ભચાઉ ફાયરની ટીમે ૩ કલાકની ભારે જહેમત બાદ રેસ્ક્યુ કરી મૃત્દેહ ઉતાર્યો આપધાતના કારણ જાણવા પોલીસે કવાયત હાથ ધરી
ભચાઉ તાલુકાના ધરાણા ગામની સીમમાં એક હ્રદયદ્રાવક અને ચોંકાવનારી ઘટના સામે આવી હતી.૨૨૦ કેવી (KV) હાઈટેન્શન વીજ પ્રસારણના ૨૦૦ ફૂટ ઊંચા ટાવર પર ગળેફાંસો ખાધેલી હાલતમાં એક યુવકનો મૃતદેહ મળી આવતા આસપાસના વિસ્તારમાં ચકચાર મચી ગઈ છે. ભચાઉ નગરપાલિકાની ફાયર ટીમે જીવના જોખમે ૩ કલાકની ભારે જહેમત બાદ મૃતદેહને હેમખેમ નીચે ઉતારી પોલીસને સોંપ્યો હતો.તારીખ ૦૩/૦૯/૨૦૨૬ ના રોજ સવારે ૧૧:૦૦ વાગ્યાની આસપાસ ભચાઉ નગરપાલિકાની ફાયર ટીમને ઇમરજન્સી કોલ મળ્યો હતો કે,ધરાણા ગામની સીમમાં આવેલ ખેતરની અંદર ૨૨૦ કેવી ના વીજ ટાવર પર એક વ્યક્તિ લટકેલી હાલતમાં છે.માહિતી મળતા જ ભચાઉ ફાયર ટીમ તાત્કાલિક ઘટના સ્થળે દોડી ગઈ હતી. ઘટનાસ્થળે પહોંચીને જોયું તો અંદાજે ૨૦૦ ફૂટ ઊંચા વીજ ટાવર પર એક યુવકે ગળેફાંસો ખાધો હતો.આટલી મોટી ઊંચાઈ પર ચડીને મૃતદેહને નીચે લાવવો એ ફાયર જવાનો માટે લોઢાના ચણા ચાવવા સમાન અને અત્યંત પડકારજનક હતું.ફાયર ટીમના જવાનો કોઈપણ ડર વગર સાહસ દાખવીને પોલ પર ચઢવા લાગ્યા હતા.જેમ-જેમ જવાનો ઉપર જઈ રહ્યા હતા તેમ-તેમ પવનનો વેગ વધતો ગયો હતો,જેના કારણે રેસ્ક્યુ ઓપરેશન વધુ જોખમી બન્યું હતું.તેમ છતાં, જવાનોએ હિંમત ન હારતા સતત ૩ કલાકની ભારે મહામેહેનત બાદ મૃતદેહને સફળતાપૂર્વક નીચે ઉતાર્યો હતો.ત્યારબાદ આ મામલે આગળની કાયદેસરની કાર્યવાહી માટે બોડીને પોલીસને સુપરત કરવામાં આવી હતી.પ્રાથમિક તપાસમાં મૃતક યુવકની ઓળખ સંજયકુમાર તરીકે થઈ છે, જે મૂળ ઝારખંડનો રહેવાસી હોવાનું જાણવા મળ્યું છે.આ યુવકે આ અંતિમ પગલું કેમ ભર્યું તે અંગે પોલીસે વધુ તપાસ હાથ ધરી છે.આ કપરા અને જોખમી રેસ્ક્યુ ઓપરેશનને પાર પાડવામાં ભચાઉ ફાયર ટીમના વીર જવાનોએ ઉત્કૃષ્ટ કામગીરી બજાવી હતી, જેમાં ટીમ લીડર પ્રવીણ દાફડા, કુલદીપ,શક્તિસિંહ,મયુર રામાનંદી,જયરાજસિંહ જોડાયા હતા.ભચાઉ ફાયર ટીમની આ પ્રશંસનીય અને સાહસિક કામગીરીને લઈને પંથકમાં તેમની ભારે પ્રશંસા થઈ હતી.
