ભુજના શિવહરી નગરમાં ૩૭ વર્ષ જૂના જાહેર રસ્તાને બંધ કરવાના મામલે તંત્ર અને રહેવાસીઓ વચ્ચે ગતિરોધ ઉભો થયો દબાણ હટાવવાની સત્તા અંગે નગરપાલિકા અને જમીન દફતર નિરીક્ષક કચેરી સહિતના વિભાગો વચ્ચે અસંમજંશ રહેવાસીઓ કહે છે. જાએ તો જાએ કહા…
ભુજ:
શહેરના શિવહરી નગર વિસ્તારમાં છેલ્લા આશરે ૩૭ વર્ષથી અસ્તિત્વમાં રહેલા અને ત્રણ રહેણાંક વિસ્તારોને જોડતા જાહેર ઉપયોગના રસ્તાને કાયમી ધોરણે બંધ કરવાની તથા આસપાસની જમીન પર દબાણ-બાંધકામ કરવાની કામગીરી મામલે તંત્રમાં રજૂઆતો અને પત્રવ્યવહારનો દોર ચાલી રહ્યો છે.એક તરફ સ્થાનિક રહેવાસીઓ દ્વારા રસ્તો ખુલ્લો રાખવા અને દબાણ અટકાવવા ઉગ્ર રજૂઆતો કરવામાં આવી છે,તો બીજી તરફ દબાણ દૂર કરવાની સત્તા અને રેકર્ડ મુદ્દે તંત્રની કચેરીઓ વચ્ચે એક બીજા પર ખો નખાઇ રહી હોવાનું દસ્તાવેજો પરથી સ્પષ્ટ થાય છે. બનાવની વિગતે વાત કરીએ તો શિવહરી નગરના રહેવાસીઓ જેમાં અનેક રહેવાસીઓનો સમાવેશ થાય છે. તેમના દ્વારા કલેક્ટર,મામલતદાર,ભુજના ચીફ ઓફિસર અને પોલીસ તંત્રને અરજી કરી રજૂઆત કરવામાં આવી છે કે શિવહરી નગરમાં ત્રણ મુખ્ય રસ્તાઓ પૈકીનો એક રસ્તો છેલ્લા ૩૭ વર્ષથી સતત જાહેર ઉપયોગમાં છે અને શિવહરી નગર સહિત આસપાસની ત્રણ કોલોનીના લોકો માટે અવરજવરનો મુખ્ય માર્ગ છે.રહેવાસીઓના જણાવ્યા મુજબ,આ રસ્તો બંધ થયો અને તેના પર દીવાલ-દબાણ થયા તેનાથી ત્રણ કોલોનીના લોકોના રોજિંદા આવન-જાવન ઉપરાંત એમ્બ્યુલન્સ, ફાયર બ્રિગેડ અને ઈમરજન્સી સેવાઓને ગંભીર અસર પહોંચી શકે તેમ છે.રહેવાસીઓએ ગુજરાત મ્યુનિસિપાલિટી એક્ટ ૧૯૬૩ (કલમ ૧૮૫,૧૪૮,૧૮૪) અને ગુજરાત લેન્ડ રેવન્યુ કોડ ૧૮૭૯ (કલમ ૬૧) હેઠળ કાર્યવાહી કરી રસ્તો કાયમી બંધ કરવાની કામગીરી તાત્કાલિક અટકાવવાની માંગ કરી છે.અહીથી શાળાના વિદ્યાર્થીઓ પણ પસાર થતા હતા.પરંતુ કેટલાક તત્વો દ્વારા આ રસ્તો બંધ કરી દેવાતા નાગરીકો માટે મુશ્કેલી સર્જાઇ છે.તેના કરતા પરંતુ મહત્વની વાત એ છે. કે રસ્તા માટે પુર્વ ધારાસભ્યની ગ્રાન્ટની મંજુરી મળી છે.પરંતુ રસ્તો કોનામાં આવે છે.તે અંગે તંત્ર જવાબદારીની ફેંકાફેંકી કરી રહ્યુ છે.આ મામલે છેક કલેકટર સુધી રજુઆત કરાઇ છે. પરંતુ પરિણામ આવ્યુ નથી.રાજકીય વગને કારણે પણ આ સમસ્યાનો ઉકેલ ન આવતો હોવાનો ગણગણાટ છે.
તંત્રની કચેરીઓ વચ્ચે વિરોધાભાસી વિગતો !
મામલતદાર કચેરી (ભુજ શહેર):તા. ૦૩/૧૦/૨૦૨૬ ના પત્રથી મામલતદાર દ્વારા જમીન નિરીક્ષક,ભુજ શહેર(સર્વે ભવન) ને શિવહરી નગરના ૩૭ વર્ષ જૂના જાહેર રસ્તાને કાયમી બંધ કરવાની કામગીરી તાત્કાલિક અટકાવવા અંગેની અરજી મોકલી,અધિકારક્ષેત્ર મુજબ નિયમાનુસાર કાર્યવાહી કરી અરજદારને પ્રત્યુત્તર પાઠવવા જણાવાયું હતું.જમીન દફતર નિરીક્ષકની કચેરી (ભુજ શહેર): તા. ૦૫/૧૧/૨૦૨૬ના પત્રથી ચીફ ઓફિસર,ભુજ નગરપાલિકાને જણાવવામાં આવ્યું છે કે સરવેયર દ્વારા તા. ૩૦/૧૦/૨૦૨૬ ના રોજ સ્થળ પર પંચરોજકામ કરાયું છે.તે મુજબ ૩૦-૩૫ વર્ષથી ખુલ્લો રહેલો રસ્તો બંધ કરાયો છે,જે ડો.નીમા ભાવેશ આચાર્યની ગ્રાન્ટમાંથી બનાવેલ હોવાનું જણાય છે.જોકે,આ કચેરીએ સ્પષ્ટતા કરી છે કે રસ્તા પરના દબાણ દૂર કરવાની સત્તા તેમની પાસે ન હોવાથી પંચરોજકામ અને રફ સ્કેચ સાથે પ્રકરણ નગરપાલિકાને મોકલવામાં આવ્યું છે.તો ભુજ નગરપાલિકા દ્વારા અગાઉ તા. ૦૩/૦૯/૨૦૨૬ ના પત્રથી મુખ્ય અધિકારી,ભુજ નગરપાલિકાએ અધિક જિલ્લા મેજીસ્ટ્રેટને જણાવ્યું હતું કે સ્થળ તપાસ કરતા સવાલવાળી જમીન પર કોઈ જાહેર રસ્તો હોય તેવું નગરપાલિકાના રેકર્ડમાં દર્શાવતું નથી. દબાણ દૂર કરવાની કાર્યવાહી નગરપાલિકાના કાર્યક્ષેત્ર બહાર હોવાનું જણાવી પ્રકરણ યોગ્ય કચેરીને મોકલવા વિનંતી કરી હતી.
જરૂરી રેકર્ડ અને પ્રાથમીક અહેવાલો તથા સ્થાનીકોની રજુઆત મુજબ અહી રસ્તો હોવાનુ સ્પષ્ટ જણાય છે. અને એટલેજ ગ્રાન્ટ મંજુર કરાઇ છે. પરંતુ બીજી તરફ સ્થાનીકોની રજુઆતો છંતા ૩૭ વર્ષ જૂના રસ્તાને બંધ કરવાના મુદ્દે રહેવાસીઓની તાત્કાલિક કાર્યવાહીની માંગ વચ્ચે રેકર્ડ અને દબાણ હટાવવાની સત્તા અંગે સંબંધિત કચેરીઓના વલણથી સ્થિતિ ગૂંચવણભરી બની છે.ત્યારે કોઇ પણ મંજુરી વગર રસ્તાને બંધ કરનાર સામે કાર્યવાહી કરી યોગ્ય તપાસ થાય તેવી માંગ સ્થાનીક લોકોએ કરી છે.ત્યારે જોવુ રહ્યુ..કયુ તંત્ર હવે આ જવાબદારી સ્વીકારે છે….