લખપતના સગીર સાથે અપ્રાકૃતિક કૃત્ય કરનાર શખ્સને ૨૦ વર્ષની સખત કેદ !

2024ના ચકચારી કિસ્સામાં ભુજ કોર્ટે POCSO એકટ અને BNSS ની વિવિધ કલમો હેઠળ ૨૦ વર્ષની જેલ અને ૫૦,૦૦૦ દંડ ફટકારવા સાથે ૩ લાખનું વળતર ચૂકવવા ભલામણ કરી

લખપતમાં સગીર વયના બાળક પર આચરવામાં આવેલા દુષ્કર્મ અને અપ્રાકૃતિક કૃત્યના કેસમાં ભુજ અદાલતે એક મોટો અને ઐતિહાસિક ચુકાદો સંભળાવ્યો હતો.અદાલતે આરોપી મનસુખ ભગવાનભાઈ બારૈયા,ઉંમર ૩૨ વર્ષ, રહે. ગાયત્રી નગર, દયાપર, તા. લખપતને દોષિત ઠેરવી ૨૦ વર્ષની સખત કેદ અને રૂપિયા ૫૦ હજારના દંડની સજા ફટકારી હતી.બનાવની વિગતો અનુસાર,નવેમ્બર ૨૦૨૪ના દિવાળી વેકેશન દરમિયાન ૧૪ વર્ષીય સગીર બાળક પોતાના મિત્ર સાથે કબૂતર જોવા ગયો હતો.એ સમયે રસ્તામાં આરોપી મનસુખ બારૈયા મળ્યો હતો અને બંને બાળકોને કબૂતર બતાવવાનું કહી પોતાની ‘આઈ-૨૦’ ગાડીમાં બેસાડી મોરગર સીમ વિસ્તારના નિર્જન સ્થળે લઈ ગયો હતો.ત્યાં આરોપીએ સગીરની મરજી વિરુદ્ધ ધાક-ધમકી આપીને દુષ્કર્મ આચર્યું હતું તથા તેના ફોટા અને વીડિયો ઉતારી વાયરલ કરવાની ધમકી આપી વારંવાર કુકર્મ આચર્યું હતું.આ મામલે દયાપર પોલીસ સ્ટેશનમાં ફરિયાદ નોંધાતા,પી.આઈ.વી.વી.ભોલા દ્વારા ઊંડાણપૂર્વક તપાસ કરી અદાલતમાં ચાર્જશીટ રજૂ કરવામાં આવી હતી.ભુજના નામદાર સ્પેશ્યલ જજ એમ.એફ.ખત્રી સાહેબની અદાલતમાં આ કેસ ચાલ્યો હતો.જેમાં પ્રોસિક્યુશન તરફથી મુખ્ય જિલ્લા સરકારી વકીલ એચ.બી.જાડેજા હાજર રહ્યા હતા.સરકારી વકીલે રજૂ કરેલા ૩૦ દસ્તાવેજી પુરાવા અને ૧૪ સાક્ષીઓની જુબાનીના આધારે કોર્ટે આરોપીને દોષિત ઠેરવ્યો હતો.અદાલતે આરોપીને POCSO એકટની કલમ-૪ અને કલમ-૬ હેઠળ ૨૦-૨૦ વર્ષની સખત કેદ તથા BNSS ની કલમ ૩૫૧(૧) હેઠળ ૧ વર્ષની જેલ અને કુલ ₹૫૦,૦૦૦ નો દંડ ફટકાર્યો છે.આ ઉપરાંત, ભોગ બનનાર સગીરને ૩ લાખનું વળતર ચૂકવવા માટે D.L.S.A. (જિલ્લા કાનૂની સેવા સત્તામંડળ) ને ભલામણ કરવામાં આવી છે.ગુનાહિત માનસિકતા ધરાવતા તત્વો સામે અદાલતનો આ કડક ચુકાદો એક દાખલો બેસાડે છે.