અને….RE પાર્કમાં ‘બલ્કર’ કામદારો ભરેલી ગાડી પર મોત બની ત્રાટક્યુ !

RE પાર્કમાં બોલેરોના અકસ્માતમાં ૭નાં મોત 21 થી વધુ લોકો ઇજાગ્રસ્ત બનતા આરી પાર્ક ચીસાચીસથી મધરાત્રે ગુજી ઉઠ્યુ હતુ.બનાવની જાણ થતા એસપી-કલેકટર સહિતના અધિકારીઓ હોસ્પિટલ દોડી ગયા હતા.પોલીસે સંવેદનશિલ વિસ્તારમાં સર્જાયેલા પ્રથમ મોટા અકસ્માતની સર્વગ્રાહી તપાસ આંરભી છે.નાના વાહનમાં ખીચોખીચ લોકોને ભરાતા સુરક્ષા મુદ્દો સપાટી પર આવ્યો હતો બીજી તરફ કચ્છના સ્થાનીક નેતાઓ સાથે વડાપ્રધાને શોક વ્યક્ત કર્યો હતો.

ભુજ,તા.૯

કચ્છના ખાવડા રિન્યુએબલ એનર્જી પાર્કમાં કાળજું કંપાવી દેનારો ગમખ્વાર અકસ્માત થયો હતો.મોડી રાત્રે પોલીસ ચેકપોસ્ટથી આરી પાર્ક તરફ જવાના માર્ગ પર પૂરપાટ ઝડપે આવી રહેલા કામદારોથી ભરેલી બોલેરો ગાડીને ભારી બલ્કરે જોરદાર ટક્કર મારતા ગંભીર અકસ્માત સર્જાયો હતો.આ દુર્ઘટનામાં ૭ શ્રમિકોનાં ઘટનાસ્થળે જ કમકમાટીભર્યા મોત નિપજ્યાં હતા.ટક્કર એટલી જોરદાર હતી કે બોલેરોમાં સવાર શ્રમિકોમાં ચીસાચીસ મચી ગઈ હતી અને વાતાવરણ ગમગીન બની ગયું હતું.આ ભયાનક ટક્કરને કારણે ઘટના સ્થળે જ લોહીના ખાબોચિયા ભરાઈ ગયા હતા.અકસ્માતનો ભારે આક્રંદ અને ઈજાગ્રસ્તોની ચીસાચીસ સાંભળીને આસપાસના લોકો તથા અન્ય વાહનચાલકો તુરંત જ મદદે દોડી આવ્યા હતા.સ્થાનિક લોકો તથા પોલીસે ભારે જહમત ઉઠાવીને ગાડીમાં ફસાયેલા કામદારોને બહાર કાઢ્યા હતા અને ઈજાગ્રસ્તોને તાત્કાલિક સારવાર અર્થે નજીકની હોસ્પિટલમાં ખસેડ્યા હતા.નોંધનીય છે કે,ખાવડા આરઇ પાર્ક વિસ્તારમાં આ પ્રકારનો સર્જાયેલો આ પ્રથમ અને સૌથી મોટો ભયાનક અકસ્માત છે.મોડી રાત્રે ઘટેલી આ કરુણ દુર્ઘટનાને પગલે સમગ્ર કચ્છ અને ખાવડા વિસ્તારમાં ભારે શોકની લાગણી ફેલાઇ હતી.

એસપી કલેકટર સહિતના દોડી ગયા….

દુર્ઘટનાની જાણ થતાં જ પોલીસ કાફલો ઘટનાસ્થળે પહોંચી ગયો હતો.પોલીસ દ્વારા મૃતદેહોને પ્રથમ ખાવડા ખાતે ખસેડવામાં આવ્યા હતા અને ત્યારબાદ આગળની વિધિ તથા પોસ્ટમોર્ટમ માટે ભુજ મોકલાયા હતા.બનાવની જાણ થતા કચ્છ કલેકટર અનિલ રાણાવસીયા અને પશ્ચિમ કચ્છ એસપી વિકાસ સુંડા સહિતના અધિકારીઓ હોસ્પિટલ દોડી ગયા હતા અને ઇજાગ્રસ્તોની ખબર અંતર પુછી તેની જરૂરી સારવાર માટેની વ્યવસ્થા કરી હતી.અને જરૂરી સુચનો સાથે કડક તપાસના આદેશ પણ આપ્યા હતા.તો ભુજ વિસ્તારના ધારાસભ્ય સહિત અગ્રણીઓ પણ હોસ્પિટલમાં ઇજાગ્રસ્તોના ખબરઅંતર પુછવા પહોચ્યા હતા.

અને સાત લોકો માટે મોત બન્યુ ભારે વાહન…

પોતાના પરિવારથી દુર રોજગારીની શોધવા આવેલા સાત કામદારોને અકસ્માતમાં મોત મળ્યુ હતુ.બોલેરો પિક-અપ ગાડીમાં કુલ ૩૨ જેટલા શ્રમિકો સવાર થઈને જઈ રહ્યા હતા.આ દરમિયાન સામેથી આવતા બલ્કર સાથે પિક-અપ ગાડી અથડાતાં ચીયારીઓ અને અફરાતફરી મચી ગઈ હતી.દુર્ધટનામાં ૧.બીરેશ જગદેવ પાસવાન (ઉં.વ. ૨૨, રહે. દહલા, સિતાપુર, યુ.પી.)૨.દેશરાજ સુજલાલ પાસવાન (ઉં.વ. ૪૮, રહે. ખનેવા, સિતાપુર, યુ.પી.)૩.સંદિપકુમારદોલીરામ પાસવાન (રહે. ખનેવા, સિતાપુર, યુ.પી.)૪. કુલદિપકુમાર રામકુમાર પાસવાન (ઉં.વ. ૩૧, રહે. ખનેવા, સિતાપુર, યુ.પી.) ૫.અનુપ ચેતરામ પાસવાન (ઉં.વ. ૨૪, રહે. પીપરી, બહરાઈચ) ૬.અનિલ રામપાલ પાસવાન7 .કૈલાશ રામધન મંડલ (ઉં.વ. ૪૫, રહે. બગડીયા, બિહાર)નુ મોત થયુ હતુ. જ્યારે પિક-અપ ગાડીમાં સવાર બાકીના 24 જેટલા ઈજાગ્રસ્ત શ્રમિકોને ભુજની જી.કે.જનરલ હોસ્પિટલ ખાતે સારવાર હેઠળ મોકલાયા હતા.જ્યારે બલ્કરના ડ્રાઈવર અકબર આમદ ખલીફા (ઉં.વ. ૪૦) લેઉઆ પટેલ હોસ્પિટલ,ભુજ ખાતે સારવાર માટે લઇ જવાયો હતો.પોલીસે જાવેદ અલાના સમા ઉ.વ.૨૦ ધંધો-ડ્રાઇવીંગ રહે.નાના દિનારાની ફરીયાદના આધારે કાર્યવાહી સાથે તપાસ આરંભી છે.આ તરફ પ્રધાનમંત્રીએ કચ્છના ખાવડામાં થયેલા અકસ્માતમાં શોક વ્યક્ત કર્યો અને શોકગ્રસ્ત પરિવારો પ્રત્યે સંવેદના વ્યક્ત કરી અને ઘાયલોના ઝડપથી સાજા થવાની પ્રાર્થના કરી હતી.

શુ જવાબદારો સામે કાર્યવાહી થશે ?

હાલ તો પોલીસે આ મામલે પ્રાથમીક તપાસ કરી ફરીયાદ નોંધવા તજવીજ શરૂ કરી છે. પરંતુ અહી સવાલ બહુ મોટો છે. અધિકારીઓ હોસ્પિટલ તો દોડી ગયા પરંતુ પીકઅપ વાનમાં 32 લોકોને લઇ જવાનો મામલો ખુબ ગંભીર છે.કચ્છમાં વધેલા ઓદ્યોગીક વિકાસ સાથે નિયમોના પાલન માટેની કાર્યવાહી ન થતા આવી દુર્ધટનાઓ છાસવારે પ્રકાશમાં આવે છે.તેવામાં અસરકારક કામગીરી જવાબદારો સામે થાય તે જરૂરી છે.પ્રાથમીક તપાસમાં પીકવાન વાન આર.ઇ.પાર્કમાં એન.ટી.પી.કંપનીની પેટા કંપની ફલોદીમાં મજુરોને લઇને જઇ રહી હતી અને આવા કામદારોને લઇને જવાના ફેરા બે વાર કરવામાં આવતા હતા પરંતુ ગઇકાલે આ અકસ્માત સર્જાયો હતો.જો કે અહી સવાલ એ છે. કે કામદારોને આવી વિષમ સ્થિતીમાં ધેટા-બકરાની જેમ લઇ જવાતા હતા.તો અત્યાર સુધી તેની સામે કેમ કોઇ કાર્યવાહી થઇ નહી..તો કંપનીએ પણ આવી પ્રવૃતિ સામે કેમ આંખ આડા કાન કર્યા કેમકે આવુ પરિવહન દૈનીક થતુ હતુ.અને અહી અનેક કંપનીઓમાં હજારો કામદારો કામ કરે છે. તો શુ તમામને આજ રીતે લઇ જવામાં આવી છે. તે સવાલ તપાસ માંગી લે તેવો છે.જો કે હવે જાગ્યા ત્યારથી સવાર તેમ હવે દારૂ-ચોરી સહિતના બનાવો સાથે પોલીસ માટે આરઇ પાર્કમાં નિયમો વિરૂધ્ધ દોડતા વાહનો સામે કાર્યવાહીનો પડકાર રહેશે જો કે હવે સમગ્ર મામલે શુ કાર્યવાહી થાય છે તે જોવુ અગત્યનુ રહેશે…

કચ્છમાં ઓદ્યોગિક વિકાસની સાથે વધતી વાહનો અને અકસ્માતની સંખ્યા ચિંતાજનક છે. જો કે તેનાથી પણ ચિંતાજનક પરિવહન નિયમોનો ભંગ કરી દોડતા નાના-મોટા વાહનો છે.તેવામાં આવી મોટી દુર્ધટના પછી કચ્છના રસ્તાઓ પર દોડતા આવા બેફામ વાહનો સામે કાર્યવાહી થાય તે ઇચ્છનીય છે નહી તો છાસવારે કચ્છના રસ્તાઓ રક્તરંજીત બનતા રહેશે..જો કે કચ્છના ગ્રીન એનર્જી હબમાં સર્જાયેલા અકસ્માતની નોંધ ઉચ્ચકક્ષા સુધી લેવાઇ છે. ત્યારે કાર્યવાહી સંભવ છે.જો કે આરઇ પાર્ક જ નહી સમગ્ર કચ્છમાં દોડતા આવા વાહનો પર લગામની માંગ ઉઠી છે.

દુર્ધટનામાં ઇજાગ્રસ્તની સંપુર્ણ યાદી
રાહુલ તિર્થરામ પાસવાન રહે દહલા સિતાપુર ઉત્તરપ્રદેશ,અંકિત રામપાલ પાસવાન રહે દહલા સિતાપુર ઉત્તરપ્રદેશ,પ્રમોદ બહાદુરપ્રભાત પાસવાન રહે દહલા,સિતાપુર ઉત્તરપ્રદેશ,નનકન્ના સાલીગ્રામ પાસવાન રહે બાચુડા મહેમાદાબાદ,સત્યેન્દ્ર કનૈયાલાલ પાસવાન રહે દહલા સિતાપુર ઉત્તરપ્રદેશ,ધર્મેન્દ્ર ભગવાનદેવ પાસવાન,અનિલ ભગવાનદેવ પાસવાન,સુશીલ રામનાથ પાસવાન ,ઉમેશ જુગરામ પાસવાન,સુશીલ પીપાહીલાલ પાસવાન,સુશીલ રામપાલ પાસવાન,વિજયકુમાર મુલચંદ પાસવાન,મુકેશ સીસરીલાલ પાસવાન,સુરેન્દ્ર રાજેશકુમાર પાસવાન જાવેદ અલાના સમા રહે નાના દિનારા (ડ્રાઇવર),અવધેશ રામનાથ ચૌહાણ,રાજેન્દ્ર પાસવાન,બીપીન તેશરાજ પાસવાન,ઉભમ બહાદુર પાસવાન,અર્જુન શ્રીરાઅમ પાસવાન,રામસિંગ હરીનામ પાસવાન,અજય પાસવાન,પ્રદિપ પાસવાન, વિકાશ પસવાન,અકબર આમદ ખલીફા ઉ.વ.૪૦-ડ્રાઇવરનો સમાવેશ થાય છે.