રાપરમાં કાદવમાં ફસાયેલી ફોર્ચ્યુનર કારમાંથી પોલીસે ૩.૧૮ લાખનો વિદેશી દારૂ ઝડપી કુલ ૧૫.૧૮ લાખનો મુદ્દામાલ જપ્ત કર્યો તો બીજી તરફ આડેસર પોલીસે પણ 20.53 લાખના દારૂ અને ફોર્ચ્યુનર ગાડી સહિતનો મુદ્દામાલ જપ્ત કર્યો મનજી ઉર્ફે મનીયો માવજી કોલી સામે ફરીયાદ
પુર્વ કચ્છ પોલીસે બાતમી આધારે કુખ્યાત દારૂના બુટલેગરનો બે અલગ-અલગ સ્થળેથી લાખો રૂપીયાનો દારૂ મોંધી કારમાંથી જપ્ત કર્યો છે.પૂર્વ કચ્છમાં પ્રોહિબિશનની પ્રવૃત્તિઓ નાબૂદ કરવા હાથ ધરાયેલી ઝુંબેશ અંતર્ગત રાપર પોલીસે મોટી કાર્યવાહી કરીને ફોર્ચ્યુનર કારમાંથી ભારતીય બનાવટના વિદેશી દારૂનો મોટો જથ્થો ઝડપી પાડ્યો હતો.રાપર પોલીસ સ્ટેશનના પી.આઈ. આર.એલ.ખટાણા અને ટીમ નાઇટ પેટ્રોલીંગમાં હતી.તે દરમિયાન બાતમી મળી હતી કે રાપરનો ‘મનીયો ઉર્ફે મનજી માવજી કોલી’ વિદેશી દારૂની ગાડીઓ કઢાવે છે અને એક સફેદ રંગની ફોર્ચ્યુનર કારમાં દારૂ ભરીને મઢુત્રા રણમાંથી રાપર-ફતેગઢ નર્મદા કેનાલ તરફ આવી રહ્યો છે. બાતમીના આધારે પોલીસે વોચ ગોઠવતા રણના રસ્તા પર કાદવમાં ફસાયેલી હાલતમાં એક સફેદ ફોર્ચ્યુનર કાર મળી આવી હતી.કારની તલાશી લેતા તેમાંથી ભારતીય બનાવટની વિદેશી દારૂની બોટલો,ક્વાર્ટર અને બિયર ટીન મળી કુલ ૧,૮૭૨ નંગ દારૂ (કિંમત ૩,૧૮,૪૮૦) મળી આવ્યો હતો. પોલીસે ૧૨,૦૦,૦૦૦ની ફોર્ચ્યુનર કાર અને દારૂ મળી કુલ ૧૫,૧૮,૪૮૦નો મુદ્દામાલ કબ્જે કર્યો હતો.બીજી તરફ આ કિસ્સામાં વધુ કાર હોય તેવી સંભાવના વચ્ચે કામગીરી કરાઇ હતી જે દરમ્યાન આડેસર પોલીસે પણ આજ પ્રકારે દારૂ ઝડપી પાડ્યો હતો. આડેસર પોલીસ સ્ટાફ પેટ્રોલીંગમાં હતો તે દરમિયાન પીઆઈ જે.બી.આચાર્યને બાતમી મળી હતી કે મોમાઈમોરા કેનાલ તરફથી એક સફેદ કલરની ટોયોટા ફોર્ચ્યુનર ગાડી વિદેશી દારૂ ભરીને મોડા ગામ તરફ આવી રહી છે.બાતમીના આધારે પોલીસે વોચ ગોઠવી હતી.તપાસ દરમિયાન મોડાથી મોમાઈમોરા ગામના રસ્તાની સાઈડમાં એક ફોર્ચ્યુનર ગાડી નીચે ઉતરેલી હાલતમાં મળી આવી હતી.ગાડીની તલાશી લેતાં તેમાંથી વિદેશી દારૂનો મોટો જથ્થો મળી આવ્યો હતો. પોલીસે દારૂની કુલ 3426 બોટલ-ક્વોર્ટર સહિત 20,53,570નો મુદ્દામાલ જપ્ત કર્યો હતો.પોલીસે આ મામલે પ્રોહિબિશન એક્ટ હેઠળ મનજી ઉર્ફે મનીયો માવજી કોલી (રહે. ફુલપુરા, તા. રાપર, જી. કચ્છ) સહિત તેમાં સામેલ અન્ય શખ્સો સામે ગુન્હો નોંધી તપાસ હાથ ધરી છે.જો કે આરોપી હાલ બન્ને કિસ્સામાં ફરાર છે. જેને શોધવા માટે પોલીસે ચક્રો ગતિમાન કર્યા છે. જો કે પોલીસની એન્ટ્રીથી થયેલી નાશભાગ વચ્ચે બે સ્થળેથી કુખ્યાતનો લાખો રૂપીયાનો દારૂ મોંધી કારમાં લઇ જવાતો ઝડપી લેવાયો છે.
