કોઠારાના વ્યાજખોરોનુ નેટવર્ક ભેદવામાં સફળ પોલીસને વધુ કરોડો મળ્યા..!

વ્યાજખોરો સામે લાલ આંખ કરનાર પશ્ચિમ કચ્છ પોલીસની વધુ એક મોટી સફળતા મળી છે. તપાસમાં એક કરોડથી વધુનો મુદ્દામાલ જપ્ત કરાયો કોઠારામાં પકડાયેલ આરોપીના ભુજમાં રહેતા સાળાના મકાનમાંથી મહત્વના પુરાવા,રોકડ, તથા સોના ચાંદીના ઘરેણા કબ્જે કરી ભુજ એલસીબીએ વધુ તપાસ આંરભી અત્યાર સુધી 3 કરોડથી વધુનો મુદ્દામાલ જપ્ત

ભુજ તા.૨૬
સરહદી કચ્છ જિલ્લામાં લોકોને ધાક ધમકીથી વ્યાજના વિષચક્રમાં ફસાવી રોકડ રકમ, કિંમતી દાગીના અને ખેતી લાયક જમીનના દસ્તાવેજો કરાવી પડાવી લેનાર આરોપીઓ વિરુદ્ધ લાલ આંખ કરી ઐતિહાસિક સર્ચ એન્ડ સીઝરની કાર્યવાહી કરી પશ્ચિમ કચ્છ લોકલ ક્રાઈમ બ્રાન્ચ પોલીસે કરી છે.સધન કાર્યવાહીમાં રોજ નવી અને સ્ફોટક વિગતોનો પર્દાફાશ થઇ રહ્યો છે. લાચાર જરૂરિયાતમંદ લોકોનું શોષણ કરતા વ્યાજખોરો વિરૂધ્ધમાં કડકમાં કડક કાર્યવાહી કરવા પોલીસ વડાઓની સુચના અને માર્ગદર્શન હેઠળ ચાલતી કામગીરી દરમ્યાન વ્યાજના વિષચક્રમાં ફસાયેલ એક ભોગ બનનાર યુવકને આરોપીઓ આમદ હાજી મામદ મંધરા અને ઓસમાણ હાજી મામદ મંધરા (રહે. બંન્ને કોઠારા તા.અબડાસા)એ દસ ટકા વ્યાજ લેખે રૂપિયા આપી ત્યાર બાદ વ્યાજના નામે તેના સહી વાળા કોરા ચેક તથા સી-ફુડના સ્ટેમ્પ, સહી વાળી ચેક બુકો તથા વ્યાજના નામે ફોર વ્હીલર કાર સાટા કરારથી લખાવી,વધુ મુદત આપવા કિંમતી જમીનનો સાટા કરાર કરાવ્યા બાદ ધાક ધમકીઓ કરી તેની કિંમતી જમીનના દસ્તાવેજ પોતાના નામે કરાવી લીધેલ જે અન્વયે કોઠારા પો.સ્ટે.ખાતે વિવિધ કલમો મુજબનો ગુનો દાખલ કરવામાં આવેલ જેની તપાસ કોઠારા પોલીસ સ્ટેશન ખાતે ચાલી રહી છે અને આ ગુનામાં ઉપરોકત બંને આરોપીઓની અટક કરવામાં આવી હતી. દરમ્યાન પાંચ દિવસના રીમાન્ડ દરમ્યાન શંકાસ્પદ છાપાની કટીંગ સાથે કરોડો રૂપીયાનો મુદ્દામાલ પોલીસે જપ્ત કર્યા બાદ હવે તેની તપાસ ભુજ સુધી લંબાઇ છે.આ આરોપીઓ પૈકી આમદ હાજી મામદ મંધરાનો સગો સાળો ભુજમાં સંજોગનગરમાં રહે છે,અને તેના રહેણાંક મકાનમાં આ ગુના કામે ઉપયોગી થઇ શકે તેવા અગત્યના વધુ પુરાવાઓ તથા અન્ય ઉપયોગી મુદામાલ હોવા અંગે લોકલ ક્રાઈમ બ્રાન્ચના પોલીસ કર્મચારીઓને મળેલી સચોટ બાતમી આધારે જરૂરી વર્ક આઉટ કરી આરોપીના સાળા રજાક ઓસમાણ સોતા(રહે.મુસ્તફા મસ્જીદની બાજુમાં, સંજોગનગર)ના મકાનમાં એલસીબીના એ.એમ.મકવાણા અને તેની ટીમે કાર્યવાહી હાથ ધરી હતી જે દરમ્યાન અલગ અલગ દરની ભારતીય ચલણી નોટ રૂ.૬,૧૮,૦૦૦, સોના ચાંદીના ઘરેણા જેમા સોનું-૬૩૬.૩૪ ગ્રામ તથા ચાંદી-૧૦૦ ગ્રામ કિંમત રૂ.૯૪,૪૦,૮૩૨, એરગન રૂ.૧૦૦૦ તથા અસલ વાહન વેંચાણ કરાર એમ કુલ્લ ૧,૦૦,૫૯,૮૩૨ નો મુદ્દામાલ કબ્જે કરવામાં આવ્યો હતો.આ કામગીરીમાં એલસીબી પોલીસ ઇન્સ્પેક્ટર એ.એમ.મકવાણા, એ.એસ.આઈ. અનિરુધ્ધસિંહ રાઠોડ, શ્યામદાન ગઢવી, સુનીલ પરમાર, હેડ કોન્સ્ટેબલ ધર્મેન્દ્ર રાવલ,રણજીતસિંહ જાડેજા, જયદેવસિંહ જાડેજા,શ્યામ ગઢવી તથા મહીલા પોલીસ કર્મચારી કીરણબા જાડેજા જોડાયા હતા. આમ બે દિવસમાંજ પોલીસે આરોપી પાસેથી ત્રણ કરોડથી વધુનો મુદ્દામાલ કબ્જે કર્યો છે. જે તેના વ્યાજખોરીના સામ્રાજ્ય કેટલુ ફેલાયેલુ છે તેના બોલતા પુરાવા છે.

પકડાયેલ આરોપીઓની મોડસ ઓપરેન્ડી

આરોપી ૧: આમદ હાજી મામદ મંધરા અને ૨: ઓસમાણ હાજી મામદ મંધરા પાસે નાણાં ધીરધારનું કોઈ માન્ય લાયસન્સ નહીં હોવા છતાં તેઓ લોકોને ખુબ ઉંચા દરે વ્યાજે નાણાં આપી બાદમાં વ્યાજ તથા નાણાં પરત ન ચુકવતા લોકો પાસેથી તેઓની કિમંતી મિલ્કતો, સોનું-ચાંદી તથા કિમતી ચીજવસ્તુઓ પડાવી લેતા હતા,આ ગુન્હાના ફરીયાદી પાસેથી આરોપીઓએ ફરીયાદીની કોઠારા ગામની સર્વે નં.૨૦૯ પૈકી ૨ વાળી જમીનનો પ્રથમ સાટા કરાર કરાવી ત્યાર બાદ દસ્તાવેજ આરોપી નં:૦૨ એ પોતાના તથા તેના મિત્ર અને કુંટુંબીઓના નામે કરાવ્યો હતો જેમાં ફરીયાદીને જમીનના કોઇ રોકડા રૂપિયા ન આપી અને ફરીયાદીએ સમયાંતરે રોકડા રૂ.૩૫,૦૦,૦૦૦ તથા ગુગલ પે થી રૂ.૧,૪૮,૫૦૦ એમ કુલ્લે રૂ.૩૬,૪૮,૫૦૦ જે ૧૦ ટકાના વ્યાજે ચુકવી દીધેલ હોવા છતાં આરોપીઓ વધુ વ્યાજની માંગણી કરતા હતા. જો કે આ તો માત્ર એક ફરીયાદ છે. પરંતુ હજુ આવા અનેક ભોગ બનનાર લોકોને શોધવા માટે પોલીસે ચક્રો ગતિમાન કર્યા છે. જે તપાસ બાદ વધુ સ્ફોટક વિગતો સામે આવી શકે તેમ છે.કેમેક મુદ્દામાલનો આંકડો જોતા અનેક લોકો પાસેથી આવી સંપતિ પડાવી લેવાઇ હોવાનુ સ્પષ્ટ થઇ રહ્યુ છે..

પશ્ચિમ કચ્છ પોલીસની જાહેર અપીલ

જિલ્લા પોલીસ દ્રારા લોકોને આપીલ કરવામાં આવી છે કે નાણાંની જરૂરિયાતના સમયે બિનલાયસન્સ નાણાં ધીરનાર વ્યક્તિઓ પાસેથી ઊંચા વ્યાજે નાણાં લેવાનું ટાળો અને નાણાંકીય વ્યવહાર કરતી વખતે તમામ કાયદેસરની પ્રક્રિયાનું પાલન કરો જો કોઈ વ્યક્તિ દ્વારા બિનલાયસન્સ નાણાં ધીરધાર કરી મનસ્વી વ્યાજની માંગણી, ધાકધમકી, ગાળો, દબાણ, જમીન-મિલકતના દસ્તાવેજો કરાવવા અથવા અન્ય કોઈ રીતે હેરાનગતિ કરવામાં આવતી હોય તો ભયભીત થયા વગર સંબંધિત પોલીસ મથકનો સંપર્ક કરી કાયદેસરની ફરિયાદ નોંધાવોતેમજ નાણાંકીય વ્યવહારના રસીદ, બેંક/ યુપીઆઈ વ્યવહાર, કરાર-દસ્તાવેજો, મેસેજ તથા અન્ય પુરાવાઓ સાચવી રાખવા પણ કાયદો હાથમાં ન લો,તમારી ફરિયાદ પોલીસ સમક્ષ રજૂ કરો અને કાયદેસરની કાર્યવાહી કરવામાં સહયોગ આપો તે બાદ શક્ય છે કે વધુ લોકો ફરીયાદ માટે આગળ આવે…

કોઠારાના વ્યાજખોરો સામેની કાર્યવાહી એક દ્રષ્ટાંત છે. પરંતુ જો સમગ્ર પશ્ચિમ કચ્છમાં આવી દરેક પોલીસ મથકોએ ઉંડાણપુર્વકની તપાસ કરવામાં આવે તો અનેક આવા ગંભીર મામલાઓ સામે આવી શકે તેમ છે. પૈસાની જરૂર અને ત્યાર બાદ બદનામીના બીકે લોકો ફરીયાદ માટે આગળ આવતા નથી. પરંતુ કચ્છમાં આવા અનેક વ્યાજખોરો છે. જે ઉંચા વ્યાજદર સાથે પઠાણી ઉધરાણી કરી પોતાનુ સામ્રાજ્ય વિસ્તારી રહ્યા છે. જો કે પોલીસની કાર્યવાહીને કારણે આવા લોકોમાં ફફડાટ ચોક્કસ ફેલાયો છે.