ફતેગઢ ગામની સીમમાં ભોજનારી ડેમ પાસે માલધારી પર ફાયરિંગ કરી જાનથી મારી નાખવાનો પ્રયાસ કરનાર બે સશસ્ત્ર શિકારીઓને પૂર્વ-કચ્છ ગાંધીધામ લોકલ ક્રાઈમ બ્રાન્ચની ટીમે ઝડપી પાડ્યા શિકારી પ્રવૃતિના દરાદા દરમ્યાન માલધારી જાગી જતા ફાયરીંગનુ કબુલાત કચ્છમાં હથિયારોની હેરફેર પર રોક જરૂરી
રાપર
રાપર પોલીસ સ્ટેશન વિસ્તારના ફતેગઢ ગામની સીમમાં ભોજનારી ડેમ પાસે માલધારી પર ફાયરિંગ કરી જાનથી મારી નાખવાનો પ્રયાસ કરનાર બે સશસ્ત્ર શિકારીઓને પૂર્વ-કચ્છ ગાંધીધામ લોકલ ક્રાઈમ બ્રાન્ચની ટીમે ઝડપી પાડ્યા છે.પોલીસે આરોપીઓ પાસેથી દેશી હાથબનાવટની બંદૂક, બારૂદ અને બાઇક સહિત કુલ ૭૦,૫૦૦નો મુદ્દામાલ કબ્જે કર્યો છે. ઘટનાની વિગતે વાત કરીએ તો ગત તારીખ ૧૬/૦૯/૨૦૨૬ના રોજ રાત્રિના સમયે રાપરના ફતેગઢ ભોજનારી ડેમ પાસે એક માલધારી પરિવારે પોતાના ઘેટાં-બકરાં સાથે પડાવ નાખ્યો હતો.એ જ સમયે બે અજાણ્યા શખ્સો મોટરસાઇકલ પર જંગલ વિસ્તારમાં શિકાર કરવાના ઇરાદે આવ્યા હતા.જોકે, પડાવ પર હાજર ભોગ બનનાર જોગા રબારી જાગી જતાં,બંને શખ્સોએ તેમને જાનથી મારી નાખવાના ઇરાદે તેમના પર ફાયરિંગ કરી ગંભીર ઇજા પહોંચાડી હતી અને ઘટનાસ્થળેથી ફરાર થઈ ગયા હતા.આ મામલે નાની રવ ગામના ખોડા કાના રબારીની ફરિયાદના આધારે રાપર પોલીસ સ્ટેશનમાં ગુનો નોંધી તપાસ હાથ ધરવામાં આવી હતી.બનાવ મોડી રાત્રે બન્યો હોવાથી અને આસપાસ કોઈ CCTV કેમેરા ન હોવાથી કેસ ઉકેલવો પડકારજનક હતો. જો કે સરહદી રેન્જ ભુજ આઈજીપી ચીરાગ કોરડીયા અને પૂર્વ-કચ્છ એસ.પી. સાગર બાગમારની સુચનાથી LCB પી.આઈ. જે.એમ. વાળાની આગેવાનીમાં અલગ-અલગ ટીમો બનાવી વાગડ વિસ્તારમાં કેમ્પ રાખવામાં આવ્યો હતો.ખાનગી બાતમીદારો અને સીમ વિસ્તારમાં કરાયેલી ગહન તપાસમાં શિકારીઓની સંડોવણી હોવાની વિગતો પ્રકાશમાં આવી હતી. જે બાદ તપાસ કરતા શિકારી પ્રવૃતિની ટેવ ધરાવતા અહેમદ નજરમામદ હિંગોરજા (ઉં.વ. ૨૬, રહે. ઇન્દિરાનગર, આડેસર, તા. રાપર) રીઝવાન સુલેમાન સમેજા (ઉં.વ. ૨૪, રહે. મસ્જીદવાળો વાસ, આડેસર, તા. રાપર) શંકાના દાયરામાં આવતા તેને ઝડપી તેની પુછપરછ કરતા તેને ફાયરીંગ કર્યુ હોવાનુ કબુલાત આપી શિકારી પ્રવૃતિ માટે જતા હતા તે દરમ્યાન માલધારી જાગી જતા ફાયરીંગની કબુલાત આપી હતી. આરોપી પાસેથી પોલીસે દેશી હાથ બનાવટની બંદૂક, બંદૂક ચલાવવાનો ગન પાવડર,ધાતુના ગોળા,લોખંડના છરા,કાપડના ટુકડા અને પોકેટ બેગ સહિતનો મુદ્દામાલ કબ્જે કર્યો છે. અને આગળની કાયદેસરની કાર્યવાહી માટે આરોપીઓને રાપર પોલીસ સ્ટેશન સોંપવામાં આવ્યા હતા.આ કામગીરીમાં એલસીબી પી.આઈ. જે.એમ.વાળા,પી.એસ.આઈ.ડી.જી. પટેલ તથા એલ.સી.બી.સ્ટાફ જોડાયો હતો. મધરાતે ફાયરીંગની ધટનાએ સમગ્ર વાગડ પંથકમાં ભારે ચકચાર સર્જી હતી. જો કે પોલીસે વિસ્તારમાં કેમ્પ કરી આરોપીનુ પગેરૂ દબાવી બેને દબોચી લીધા હતા.
ભુજના ટાંકણાસરમાં બંદૂક સાથે એક ઝડપાયો
કચ્છમાં ગેરકાયેદસર હથિયારોની હેરફેર અને રાખવાના કિસ્સાઓ પણ સતત વધી રહ્યા છે. તે વચ્ચે માનકુવા પોલીસ સ્ટેશન વિસ્તારમાં ભુજ સ્પેશિયલ ઓપરેશન ગ્રુપ દ્વારા ગેરકાયદેસર હથિયાર સામે કામગીરી કરવામાં આવી હતી. ટાંકણાસર ગામ પહેલાં આવેલ વવાર ડુંગર પાસેથી દેશી બનાવટની મજલ લોડ બંદૂક સાથે સાલે દાઉદ જત નામના ઈસમને આબાદ ઝડપી લેવામાં આવ્યો હતો.વિવિધ મુદ્દામાલ સહિતની વસ્તુઓ કબ્જે કરી માનકુવા પોલીસ મથકે ગુનો નોંધવામાં આવ્યો હતો.આ સફળ કામગીરીમાં ભુજ SOGના પોલીસ ઇન્સ્પેક્ટર એ.ડી.પરમાર,પોલીસ સબ ઇન્સ્પેક્ટર ટી.બી.રબારી,નરેન્દ્રસિંહ ઝાલા,ભાવેશ ચૌધરી,દિનેશ ચૌધરી, મહિપાલસિંહ જાડેજા, રવિન્દ્રકુમાર રાઠોડ,મીતેશ રાજગોર વગેરે જોડાયા હતા.
કચ્છમાં છાસવારે આવા હથિયારો ઝડપાયા છે. પરંતુ આ હથિયારો ક્યાથી આવે છે તે ઉંડી તપાસ માંગી લે છે. સરહદી જીલ્લા કચ્છમાં અગાઉ ગેરકાયદેસર હથિયારોની ફેક્ટરી પણ ઝડપાઇ છે. તેવામાં સરહદી સુરક્ષાને ધ્યાને રાખી અસામાજીક પ્રવૃતિ માટે વપરાતા હથિયારો ક્યાથી આવ્યા તેની ઉંડી તપાસ જરૂરી હોવાનુ જાણકારો જણાવી રહ્યા છે.
