોલાવવામાં આવી હતી.પ્રિન્સિપાલ ડિસ્ટ્રીક્ટ જજ ડી.પી. મહિડાના અધ્યક્ષસ્થાને યોજાયેલી આ મિટીંગમાં જિલ્લા સરકારી વકીલ એચ.બી. જાડેજા,ઈન્ચાર્જ એસ.પી. એમ.જે.ક્રિશ્ચિયન,બાર એસો. પ્રમુખ સચિન ગોર તથા કોર્ટ ખાતેના અન્ય અધિકારીઓ હાજર રહ્યા હતા.આ મિટીંગમાં મહિડા દ્વારા કેટલાક સૂચનો આપવામાં આવ્યા હતા. જેમાં સૌ પ્રથમ બનાવમાં ત્વરિત દરમ્યાનગીરી કરી ખૂન જેવો ગંભીર ગુનો બનતો અટકાવી વ્યક્તિનો જીવ બચાવવા બદલ એમ.જે.ક્રિશ્ચિયનની કામગીરીની પ્રસંશા કરવામાં આવી હતી. આ સાથે બનાવ અન્વયે ભુજ શહેર એ. ડિવિઝન પોલીસ સ્ટેશન ખાતે દાખલ થયેલ ગુનાને રૂટીન ગુનાની માફક નહિ પણ સ્પેશિયલ કેસ તરીકે લેવામાં આવે અને તેની સંપૂર્ણ તપાસ એક સપ્તાહમાં પૂર્ણ કરીને ચાર્જશીટ કરવામાં આવે.સાથે કેસની ટ્રાયલ પણ ખૂબ જ ઝડપથી પૂર્ણ કરવામાં આવે જેથી ભવિષ્યમાં આવા બનાવ ના બને તે માટે દાખલો બેસે આ સાથે ફરીથી આવા બનાવ ના બને તે માટે જરૂરી તમામ પગલાં લેવાની સૂચના અપાઇ હતી.આ સાથે કચ્છ પૂર્વ તેમજ કચ્છ પશ્ચિમના ન્યાયાલયો ખાતે સુરક્ષાની પૂરતી કાળજી રાખવામાં આવે અને સઘન ચેકીંગ રાખવામાં આવે અને આવા બનાવોનું પુનરાવર્તન ના થાય તેની કાળજી લેવામાં આવે તેવી પણ સુચના પોલીસ અધિકારીઓને કરાઇ હતી. સાથે ન્યાયાલયો ખાતે ન્યાયાધીશો, સરકારી તેમજ પ્રાઈવેટ વકીલો, કોર્ટના અધિકારી-કર્મચારીશ્રીઓ,પક્ષકારો,મહિલાઓ અને કોર્ટમાં આવનાર પ્રત્યેકની સુરક્ષા જળવાય એ માટેના જરૂરી તમામ પગલા લેવાની સૂચના અપાઇ હતી. પોલીસની સમય સુચકતાથી મામલો ગંભીર બનાત ચોક્કસ અટકી ગયો હતો પરંતુ કોર્ટ પરિસરમાં ધાતક હથિયાર સાથે આરોપીએ દર્શાવેલી હિંમતે કાયદો વ્યવસ્થાની સ્થિતી સામે ગંભીર પ્રશ્નો ઉભા કર્યા હતા. તેવામાં પોલીસની કડક કાર્યવાહી બાદ હવે કોર્ટે પણ જરૂરી નિર્દેશો આપી આ સમગ્ર મામલાને ગંભીર ગણી કેટલાક પગલાઓ સુચવી કેસને ઝડપી ચલાવવા માટેના આદેશો કર્યા છે. જેથી ભવિષ્યમાં આવા બનાવો અટકે
