એસ.ઓ.જી. અને એલ.સી.બી.પશ્ચિમ કચ્છ એ ભેદ ઉકેલી ૪ આરોપીઓ ઝડપ્યા,૬ વોન્ટેડ લાયસન્સવાળી બંદૂક બચાવવા દેશી બનાવટની ગેરકાયદે બંદૂક મૂકી પોલીસને ગેરમાર્ગે દોરવાનો પ્રયાસ પણ નિષ્ફળ બનાવને અકસ્માતમાં ખપાવવા પ્રયત્ન કરાયો હતો.
ભુજ,
પશ્ચિમ કચ્છના માનકુવા પોલીસ સ્ટેશન વિસ્તાર અંતર્ગત આવતી પાયરકા સીમમાં ગત તારીખ ૦૪/૧૧/૨૦૨૬ ના રોજ નોંધાયેલ અકસ્માત મૃત્યુનો શંકાસ્પદ બનાવ આખરે મર્ડર અને પુરાવા નાશ કરવાના ગંભીર ગુનામાં ફેરવાયો છે.સરહદી રેન્જ ભુજના પોલીસ મહાનિરીક્ષક ચિરાગ કોરડીયા અને પશ્ચિમ કચ્છ-ભુજના પોલીસ અધિક્ષક વિકાસ સુંડાની સૂચના અને માર્ગદર્શન હેઠળ એસ.ઓ.જી.તથા લોકલ ક્રાઇમ બ્રાન્ચની સંયુક્ત ટીમે આ શંકાસ્પદ કેસનો ગણતરીના દિવસોમાં ભેદ ઉકેલી દીધો છે. બનાવની વિગતે વાત કરીએ તો પોલીસના જણાવ્યા અનુસાર,ગત તા. ૦૩/૧૧/૨૦૨૬ ના રાત્રીના સમયે કાદર હાસમ જત,ઇશા હુશેન જત,અલ્તાફ રમજુ જત અને જુમા ઉર્ફે રશીદ ઉમર જત (તમામ રહે.પીરવાળી-સુમરાસર-જત,તા. ભુજ) પાયરકા સીમ વિસ્તારમાં બંદૂકથી શિકાર કરવા માટે ગયા હતા.શિકાર કરતા સમયે અચાનક ઇશા જતની આંગળી ટ્રીગર પર આવી જતા બંદૂકમાંથી ફાયર થયુ હતુ.જે સામે ઉભેલા કાદર હાસમ જતના માથામાં વાગતા તેનું કરૂણ મોત નીપજ્યું હતું.આ બનાવને સામાન્ય અકસ્માતમાં ખપાવી દેવા માટે આરોપીઓએ મોટું કાવતરું રચ્યું હતું.મૃતક કાદર જત પોતાના જ પરિવારનો સભ્ય હોય અને આ બનાવમાં જુમા મુસા જતની કાયદેસર પરવાનાવાળી (લાયસન્સવાળી) બંદૂક વપરાયેલી હોવાથી,લાયસન્સ રદ ન થાય અને હથિયાર જપ્ત ન થાય તે માટે આરોપીઓએ ભેગા મળીને અન્ય એક ગેરકાયદેસર દેશી બનાવટની બંદૂક મેળવી લીધી હતી.ત્યારબાદ લાયસન્સવાળી બંદૂક છુપાવીને તેના બદલે સ્થળ પર દેશી બનાવટની બંદૂક મૂકી દીધી હતી અને પોલીસ તપાસને ગેરમાર્ગે દોરી ખોટી માહિતી આપી હતી. SOG ના એ.એસ.આઇ.નરેન્દ્રસિંહ ઝાલા તથા રઘુવીરસિંહ ઉદુભા જાડેજાને મળેલી સચોટ બાતમીના આધારે પોલીસે ઊંડાણપૂર્વક તપાસ હાથ ધરી આ સમગ્ર કાવતરાનો ભાંડો ફોડ્યો હતો.જેમાં ઇશા હુશેન જત (રહે. પીરવાળી, તા. ભુજ) આદમ ઇભલા જત (રહે. કોડકી, તા. ભુજ), જુમા મુસા જત (રહે. હાલ કોડકી, મૂળ પીરવાળી, તા. ભુજ) તથા જાકબ દાઉદ જત (રહે. ટાંકણાસર, તા. ભુજ જેની સામે અગાઉ પણ આર્મ્સ એક્ટ અને મારમારીના ગુનાઓ નોંધાયેલા છે. તેની સંડોવણી ખુલ્લી હતી.આ મામલે તપાસ દરમ્યાન ઉમર જાકબ જત (રહે. સુમરાસર – જત), હાજી સિધિક મામદ જત (રહે. પીરવાળી), જુમા કાસમ જત (રહે. નવાવાસ, પીરવાળી), સિધિક દાઉદ જત (રહે. સુમરાસર – જત),ઇબ્રાહિમ હાજીસિધિક જત (રહે. નવાવાસ,પીરવાળી),ઇમરાન દાઉદ જત (રહે. માઇના પડ, તા. ભુજ)ની સંડોવણી પણ ખુલી છે. જેને પકડવા માટે પોલીસે ચક્રો ગતિમાન કર્યા છે.ચારેય પકડાયેલા આરોપીઓ વિરુદ્ધ કાયદેસરની સઘન કાર્યવાહી કરી આગળની તપાસ માટે માનકુવા પોલીસ સ્ટેશનને સોંપવામાં આવ્યા છે.આ સફળ કામગીરી એસ.ઓ.જી.પોલીસ ઇન્સ્પેક્ટર તથા એલ.સી.બી.પી.આઈ. એ.એમ.મકવાણા અને તેમની ટીમ સહિતનો સ્ટાફ જોડાયો હતો.
એક સમયે પોલીસે આ મામલે અકસ્માત મોતનો ગુન્હો નોંધી તપાસ હાથ ધરી હતી અને હતભાગીએ આપધાત કર્યો હોવાની શંકા પણ વ્યક્ત કરાઇ હતી. જો કે તપાસના અંતે આ બનાવ એક ગુન્હાહિત કાવતરૂ હોવાનુ ખુલ્યુ છે. જે મામલે ચારને પકડી અન્યને પકડવા પોલીસે ચક્રો ગતિમાન કર્યા છે.
