પશ્ચિમ કચ્છમાં છેલ્લા ૬ વર્ષથી નાસતો-ફરતો વિદેશી દારૂનો મોસ્ટ વોન્ટેડ બુટલેગર રાસુભા સોઢા પશ્ચિમ કચ્છ LCB ના શિકંજામાં આવી ગયો છે.પોલીસને “મને પકડી બતાવો” નો પડકાર ફેંકનાર આરોપી ‘ઓપરેશન ખોજ’ હેઠળ જંગલમાં ક્રાઉલિંગ કરીને દબોચાયો
ભુજ:
એસએમસીના દરોડા,પશ્ચિમ કચ્છમાં મીઠી નજર બેઠળ દારૂના ચાલતા અડ્ડાઓના આક્ષેપ વચ્ચે બદનામ પશ્ચિમ કચ્છ-ભુજ જિલ્લા પોલીસને દારૂના ગુનાઓ એક મોટી સફળતા મળી છે. અને અલગ-અલગ પોલીસ સ્ટેશનોના ગણનાપાત્ર ૯ અને કુલ ૩૭ જેટલા પ્રોહીબિશનના ગુનાઓમાં છેલ્લા ૬ વર્ષથી નાસતા-ફરતા વિદેશી દારૂના મોસ્ટ વોન્ટેડ અને લિસ્ટેડ બુટલેગર રાસુભા ઉર્ફે રાસીયો તગજી સોઢા (રહે. સોઢાકેમ્પ, ખાનાય, તા. અબડાસા) ને લોકલ ક્રાઇમ બ્રાન્ચ (LCB) ભુજની ટીમે ઝડપી પાડ્યો છે.ઝડપાયેલા આરોપી રાસુભા સોઢા વિરુદ્ધ નલીયા, નખત્રાણા, મુંદરા, માંડવી/માનકુવા, પધ્ધર, દયાપર, અંજાર, ભચાઉ, વાયોર, નારાયણ સરોવર અને પ્રાગપર સહિતના પોલીસ મથકોમાં ૩૭ થી વધુ પ્રોહીબિશનના ગુના નોંધાયેલા છે. હાલ નખત્રાણા, પ્રાગપર, પધ્ધર, ભુજ બી ડિવિઝન અને અંજાર પોલીસ સ્ટેશનના ૯ જેટલા ગુનાઓમાં તેની અટકાયત કરવાની બાકી હતી, જે દિશામાં પોલીસે આગળની કાર્યવાહી હાથ ધરી છે. જંગલમાં છુપાઇ અને પોલીસ પકડથી દુર આરોપી બિન્દાસ્ત રીતે દારૂનુ નેટવર્ક ચલાવતો હતો. પરંતુ પોલીસે અંતે તેનુ પાણી ઉતારી તેને ઝડપી પાડ્યો છે.આ કામગીરીમાં પશ્ચિમ કચ્છ એલસીબીની ટીમ જોડાઇ હતી. અને અનેક પડકારો વચ્ચે અંતે ખાનાયના જંગલોમાંથી આરોપીને ઝડપી પાડ્યો હતો.આ સફળ ઓપરેશન પોલીસ ઇન્સ્પેક્ટર એ.એમ.મકવાણા, પો.સબ ઇન્સ. જે.બી.જાદવ, એમ.એચ.શિણોલ તથા વિરેન્દ્રસિંહ જાડેજા, પ્રદ્યુમનસિંહ ગોહિલ, અશ્વિન સોલંકી, સુરેન્દ્રસિંહ ઝાલા, સુનિલ પરમાર, મયુરધ્વજસિંહ જાડેજા, શ્યામ ગઢવી, મહેશ ચૌહાણ,સહિતના પોલીસ સ્ટાફ દ્વારા પાર પાડવામાં આવેલ
પોલીસને આપ્યો હતો “મને પકડી બતાવો” નો પડકાર
સરહદી રેન્જ આઇજીપી ચિરાગ કોરડીયા અને પશ્ચિમ કચ્છ એસપી વિકાસ સુંડાના માર્ગદર્શન હેઠળ LCB પીઆઇ એ. એમ.મકવાણાની આગેવાનીમાં વિશેષ ટીમની રચના કરવામાં આવી હતી. અગાઉ પોલીસ પર હુમલાખોર વર્તન કરવા માટે જાણીતો આ આરોપી સતત છ વર્ષથી પોલીસને “મને પકડી બતાવો!”તેવો ગર્ભિત પડકાર આપી રહ્યો હતો.જે પડકારને ઝીલીને છ વર્ષે બુટલેગરને પોલીસે પકડી પોતાનો પાવર બલાવ્યો છે.
૧૫ દિવસનો વેશપલટો અને ૨૦૦ મીટરનું ક્રાઉલિંગ
આરોપીને ઝડપી લેવા LCB ના જવાનોએ ખાનાય જંગલ વિસ્તારમાં ખેડૂત અને સ્થાનિક લોકોનો વેશ ધારણ કરીને સતત ૧૫ દિવસ સુધી ધામા નાખ્યા હતા.જંગલની કપરી પરિસ્થિતિ અને કડક ગરમી વચ્ચે ૧૦ દિવસ કોઈ સફળતા મળી ન હતી.પરંતુ આખરે સચોટ બાતમી મળી કે આરોપી ખાનાય સીમ વિસ્તારના ડુંગરોમાંથી ગામ તરફ આવી રહ્યો છે.LCB ની ટીમે ‘ઓપરેશન ખોજ’ શરૂ કરી જંગલમાં બાવળોની ઝાડીઓમાં છુપાઈને ૩ દિવસ સુધી નજર રાખી હતી.આરોપી એક નિર્જન જગ્યાએ સુતો હોવાની માહિતી મળતા,૨૦૦ મીટર દૂરથી જવાનોએ જમીન પર ઘાસ અને ઝાડીના ઓથે ક્રાઉલિંગ (સરકીને) આગળ વધવાનું શરૂ કર્યું હતું.LCB ના કર્મચારીઓ વિરેન્દ્રસિંહ જાડેજા, મયુરધ્વજસિંહ જાડેજા અને શ્યામ ગઢવીએ સંયુક્ત ટીમવર્કથી રાસુભાને નજીક પહોંચીને ઝડપી લીધો હતો.
પશ્ચિમ કચ્છમાં ઉપરાઉપરી એસએમસીના દારૂ-જુગારના અડ્ડા પર દરોડાને કારણે પશ્ચિમ કચ્છ પોલીસની છબી ખરડાઇ હતી તો સ્થાનીક કામગીરી ઉપરાંત બુટલેગરો બેફામ રીતે કરોડોનો માલ ઉતારી પોલીસ માટે પડકાર ફેંકી રહ્યા હતા. તે વચ્ચે પશ્ચિમ કચ્છ પોલીસે ‘ઓપરેશન ખોજ’ દ્વારા કુખ્યાત બુટલેગને ઝડપી મોટી કાર્યવાહી કરી છે.
